YEHEZKIEL 19 - Allah Wene Fano Wene Hupla Inane

Le wuni

¹ Allah nen an mimingnafi logolik, le wuni yi ap raja Israel mene inebe pire aremnogo inobaget wulabuageluk yaganete:

² Hagaisa re mene singa holou mene hak along-palonghogo hilingik logolik, wesarogo hilingik welagarek, Aren he, eagwi inebe kulinafi logolik singa ket souge mene omanogo inanggele'ma nen sougerinaferek,

³ Eak misik ekhe re enogo fikheresik, Paik watu mene faget milil melalhogo ambisang huniterek. A'nogo hilingfugunem at a'nogo singa hokho mene agaresik paik senggelhik ap nunggu mene agik ikherek.

⁴ Yi afuni ti afuni inunggulenu lombok omanogo nen at abok holiluk he ebe fakfogoin iluk andogetarek. At ebe pogole habuli'mo ubukhogo pelak fuluk hele warogo fagarek, andi nen kwaliok oba salukhogo lisogo liabi we'luk ebe waluk o Mesir lagaikharek.

⁵ At agaisa andi nen eak wesigin iluk nenanggoti logolik werek-werek ebe legaren he, oba eberek werek mene a'nogo onggoret fuluk welagarek. A'nogo logolik aren eak amu mene ekhe singa aik anini mene ambong siserek mene asuageluk milil melalhogo hilingfikherek.

⁶ Singa eak a'nogo ebe agaresik he, singa fena amu mene inom, kilik makfuluk nikherek. Aren paik heratu mene yanggulheresik, afuni senggelinafu mene ogo agaregat.

⁷ Leget pa'leget liabek mene langgukhogo kwikherek, a'nogo kwikhi logolik o kota wurik omanogo weagerogo fikheregat. Aren si'lamok eti logolik ane ngolutu mene re afuni nen inesanggo holharek, afuni andoma welagaikharek mene re inoak leigetarek.

⁸ Oba nen he, yi afuni ti afuni inunggulenu lombok o wilayah haningisogo welagaikharek mene omanogo nen he at ebe senesugun iluk andogotarek. Iren wasugun iluk su jala ugu mene talogo fugunem, at a'nogo iren yepse'ma a'nogo kwalasi kwikherek.

⁹ At a'nogo singa hukhogo kwelabek werek oba omanogo kwelakfagaresik waganogo waluk he o Babel oba andoma raja ambit fei lagaikharek. Aren ane kouwatu mene re o Israel oba punu lego mene ebene omanogo nen holinogo, iluk at ebe inomamerogo kagalek werek.

¹⁰ Hagaisa re, anggur ero fano mene yabu i endep mene esanggoma heiselogo wulibik andi hangge hilingik. I andoma elesi hokhorogo hilingi'mo re, e ebe mulit hikhi logolik enggi talogo enggen iterek.

¹¹ Enggire omame hokho hilingi'mo togolu mondok elo'lek, tomuk kerajaan oba andoma faget hilingisu hak hilingik. Erembul he, uan-awanhogo hilingi'mo anggulok oba senesi lagagu mene hangge hilingik. At ebe uansek logolik, engga hikse'ma re, ap hokhorogo nen ineil alonghogo fogeratarek.

¹² Oba nen he, afuni ina'mage lagaluk inenggi nen sagarogo kweangma taiget fagarek. A'nogo hilingfugunem sogoi timur fikhiren funha waga logolik, enggen fano mene puget fikherek. E enggi re sia'luk pugagunem he endu nolharek.

¹³ Yogondak at ebe o leimo yago logolik werek, athe kweang pukse'ma i elesi lek oba yago werek.

¹⁴ Anggur oak andi re endu nen libunget hamo re, enggi inom, enggen inom he, mondogat wera'lasigin. Yogondak he e enggi andire omame lek were'ma tomuk kerajaan faget hilingisu re elo'lego. Iluk le wuni andi it afuni Israel mene nen up sagalfagal hikhi logolik wati logogun mene re andi.