YEHEZKIEL 16 - Allah Wene Fano Wene Hupla Inane

Yerusalem higithogo hilingiri'lagwi lek isikhe wene

¹ Tuhan ane ekhe inom an noba yaganeti logolik,

² ”Afuni wa'lagaikharek mene yi re, Yerusalem mene nen hebak inabe mene hilingitu welagaikharek mene andoma inoba inugisan o.

³ Tuhan Lego Mondok welagarek mene a'nogo nen afuni Yerusalem mene faget wene yi yagaisoageluk mimingnafe. Yerusalem yi re, hat hebe re o Kanaan kweang oba andoma nen ta'lagagin. Hat heisena re ap Amori mene nen hagaisa re awi Het mene.

⁴ Nen hat hebe ta'lagaginmo andem he hanum palhafik, hebene kume wathobagagik, athe sapsap nonggwal hafik, mayu melangetu mene kel hobagagik, athe su kain meneba huli'lip hobagagik, isukwa mene ekhe werek lek.

⁵ Ap misigen iluk ogo ekhe endawit hapluk hat hobaget iren a'nogo ekhe hilinghafa lek. Nen hat hebe ta'lagagin sambul he inendawi hundik ekhe hilingiti'legat, meneat he hat hebe yabumo hukhea lagaikha.

⁶ Andi nen An laga logolik kwelakheasigi re hat hebene mebenek yuguk-fuguksegengge logolik he, neneik yabati lagagin, oba nen An nen hat hebe wa'lasuageluk herakhobagagi lek.

^7-9 An nen i wanhirik hamep hebene omanogo sobalogo pugunhogo hobagasigi. Hebene re zaitun amusuba yugulhobagasigi. Kweang oba yago mene muli fanorogo wiliferek hak hat hebere An nen andi higit kulhafigi. Hat hebe re weak-weagat halue agik, hoba ou legengge welagik, hele tugum ebe mene hilinglagik, isigin. Heilak mene arat tugetik hawagik, hesi uan agik isigin, oba nen he hebe halfulukwa kogouk welagagin. Andi nen ekhe sambul laga logolik kwelakheasigi re, hat hebe ap faget hendawinggen nunggunem hilingik were'ma heasigi. Andi nen he An nen nasu jubah su a'nogo hat halfulukwa welagen mene a'nogo yanggulogo labet hobagagik, An nen hat hoba nendawi hundik hilinghafirek mene faget wene wathetik, isigi. A'nogo hilingitigisik he An nen hat wokhafi lagi iluk wene wathigisik, hat hebe re An nonggwarek nangge mene hilingisogo hobagasigi. Iluk An Tuhan Lego Mondok welagirek mene a'nogo nen nane mondogat igi.

¹⁰ Andi nen An nen hat hasu inenggi nen lalogo ugu mene labet hobagagik, hasepatu re agap mondok sakhorek meneba kwagongge ik hobagagik, hungguloba re kain linen eil sakhorek meneba puget hobagagik, nen hasu re jubah no tagwi agap meneba labet hobagagik, isigi.

¹¹ Hat halilingge hebene re no permata eil fano meneba puget hobagagik, hasiong inom, hasenggan inom puget hobagagik isigi.

¹² An nen cincin oba hambisangmangge kwelakhobagagik, hesanggomangge wathobagagik, nen hungguloba mahkota mondok pugun-pagansek mene inom puget hobagagik, isigi.

¹³ Hat he halilingge a'nogo no emas inom, perak inom meneba liagaisogo welagagin, hasu re yo linen su meneba inom, tagwi agap oba kwagaisogo ugungge meneba laberek welagagin. Hat hambe nunggu mene re roti terigu ba hilingik mene inom, kin amusu inom, zaitun amusu inom oba hilingik engge ninggi lagagin. Heil alili re fano mondok hilingik logolik he hebe ratu agagin.

¹⁴ Yi afuni ti afuni inunggulenu lombok welagaikharek mene nen he, hat heil alili mondok pugun pagansek logolik hagambut palek lek welagagin aremnogo faget he fogethafi lagaukwa. Nen andoma mondogat he An nenat agauwak fanorogo halogo hobagasigi. Iluk An Tuhan Lego Mondok welagirek mene a'nogo nane mondogat igi.

¹⁵ Oba nen he, hat heil alili mondok fano welagen mene a'nogo inom, habok ugunem fano laga-laga mene a'nogo inom, haren we alomarogo hangge hilingiti lagen. Hat he ap amu mene lagik wagik agarek mene hinom yugunat nogokhi lagen andi.

¹⁶ Hasu fenakwe re tugwi kembu fogeratu mene faget alilingge waganogo kologo fikhi lagen. Hat hebe re onggo helageluk yanani hilingitu mene agendik logolik he ap mondogat omanogo melagisikhi lagen.

¹⁷ Halilingge perak inom emas inom An nen wokhetigi mene omanogoba re haren kembu ap mene alik wokfakhaluk he, hat hebe a'nogo kembu andoma hinom babi hilingiti lagen.

¹⁸ Haren he kembu alik waganek omanogo bene su ugu An nen wokheti mene omanogo labet fisikhi lagen. Haren he zaitun amusu inom, amben fano mene dupa inom An nen wokhetigi mene omanogo kembu obaget fisaluk wogeti lagen.

¹⁹ An nen hat nunggu mene re terigu mondok fano mene inom, kin amusu inom, zaitun amusu fano mene inom, wokheti lagagi. Oba nen he andoma mondogat he haren tugwi kembu obaget fuluk wogeti logolik it inendawimo inagaiyek hoageluk hilingfisikhi lagen. Iluk An Tuhan Lego Mondok welagirek mene a'nogo nane mondogat igi.

²⁰ Andi nen haren he nit ninagainafuri abomalik inom, helime mene inom, haren kembu faget fisaluk warogo tugwi kembu noleti lagen. Haren An noba tibet fuluk werek aple re oan higitsek legen hilingiti lagen a?

²¹ Nen haren An nagainafuri mene waganogo kembu obaget fuluk wogosumo re elok nogo?

²² Hat heluk logolik yanani nilik nikhi lagen mene andi re mondok wiik weak mene hilingirik nikhi lagen o, hat he attak hebe yenggerek logolik welagagin mene aremnogo ebethikhi lagen lega, hat halfulukwa kogouk were'ma hameben yuguk fugukhogo welagagin aremnogo ebethikhi lagen lega?” iluk ikhe.

Yerusalem he obabut yanani mene aga isikhe wene

²³ Tuhan Lego Mondok welagarek mene a'nogo nen ikhi logolik, ”Haren yi weak ti weak mondok hokhorogo hilingiti lagen andiba re, ’Hat he alomat lakhagain o! Eberogo nenat he alomat lakhagain!’

²⁴ Nen ekhe re haren he o kota silikwe inom, ebekhe ebe lombok omanogo esanggokwe mondogat inom, tugwi kembu fogerati logolik hesangge hilingiti logolik yanini hilingitukwe wurogo filik lagagin.

²⁵ Hat heil alili fano mondok a'nogo honggwaregen weagerogo fakhegen. Hebe re ap ekhe ebekhe lagik wagik agarek mene omanogo inoba hane kino weak hilingnapni iluk kinoti logolik mondok welagen. Haren henggi ekhe kamo igi'lek hundik-handik babi hilingitu mondok welagen.

²⁶ Mesir hat hera'lu werek mene endawinggen na mene re hokhorek mene a'nogo inom, harogo hinom nogokhi logogun iluk sebeti lagen. Haren heranen yandalonhogo An na'mage lagauwageluk yanani hilingiti lagen andi.

²⁷ Yogondak An nen hat unggum wokhesigiluk hilingiti lagi. An nen fanot hobagakhi lagi mene omanogo oak waganogo wanigin. An nen hat hebe waganogo re ap Filistin mene nen inanini hoba figik, hobabut mondok weakhogo nek hilingitunem hebak inaferogo kumut hiigik ikhi logouwageluk it inenggiba hobagakhi lagi.

²⁸ Oba nen he hat he hoba oan homot hobagali'lago lek andiba re haren ap Asyur mene siginarek-muginarek laga lagen andi. A'nogo muginarek laga logolik hat he iren yanani hilinghabi'lagwi mene aga lagen oba nen he, iren ogo hat hoba homot hobagali'lagwi legat.

²⁹ Andi nen ekhe hat he, ap Babel mene inunggulenu onggo heligik saburigik ugu welagaikharek inap andi nen hesangge hilinghafu mene aga lagen. Oba nen iren ogo hat hoba homot hobagali'lagwi legaro,” ikhe.

³⁰ Tuhan Lego Mondok welagarek mene a'nogo ane ikhi logolik, ”Haren hilingiti lagen mene andoma mondogat he, hemi yanani hilingitarek mene nen inenggali lek hilingirik nikharek andi hangge hilingiti lagen o.

³¹ O kota silikwe inom, kwe esanggokwe omanogo mondogat inom, tugwi kembu fogerati logolik yanani hilingitukwe halogo filik laga lagen. Oba nen hat he it ekhe we hesangge yanani hilingiti logolik uang kinotarek mene hangge hilingik welagen fuk.

³² Hat he, Ap agwe ekhe nen ap amu mene inom yanani hilingirik nikherek oba agun weagerogo fikherek a'nogo higit welagen.

³³ He yanani hilingiterek mene andi re hundik-handik onggo palogo helikherek, oba nen he agaumhogo re harenat it hendawinggen hundik mene omanogo onggo inagaiyekhogo iluk wogisikhi lagen, a'nogo hilingiti logolik ekhe haren it inebe yi kwe ti kwe nen we'luk hat hinom nogo iwesuageluk uang oba inendawinggen woginafi lagen.

³⁴ Hat he, yanani hunik mene hilingik welagen, it ekhe nen ninom hilingisuogen iluk inane nen ninghogo miming habi'lagwi lek. Iren hat onggo wokheri'lagwi legat, athe hat honggwaregen onggo fakhikhi lagen. Eberogo nen hat he hunik mene hilingik welagen, it amu mene inom he higitsek lek welagen,” iluk ikhe.

Yerusalem faget Allah nen unggum wogosigin isikhe wene

^35-36 Yerusalem yanani hilingirik nikhi lagen mene yi re, Tuhan Lego Mondok welagarek mene a'nogo nen ili'lago mene yi holin o, ”Hat hasu hebema mene nonggologore yanani hilingirik nikhi nogoigiluk hat hebe a'nogo it hendawinggen nunggu mene omanogo inom, haren mene tugwi kembu mondok ina'meilo mene a'nogo inom oba wogisegen. Hagainafuri re haren inebe warogo re tugwi kembu omanogo faget fisikhi lagen.

³⁷ A'nogo hilingiti lagen andiba re, it haren hendawi hundik hilinginafi lagen mene andoma mondogat he, hat hamolo mene ogo habit mene ogo, An nen andogorogo fisa wesigin. It he hat hebe habel fena-fena haningisogo kwelakhobagambik mendek logolik, hasu nonggologo hilinghobagaumo, halfulukwa kogouk were'ma iren ineilenggen kumuthafi logogun o.

³⁸ Haren babi hilingitik, ap inoatik, hilingiti lagen andiba re An nen unggum wokhesigin. An na'mage heren nanini lagakhi logombik unggum he hat hebe pinggi hoasigin.

³⁹ Hat hebe re, An nen waganogo it hendawi hundik hilinginafi lagen mene andoma inoba hobagaumo re, haren obalik tugwi kembu fogeratik, yanani hilingitik, hilingiti lagen kwe andoma meisak langgukhogo lakfisagain. Hasu inom halilingge inom mondogat iren helamo re, hat he halfulukwa kogouk logogin.

⁴⁰ Iren ap mondogat yagaisamo hat hebe helep huk helep oba hoasuageluk yagaisigik, karok oba hobakhe tiktekhogo liakhobagagik ugun.

⁴¹ Hat unggum hoba fogoin sambul andi re iren hat hawi wurik omanogo wolelenggenhogo fikhi logolik hemi inoba kumuthabuageluk yagaisamo kumuthafi logogun. A'nogo hat babi hilingiti lagen mene andi re An nen palogo fagain. Haren it hendawinggen hundik hilinginafi logolik inagaiyekhogo iluk onggo palogo wogisikhi lagagin omanogo hakhogo ekhe hilingisigin lek.

⁴² A'nogo hilingisigin andiba An nanini andi wulakfisambik enek he, An nendawinggen sakho igin, nen An hobuk na'mage lagagik, nendawimo weak agik, igin mondok lek.

⁴³ Hat hebe souge oan oba An nen kulhafigi mene a'nogo honggora'luk hilingiti lagen andi faget unggum wokhesigin. Haren An na'mage kwelagaisogo yi weak ti weak mondok hokhorogo hilingiti lagen oba An na'mage lagakhi laga andi. Nenahalok hat hobabut mondok hebak inabe mene hilingiti logolik meneat he hobuk ekhe inomat babi hilingituat welagen nogo? Iluk An Tuhan Lego Mondok welagirek mene a'nogo nen nane mondogat igi o,” ikhe.

Agaisa higit eak ogo ariginigat isikhe wene.

⁴⁴ Tuhan nen Yerusalem yagati logolik, ”Yerusalem, ap inane henarogo yi'nogo yagaheti logogun, ’Agaisa higit he eak ogo ariginigat,’ ikhi logogun.

⁴⁵ Eberogo nenat, hat he hagaisa a'logo hele mene welagen. Aren he honggwarek agun inom eagwi inom inoba re habit werek, hat he hegebi nen inaguni inom, ineagwi inom inoba inabitsek welagaikharek andi hangge hilingik welagen. Hat inom hegebi inom, o kota-kota era'lukwe maserogo welagep mene andoma hinagaisa re awi Het mene, nen hineisena re awi Amori mene ina'logomi welagep.

⁴⁶ Hat hoe re, Samaria utara fikhit mene desa aren mene andoma mondogat, nen hagot he, Sodom selatan fikhit desa aren mene inom werek mene andoma.

⁴⁷ Hat he iren ina'meilo mene hilingiri'lagwi mene andoma muginarek laga lagagin andiba hoba homot hobagaikherek nogo a? Iren hilingiri'lagwi mene andoma re harek hak oba nen, hat he we horok yogondagat meneba nen he, mondok eilmo weakhogo hilingiti lagen.

⁴⁸ Tuhan Lego Mondok welagarek mene a'nogo nen ikhi logolik, An hineisena Allah neluk mondok welagirek mene a'nogo nenuba hilingi'mo re, hat hagailak Sodom inom, aren mene desa-desa werek omanogo inomen he, haren inom, hat mene desa-desa omanogo inomen weak mondok hokho pokhorogo hilingiti lagep andem hakhogo hilingiri'lagwi lek.

⁴⁹ Sodom inom awi sili desa-desa andoma inom he inangge nenggarek mene foukhogo fetaluk andi nen he winik wonok ikhi logolik inebe fano liokhogo mondok werek. Oba nen, iren afuni inenggi lek mene inom, sebelek mene inom futfisili'lagwi lek.

⁵⁰ It he winik wonok hikhi logolik inungguloak haro agaikhasik, wene An nen nabit anggikhi lagi awene omanogo hilingiri'lagwi. Andiba re, An nen wolelenggenhogo fisasigi mene re, haren ogo heluat a'nogo.

^51-52 Eberogo nen Samaria re weak hokhorogo hilingiri'lago, oba nen he aren hilingiri'lago mene andem he haren mene haweak minggilogo fenakwe mene hak he hilingiri'lago lek. Hat hobabut he mondogat weak. Helime hat hegebi mene andoma hat hinom walhugunem he, it he weak hilingita lek mene hangge hilingik. Harenek he henggali asimbik wambo igin!” ikhe.

Sodom inom Samaria inom ambotkwe obali'mo wusugun isikhe wene

⁵³ Tuhan ane Yerusalem yagati logolik, ”Sodom inom, Samaria inom, inawi sili desa-desa iren mene andoma inom, An nen nekhengge enggi werek logouwageluk hilingisogo fagain. It a'nogo hilingfisambik enek he harogo An nen hobuk henggi werek hilinghobagagin.

⁵⁴ A'nogo hilingisigin andiba re, hat honggwarek henggali agik, hat haweak omanogo hagaila'lagen inuk hiugunem it inobabut fano hilingitu aple nen henggali agik, igin.

⁵⁵ It inom inawi desa-desa iren mene omanogo inom he, mondok inenggi werek mene asugun, andi re hat inom desa-desa haren mene inom ogore andi higithogo nek asugun.

⁵⁶ Haren winik wonok ikhi logolik, haweak werek mene weinam agi'le'ma,

⁵⁷ Sodom faget endo yatigin lek nogo? Yogondak he, harogo at higit hilingik welagen, hat he ap Edom mene inom, Filistin mene inom, it inunggulenu fenakwe hat horok-horokwe mene inom it inunggulenu fenakwe hat inabit habi'lagwi mene inomen endo yakhabi'lagwi o.

⁵⁸ Haren mondok weak mene inom, ina'meilo mene inom, hilingiti lagagin mene andoma onggore enggin-fenggin hoba asumo anggolo hagain. Iluk An Tuhan nen nane mondogat igi o,” ikhe.

Wene warek mondok-mondok logogin mene faget isikhe wene

⁵⁹ Tuhan Lego Mondok welagarek mene a'nogo nen ikhi logolik, ”Hat he, hombuk palhigin mene sugwiet figik, An ninom wene wat-wat agagu mene a'nogo taganet figik, isigin andiba re, An nen ogo haren hilingiti lagen andem higithogoat hilinghobagagin o.

⁶⁰ Oba nen he, An nen wene hat ninom watigi mene andi eberek logogin, hat hebe sougweba wene hat inom, an ninom watugu mene andi re mondok-mondok logogin.

⁶¹ An nen it hagaila'lak omanogo inambotkwe sugulogo hat hoba fisa wesumo re, haren hilingiti lagagin mene omanogo ebet haluk he henggali asigin. It andoma re, nit hat ninom wene warek welago mene andiba kwelabek lek oba nen he, it andi An nen hat hagainafuri mene hak hilingfisagain.

⁶² An nen hobuk wene ket mene hat ninom wasugun. Andiba re haren An nebe Tuhan welagirek a'nogo furogo helu asigin.

⁶³ An nen hobuk hat weak hilingiti lagen mene andoma sagalogo leget fisagain, oba nen haren enek he honggot asigin lek, yi wene ti wene faget hane u re henggali nek aga logogin. Iluk An Tuhan Lego Mondok welagirek mene a'nogo nen nane mondogat igi,” ikhe.