YEHEZKIEL 15 - Allah Wene Fano Wene Hupla Inane

E anggur eroba oba lirogo isikhe wene

¹ Tuhan ane an noba yaganeti logolik,

² ”Afuni wa'lagaikharek mene yi re, ninggi'nogo nen e anggur agayo andi re lego hak hilingik kwelek e ekhe amu agayo andoma re sebelek hak anggegen? Ninggi'nogo nen e enggama wiliferek mene andoma elo'lek hak hilingik kwelek e anggur ayago andi nek he esin hangge hilingik nogo?

³ E andi ebe re yi'nogo ti'nogo inendawimo anggagarek mene hilingisuogeluk he elok wanu hak nogo? Athe yi mene ti mene elema kwalogo fugu mene e andi meneba wokhigik hilingisu hak nogo?

⁴ We e endu nolhu mene nek he higit oba nen alek mene ekhe hilingisu re elo'lek. E wurep fena-fena endu nilik-nilik tulem asi kuluk endu enggen hilinglagunem at oba nen ambisangma hilingisu mene ekhe werek nogo a?

⁵ Hilingisu elok lego! Endu nolhi'lek engge nen ogore yi mene ti mene faget ekhe hilingisu lek hak. Nen, endumo oan nolhi'lek kwelek oba nen ogore afuni nen at oba mene waganogo ekhe hilingita mene werek fuk, Nen ebe mondogat nolfuluk endu nen nilik lagunem andoma re ebenagaigo!” iluk ikhe.

⁶ Andi faget he, Tuhan Lego Mondok welagarek mene a'nogo ane ikhi logolik, ”E anggur oak, yi agayo ti agayo anggele'ma nen wilik laga logolik endu nolharek hak, An nen it afuni Yerusalem werek mene andoma inoba re a'nogoat hilinginabigin o!

⁷ An nen it unggum wogisagain. It endumo nen heiselogo wulibugun oba nen ogore, hobuk endu nenat nolinabigin. Andiba re haren An nebe Tuhan welagirek mene a'nogo furogo helu asigin.

⁸ It An noba inendawinggen eberek were'lek werek andi faget he, kweang andi An nen lei pirimse'ma hilingisogo fagain. Iluk An Tuhan Lego Mondok welagirek mene a'nogo nane mondogat igi o,” ikhe.