YEHEZKIEL 10 - Allah Wene Fano Wene Hupla Inane

Tuhan Awi a'nogo herakfisaluk wulifikhe wene

¹ Andi nen an neilenggen liakhigi re helage palek mene ambolkwe it kerub inunggulmo andoma re, no ekhe takhta hu'lagungge helep nilan meneba pugunhogo hilingik mene hangge were'ma higi.

² Andi nen Allah ane ap asu linen su meneba laberek mene a'nogoba ikhi logolik, ”Hat hebe kerub a'ma kwimbik he eisok pirim etungge honggole'ma andoma nen endu enggen endebengge ekhe waganogo re, o kota andi bene telfol isilik lan o,” iluk ugunem higi. A'nogo yagatunem he ap a'nogo nen higithogo hilingitunem, an nen fut figi.

³ Andi nen at ebe kwi lagunem he kerub omanogo re Tuhan Awi wurik a'nogo abel selatan fikhit mendek were'ma, ohena misik ekhe mone'luk Tuhan Awi wurik a'nogo mondogat oba inom nen ambe senggelek hokho mene a'nogo elonggokwe inom hoporogo hilingik welaga.

⁴ Tuhan ebe were'ma enekhogo iluk he selek no kerub omanogoba nen ombak-bak yabelanget hugunem he o Tuhan Awi wuri'mo ebekhe kwilagukwe a'nogoba higilogo kwi laga-laga. A'nogo kwi lagunem he ambe senggelek hokho mene a'nogoba re selek mondok hilingik welaga.

⁵ Kerub andoma inogolabi lambun hugunem abolok he, Allah Omame Mondok Hokho mene a'nogo ane ugunem hangge o senggelek hokho mene a'nogo abel endakwe fikhiren holhi lagaikha.

⁶ Tuhan nen ap asu linen su meneba laberek mene a'nogoba endu enggen kerub a'ma eisok pirim etungge honggole'ma omanogo nen wanuageluk mimingitemo re, ap a'nogo hukhogo lagasik eisok roda omanogo misik ekhe era'lu mendek welaga.

⁷ A'nogo mendek were'ma re kerub omanogo mene misik ekhe enggi endu nonggwale'ma it inanggele'ma weregengge a'nogoba kwelakfikhesik, endu ambisang omanogo fena endebat ekhe waganogo ap su linen su mene laberek mene a'nogoba wogeti laga. A'nogo wogetemo re ap a'nogo nen wanhesik lagunem higi.

⁸ An nen neilenggen hugunemen he kerub andoma ebe lombok inogolabi a'makwe re ap inenggi hangge hilingik welaga.

^9-10 An ekhe inomat neilenggen hugunemen he it kerub andoma ogore inebe lombok ineisok pirim etu mene andoma re misiktek higik inabelma higit welaga. Roda ebe enggaminogo andem he ebe higitse'ma no permata eil mondok fano amulit yabelanget hugu mene hilingik welaga. Inebe lombok he roda ekhe amu mene tulem andoma tiagansek welaga.

¹¹ A'nogo hilingi'mo it kerub andoma inebe kwelugun enggaminogo meneba laga lagaikha. It inebe agaum eti'legengge koma fikhit logoin iluk inendawi anggugu higithogo laga lagaikha.

¹² It inebeba mondogat inambotma inom, inenggiba inom, inogolabiba inom, ineisok pirim hugungge andomaba inom he, ineilenggen mondogat weregenek hilingik welagaikha.

¹³ An holhugunemen he eisok pirim hugungge andoma enu re, ”Sogoi sielu,” ikhi laga higi.

¹⁴ Kerub inebe lombok he inelokhe enggaminogo agaum fagaumsek welagaikha. Inelokhe attak menere kerub elokhe mene hilingik welaga, pirenek mene re afuni inelokhe hilingik welaga, henaganek mene re singa elokhe hilingik welaga, nen enggaminogonek mene re sue rajawali elokhe hilingik welaga.

^15-17 Kerub andoma o attak he an nen i Kebar ima neilenggen isasigi mene omanogo. Nen kerub andoma hundik-hundik lebeti logolik enek were'ma re, inogolabi wurilogo re selekwe poma tarogo lagik, abolo'lek welagik ugunem, eisok pirim etu mene omanogore kerub omanogo nen sebelogo were'ma a'luk he inomat laga lagaikha.

¹⁸ A'nogo hilingitunem selek Tuhan ebe werek iluk enekhogo ombak-bak eri'lago mene a'nogo re kwe sou Tuhan Awi wuri'mo kwagarek mene a'nogoba nen herakfuluk, waganogo re kerub omanogo amboloba laga-laga.

¹⁹ An neilenggen hugunemen he it kerub andoma re inogolabi langhogo kweangma herakfuluk tarogo lagunem he, eisok pirim etu mene omanogo ogore inomat laga lagaikha. A'nogo lagunem he it inebe kwe sou o Tuhan Awi wuri'mo kwi lagaikharek mene abel timur fikhit mene a'nogoba andoma alok ilagunem higi, nen ombak-bak etungge a'nogo re it inamboloba andoma mondok welaga.

²⁰ A'nogo were'ma kerub andoma re o attak i Kebar aik oba nen Allah Israel mene a'ma were'ma an neilenggen hasigi mene omanogo iluk ebethigi.

²¹ Kerub andoma inebe lombok inelokhe re enggaminogo, inogolabi re pire wuthogo welaga, ekhere ap inenggi hangge inogolabi a'ma andoma welaga.

²² Kerub andoma inelokhe re an nen i Kebar aik oba nen neilenggen hasigi mene omanogo hangge hilingik welagaikha. Inebe lombok he inelokhe tukum enek laga lagaikha isigi.