YAKOBUS 5 - Allah Wene Fano Wene Hupla Inane

Ap kaindek inenggi werek mene komorinafikhe wene

¹ Hit ap kaindek mene nagaila'lak, hinesanggo fanorogo holini o! Hobuk Allah nen weagethinafunem yi enggin ti enggin hikhi logogun andi nen, li ago le ago logobagaigeluk yagahisigi andi hinesanggo holini o.

² Hinagarek yi mene ti mene hokhorogo andi fili agik, hinasu hokhorogoat andoma elugengge nen ninggik,

³ hit mene emas inom, perak inom, kulumage falogo fikhemo werek andi ri! Hinebe o wurep oba logoligat he, yi mene ti mene hinonggwarek faget fologo fakhaluk welagep andi nen, hobuk Allah nen wene hinoba fugunem, kulumage falek andi nenat, ”It inobabut ariginik,” iluk, enegat sele'mat fugunem yi mene ti mene endu nen ninggerek andi hak, hinebe kulumage falek andi nenat weagethinabigino.

⁴ Hinagoromi hineranenat yabu hilingisuageluk inayonggo fuluk athe, inenggi onggo wogisigi'lek munenikhi lagep andi nen, iren he, ”Ninenggi onggo wo'nisawem!” iluk inane hokhorogo ili'lagwi andi holini! A'nogo hilingiti lagepma it inane andi ninoe Enupogot omame hokho a'nogo esanggo holhesik werego.

⁵ Kweangma yoma hinagarek yi mene ti mene hineilmo werek logolik, hinendawimo hinagaiyekhogo hinalawi engginhogo helikhi lagep andi ri! Wam wasugun higit asi wagunem ebe hokho asuageluk sumburu hokhorogo tatarek andi hak, hit hinebe weagethinabigin mene horok asi wagu kwelegat he, hinonggwaregen hinebe takhikhi lagep andi ri!

⁶ It ekhe higithogo hilingiri'lagwi mene andi, iren onggo hit hinoati le'maat wene inoba fuluk inebe inoati lagep andi ri!

Hinafe morogo logolik samban ikhi logoino iluk yagaisasikhe wene

⁷ Andi nenat, nerugwi nagailak lak. Ninoe Enupogot ebe oan wagi'lek werek kwelek he, hinendawinggen puk agi'lek hinafe morogo nenangorogo logoino o. Afuni nen yabu wagane'ma sumburu awi yakfuluk welagaikharek andi hinendawimo futfeni! A'nogo awi yakfuluk werek kwelek meiso o mo lagagu kwelek ninggik, pugu kwelek ninggik, hobuk attak nunggu kwelek inendawimo pugagi'legat, ”Hobuk sumburu hokho agunem ebe hokho mene takhagain,” iluk inafe morogo nenangorogo welagaikharek andi hak,

⁸ ninoe Enupogot ebe horogat wesigin iluk hinendawinggen wurikhogo logolik, hinafe morogo nenangorogo logoino o.

⁹ Nerugwi nagaila'lak. A'nogo nenangorogo logolik he, Allah nen wene hinoba feinogo iluk, hit-hit ikhi logolik, ”Nagailak ari obabut hilingiri'logo nabire,” iluk inabok palhi'lek logoino o. At Allah nenat wene afuni inoba figik, kotik, igin mene kwe ambeba horok asi waga andi yet hani!

¹⁰ Nerugwi nagaila'lak. Endamat it ap Allah ane yagaisikhi lagaukwa mene omanogo nen he, ”Nineisena Enupogoren ikhe meneat yagahisikhi lago,” iluk yagaisugunem, it afuni ekhe nen inebe weagerinafu kwelegat, inendawinggen pugagi'lek inafe morogo welagaukwa mene andi inobabut wanino o!

¹¹ Weagerinafu kwelek, inafe morogo welagaukwa andi nen, niren inabok fano ikhi logolik, ”It fano agaikhasik inendawimo inagaiyek anggili'lagwi,” iluk ogorek andi. At Ayub endawinggen abolok igi'lek afe morogo welagaikheba, nineisena Enupogot obabut fano logolik hokhorogo endawirinaferek mene a'nogo nen wurep oba fanot fesikhe andi abok hinesanggo holhi lagebaro.

¹² Nerugwi nagaila'lak. Wene ekhe esin mene yi yagahisak. Allah nen wene hinoba feinogo iluk he, hiren pogoroba mene ekhe enu hombuk palhik, kweangma mene ekhe enu hombuk palhik, hunogoat mene ekhe enu hombuk palhik, hombuk palhi logogubo. We, ”Io,” uogoluk halok he, tekhogo ”Ioat” ugun. Nen, ”Lego,” uogoluk halok he, tekhogo ”Lego,” ugun.

¹³ Hit ekhe hinendawinggen weak welagep halok he, samban ikhi logoino o. Nen, hit ekhe hinendawimo hinagaiyek hikhi lagep halok he, wuni Allah awuni wati logoino o.

¹⁴ Hit ekhe hinoba ou aga halok he, samban igik, ninoe Enupogot enu hombuk palogo enggen amusu hinoba kweisalhik, uageluk it ap Allah againafuri kwelaginarek welagaikharek mene inayonggo fikhi logoino o.

¹⁵ Iren inendawinggen Allah oba himbiret fuluk, samban ugun andiba, ninoe Enupogoren hinoba ou mene andi se asuageluk fano hilinghinafik, hit ekhe weak hilingitep mene werek halok, sebelogo legetfisigik, igino.

¹⁶ A'nogo hilingisigin andi nen, hit ekhe hinoba ou mene se asubagaigen he, weak hilingitep mene hit-hit fageti logolik samban ikhi logoino o. It afuni Allah endawimo amolo anggikherek mene higithogo hilingitarek mene nen samban eberogoat ninghogo ugun andi, omame hokho were'ma re, Allah nen hilinghinabigin werego.

¹⁷ At Elia andi re, ebe nit hangge afuni mene nenat, meiso wagi'lek logouwageluk samban isikhemo re, mo lagagik pigik ugu kwelek 3 tahun welagaikhesik, hobuk tugi 6 mene inomat meiso kweangma pi wagi'lek mondok welagaikhe.

¹⁸ A'nogo were'ma, samban hobuk isikhemo re, meiso pi wagaikhemo yi mene ti mene hobuk kweangma nen fulelogo enggen itikhe andi.

¹⁹ Nerugwi nagaila'lak. Hinerugwi hinagaila'lak ekhe ebe wene herakfisaluk kwanirogo nong asi laga halok, hit ekhe nen hobuk ambotkwe Allah oba waluk wesugun andi faget,

²⁰ wene yi hinendawimo futfogoin. Sa nen weak hilingiti logolik, onggwaregen kwanirogo nong asi lagunem, at ekhe nen ambotkwe Allah oba waluk waga halok he, ebe wa'lasigin higit meneat telhik, weak hokhoat hilingite mene andi sebelogo legetfisigik igin o, iluk ikhemo werek andi nen he, hinendawimo futfikhi logoino o.