YAKOBUS 4 - Allah Wene Fano Wene Hupla Inane

”Afuni kweangma mene inobabut inetogat logolik hilingitarek mene andi, hinom hunitubo,” iluk yagaisasikhe wene

¹ Hiren wene palhik, yei yafik, ikhi lagep andi, ero kiba nen hilingiti lagep nogo? Weim inambotma hou wulibuogeluk, weim abok, ”Yiba lano, tiba lano,” iluk inebe inoatarek andi hak, hinendawimo nen naluk, ”Yi namolo, ti namolo,” anggikhi lagep andi nenat hilingiti lagep anggigi.

² Yi mene ti mene hinendawimo nen hinamolo anggikhi lagep mene andi ebe heligi'legen, afuni inebe inoati lagep andi. Hinendawimo nen it ekhe mene namolo anggikhi lagep meneat he, ebe heligi'legen wene palfulugen yei yafik, weim yafik, ikhi lagep andi. A'nogo, yi mene ti mene wanhi'lek hinelagaik welagep andi, Allah kino yagati lagep lek andi nen aro.

³ Nen, ekhe Allah kino yagati lagep meneat he, hinonggwarek faget enek hinendawimo nen nunggunem helouwogeluk kino u lek mene yagati lagep andi nen, wokhisili'logo lego.

⁴ Hemi nen inaguni ineil salharek andi hak, Allah eil salogo hilingiti lagep andi re? Afuni kweangma mene yoma inobabut inetogat logolik hilingiri'lagwi mene andi hinom hundik welagep halok, Allah hinom weim palek hanggeat welagep andi, hinonggot nogo? Hit ekhe nen afuni kweangma yoma mene inobabut inetogat logolik hilingiri'lagwi mene andi hinom hunisuogeluk ikhi lagep halok he, hinonggwaregen at Allah hinom weim kagalhi lagebo.

⁵ Endamat Allah ane ekhe lisu palogo fikhi logolik, mel isukwa: ”Hemi inendawirogo logolik, elele waganek mondok welagaikharek andi hak, Allah nen Areagun ninendawimo ninobagasikhemo ninebe endawirogo logolik, elele waganogo fetninarek welagarek,” iluk lisu palogo fesukwa andi, hit hinendawimo nen he, ”We, tulemat isukwa,” iluk anggikhi lageba? Tulemat isukwa lego.

⁶ A'nogo meneat he, Allah nen ninebe endawirogo logolik, hokhorogo lebe'nisikherek andi. A'nogo hilingitarek andi nen mel isukwa: ”Afuni inonggwaregen fogerakhugunem Allah nen inoasigeluk abit isikherek. Menere, inonggwarek inendawinggen seberogo logogun halok endawirinaferego,” iluk lisu palogo fesukwa.

⁷ Andi nen he, Allah awe a'ma hinendawinggen seberogo kuluk ane hologo logolik, Iblis ane andi sagalogo herakfisikhi logoino. Herakfisamo re, aren herakhinobagaluk heise wulibigin aro.

⁸ Hit Allah oba lomborogo lagep halok he, at ogo re, hinoba lomborogo wesigin aro. Hit weak hilingiti lagep mene andi, hinenggibene horogo hebisikhi logoino o. Hinendawinggen pire aksek mene andi, hinendawinggenma weak mene horogo lakfisikhi logoino o.

⁹ Hinendawimo weak a'luk, li le aga logoino o. A'nogo le aga logolik he, endo aga lagep mene andi, le agik, Nen, hinendawimo hinagaiyek hikhi lagep mene andi, hinendawimo weak a'luk welagik ikhi logoino o.

¹⁰ Ninoe Enupogot awe a'ma kuluk hinendawinggen sebelogo logogun halok he, aren legeisogo hinobagagin aro.

”Hit-hit hinerugwi hinagaila'lak hinom hinabok pal-pal ugun lego,” iluk yagaisasikhe wene

¹¹ Nerugwi nagaila'lak. Hit-hit hinabok pal-pal ikhi logogun fuk. Hinerugwi hinagaila'lak ekhe inabok palhik, wene inoba figik, egep halok he, wene Allah nen komotninafikhe wene a'nogoat weak iluk u hagat ikhi lagep andi. Nen, wene andi weak iluk ikhi lagep halok, wene andi hinesanggo hologo hilingiti lagep fuk. We, hiren he, ”Wene andi weak. Ebe fano re, yi'nogo u hak mene isikhemo,” iluk u hagat ikhi lagep andi.

¹² Menere, Allah alegaren wene ninoba figik, kotik, ikherego. Arenat fanotninafik, weagetninafik, igin elok meneat he, hit ekhe nen hinerugwi hinagaila'lak mene wene inoba fikhi lagep andi nenahalok. Hiren a'nogo hilingisu mene hilingiti lageba? Elo'lego.

”Ohealekwe hilinglasigin hinonggot logolik, fogerakhogoin lek,” iluk yagaisasikhe wene

¹³ Hit ekhe nen he, ”Yogondak he a? Ohealekwe he a. O ale'ma lambik he, tahun misigat hangge logolik, yi mene ti mene onggo wanhik, saburigik, ikhi logogin,” iluk ikhi lagep andi ri!

¹⁴ Ohealekwe nit wene ninoba yi'nogo hilinglasigin, iluk hinonggorat logolik ikhi lagep andi ri! Nit ninebe andi nena mene hangge welagorek nogo. O hena endebat welagaresigen weak-weagat lek agarek andi hak, ninebe a'nogo welagorek andi.

¹⁵ Hiren higit ugun he, mel anggigi: ”Ninoe Enupogot endawimo nen yi'nogo ti'nogo anggikhe halok he, ninebe ninelugat logolik, yi wene ti wene hilingiti logogun,” iluk ikhi logou meneat he,

¹⁶ hinonggwaregen fogerakhigik, agaugwerakhigik, ilik nikhi lagep andi ri! A'nogo fogerakhikhi lagep andi re, wesa aro.

¹⁷ Hit hinendawimo nen he, ”Higit hilingisugun he, yi'nogo,” iluk hinelu logoligat he, ebe hilingiti'lek halok he, hit weak hilingi'luk wene hinoba fakhikhi lagebo.