YAKOBUS 2 - Allah Wene Fano Wene Hupla Inane

”Afuni ekhe hinambotma fisigik, ekhe hinelokhoma fisigik, ikhi logogun lek,” iluk yagaisasikhe wene

¹ Nerugwi nagaila'lak. Hinendawinggen ninoe Enupogot Yesus Kristus fogeratarek mene a'nogo oba himbirik logolik, afuni inagap endakwe nek hineilenggen isaluk he, ekhe hinelokhoma fisigik, ekhe hinambotma fisigik, ikhi logogubo.

² Hinebe samban uogeluk andogorek were'ma, ap ekhe enggi segelet oba emas mene itik, asu fano mene labetik, ilugen hinoba kwi wagik, nen ap ekhe enggi lek mene su weak mene laberogo kwi wagik. Aga halok he,

³ hiren at asu fano ugu kwi wesigin mene andi yagati logolik, ”Noe. Hebe e tale'ma fanoma ya hu'lasime,” iluk yagatik, nen at enggi lek mene a'nogo yagati logolik he, ”Nagot. Hat andem mendek logogin a? Neisok figiba o hulumo yoma hu'lakha wesigin a,” iluk yagatik, ikhi lagep halok he,

⁴ hit hinobabut mondok weak hilingiti logolik he, hit-hit, ”At andi lego. Nen at andi sebelek,” iluk minggilogo fisikhi lagep andi.

⁵ Nerugwi nagaila'lak. Hinebe nendawi e. An wene igin yi hinesanggo holino. It afuni kweangma inenggi lek mene andi, Allah nenat wenaginafi logolik he, ”Inenggi werek logou hak, inendawinggen an noba eberogoat himbirik logouwak. Nen, it an nebe inendawi mene halok, o an nen nawe a'ma fisugunem logogun oba andoma eisewerek asugun iluk wene warisasigi mene andi, irat eisewerek asuak,” iluk wenaginafikhe.

⁶ A'nogo wenaginafikhe meneat he, hiren it inenggi lek mene halok hinendawimo sebel fisikhi lagep andi. Meneat he, sani nen hit hinebe weagethinafik, pemerintah mene nen hinanema wanuageluk inoba wokhinarek lagik, ili'lagwi nogo. It afuni inenggi hokhorogo werek mene andi nenat hilinghinabi'lagwi anggigi.

⁷ Nen, ninoe Enupogot enu fano lili'logo mene a'nogo enu hombuk palogo ebe eisewerek agagip mene andi, it inenggi werek mene andi nenat, at enu weaget fili'lagwi anggigi.

⁸ Menere, hiren higithogo hilingiti logogun mene yi. Allah nen komotninafi logolik wene esin he, mel isikhe: ”Hit hinonggwarek hinebe hinendawirogo welagep andi hak, it afuni ekhe hinom welagep mene andi hinendawirogo logoino o,” iluk isikhemo, lisu palhukwa mene werek andi higithogo hilingiti logogun halok, fano hilingiti logoguno.

⁹ A'nogo meneat he, hiren afuni inagap endakwe nek hineilenggen isaluk ekhe hinelokhoma fisigik, ekhe hinambotma fisigik, ikhi lagep andi nek he, weak hilingiti lagebo. Allah nen komotninafikhe wene a'nogo sebelogo hebisaluk weak hilingiti lagep iluk, ero andibaat wene hinoba werego.

¹⁰ Hit ekhe wene Allah nen komotninafikhe wene a'nogo mondogat fisogo logoligat he, misigat ekhe sagalogo hebisegep halok, ”Wene andi mondogat sagalogo hebisaga o,” iluk, eberogoat wene hinoba agama werego.

¹¹ Allah nen athe: ”Hemi pailak fakfisogoin lek,” iluk isikhe. Nen, ekhe re, ”Afuni inoasugun lek,” iluk, arenat isikhe. Halok he, hat ekhe nen, hemi pailak fakfisigi'lek logoligat he, afuni inebe inoaten halok he, Allah ane sagalogo hebisegen aro.

¹² Ninebe hele homago hak were'ma, Allah ane andibaat fikhalogo ninobagaikherek andi. Wene andibaat ninanema wanigino, iluk, hinane higithogo igik, hinenggi nen higithogo hilingitik, ikhi logoino o.

¹³ Hiren afuni hinendawirinafi'lek halok Allah nen he, endawit hinafi'lek wene hinoba fagain aro. Menere, afuni ekhe inendawirogo welagaikharek mene andi Allah nen inanema wanhi logolik wene inoba fagain lego.

”Inenggi nen hilingiti'lek logolik inendawinggen enek Allah oba himbirik logogun lek,” iluk yagaisasikhe wene

¹⁴ Nerugwi nagaila'lak. Hit ekhe nen, ”Nendawinggen Allahba himbirik welagi o,” iluk, ikhi logoligat he, henggiba nen afuni ekhe leberisigi'lek halok he, hane nek, ”Nendawinggen Allahba himbirik welagi,” iluk ikhi lagen andiba ekhe hilinglasigin nogo? We, tulemat ikhi lageno. Nen, hendawinggen enek a'nogo himbirik logoumo re, andiba elok telhabigin nogo? Elo'lego.

¹⁵ Hagailak hea, herei hea, Allah againafuri mene ekhe asu labeti logogin mene inom, amburu ninggi logogin mene inom, legen were'ma,

¹⁶ haren at ebe faget lebethigi'lek logoligat he, haneba nek, ”Nagailage. Hoba aganhanhogo halabut ninghogoat hendawimo nen hagaiyek hilik lano,” iluk, egen halok he, ekhe hilingisugun nogo? We, tulem aro.

¹⁷ Andi hak, nit ninenggiba nen leberisigi'lek logolik, ”Ninendawinggen Allah oba himbirik welago,” iluk, andi nek ogorek halok, warek hangge logolik we tulemat ogorego.

¹⁸ It ekhe nen a'nogo ugunem, mel ugun, ”Haren he, nendawinggen Allah oba himbirik welagi ikhi lagen andi. Nen, an nen he, nenggiba nen leberisikhi lagi andi. Halok he, hat henggi nen leberisigi'lek logolik, ninendawinggen enek Allahba himbirik welagi iluk ikhi lagen andi ebe ki. Inuk nean ta. An enek he, Nendawinggen Allahba himbirik welagi iluk, nenggiba nen leberisikhi lagi mene enegat werek andi, inuk heagain aro,” iluk yagaisagain andi.

¹⁹ Hat ekhe nen he, ”At Allah ebe misigat,” iluk eberogoat anggikhi lagen andi fano meneat he, Iblis agoromi inobabut weak mene inomen, andi hagat eberogoat anggikhi logolik, ebe inailo nen aleik wataregaro.

²⁰ Hat he kembu nen ikhi lagen andi ri! Allah eberogoat iluk andi mene nek anggikhi logolik, henggiba leberisigi'lek halok, we tulemat anggikhi lagen iluk enegat futfeinogen wene yi yagahesik.

²¹ Ninomba Abraham en onggwarek amlogo Ishak ebe waluk lagaikhesik he, helep oak wurogo fuluk Allah anggo wareti lagaukwa andi hak, waresigeluk isikhe andi nenat, at Allah nen he, ”Wene hoba mene korogo wokhigirik hambotkwe nemberek hunogo hobagagi o,” iluk yagatikhe anggigi.

²² At endawinggen Allah oba himbiret figik, enggiba nen hilingitik, emberek lambukhogoat hilingitikhe andi. Enggiba nen hilingitikhe andiba endawinggen Allah oba katokhogo himbiret fesikhe iluk, haren futfagain aro.

²³ A'nogo hilingitikhe andiba nen wene mel iluk lisu palogo fesukwa mene andi ebe agaikhe, ”Abraham endawinggen Allah oba himbiret fesikhemo re, at Allah nen he, Hat hobabut higithogo hilingiti lagen hak, hendawinggen noba himbiret fegenma, wene hoba mene korogo wokhigirik hambotkwe nemberek hunogo hobagagi andi aro,” iluk yagatikhemo lisu palogo fesukwa. Andi nen he, Allah nen, ”Abraham, An nare,” iluk isikhe andi.

²⁴ Andi hak he, Allah eberogoat iluk andi nek anggamo re, Allah nen he, ”Wene hoba mene korogo wokhigirik hambotkwe nemberek hunogo hobagagi,” iluk yagaisikherek lek higi. We, a'nogo anggikhi logolik, ninenggiba nen inomat hilingitunem andiba nek he, a'nogo yagaisikherek andi hani!

²⁵ Andi hagat he, he Rahap yanani nikhi lagaikhe mene andi nen, afuni Israel mene nen it ap ineil wanuageluk lakfisa wagaukwa mene wagaukwama hinagaisogo woginafikhesik he, hobuk kwe amukwe nen ogalogo wulakfisasikhe andi. A'nogo hilingitikhe andiba nen, Allah nen he, ”Wene hoba mene korogo wokhigirik hambotkwe nemberek hunogo hobagagi o,” iluk yagatikheat andi.

²⁶ Ninebe ninareagun wulifunem wa'lagorek andi hak, ninendawimo nen he, Allah eberogoat iluk anggikhi logoligat he, ninenggiba nen ekhe hilingiti'lek halok, warek hangge logolik, we tulemat anggikhi lago andi o.