WAHYU 4 - Allah Wene Fano Wene Hupla Inane

Pogoroba Allah fogeratunem eilenggen hasikhe wene

¹ A'nogo yaganetunem higirik oba nen ombo'ne re, nabikanggo ekhe yi'nogo yethigi. Pogoroba re, kwe ekhe hurik were'ma, at attak ane pinggong ane hokho meneba yaganetunem nesanggo holhi mene a'nogo nen hobuk mel yaganete: ”Wene ya logombigen hobuk hilinglasigin mene heilenggen yethanogeluk, yagahesigen he, lagai me o,” iluk yaganete.

² A'nogo yaganetu kwelek aremnogoat, Allah Areagun noba louk i wagama neilenggen yethigi re, pogoroba at kain welagarek obuluk oba were'ma yethigi. At ebe re obulu'mo aremnogo hurek welaga.

³ At andi elokhonggen he, helep amulit weak onggo hokho mene enu pailuri pandan inom, delima inom, hangge mene were'ma, uare elokhonggen kerengga palek hangge mene at kain welagarek obuluk oba a'nogo yiling-waling were'ma yethigi.

⁴ At kain welagarek oba obuluk tulem werek kwelek, it ekhe kain welagaikharek mene inobuluk 24 en were'ma, ap inaluendek inebe 24 enat inasu kut mene laberogo, nen, kware-kware emas meneba mindago mene pugethigik inobuluk ebene hurek welagaikha.

⁵ A'nogo were'ma, at kain welagarek obuluk andiba nen eilabut hobugalep yararethigik, unggunggu ane hokho pak ilugen ane lulu lagik, ugu kwelek, at kain welagarek obuluk a'nogo elokhoma re, esage ibilik eisok telek 7 nen welaga. Andi ebe re, Allah Areagun mondok higitsek mene ebe 7 nen a'nogo.

⁶ Nen, at kain welagarek obuluk a'nogo elokhoma re, ekhe inafumak i laut yenggelek eil hangge habul-habalenggeti laga. A'nogo were'ma, at kain welagarek oba obuluk tulem were'ma, abel fena-fena re, it Allah nen elalinafikhemo ineluk welagaikharek mene ekhe inebe enggaminogo mene ineilenggen inelokhe kwe inambotkwe werek mene nek welagaikha.

⁷ A'nogo welagaikha andi, ekhe re, mene olomene hangge enu singa andi hangge, nen, ekhe re, wam sapi ai waluk mene hangge, nen, ekhe re, elokhonggen afuni inelokhonggen hangge, nen ekhe re, sue loine tarogo lagunem yethagarek hangge, were'ma yethigi.

⁸ It andi inebe enggaminogo mene re, inebe lombok inogolabi falfaligen were'ma re, inomak abel endakwe inom, a'makwe inom, ineilenggen mondok hokhorogo welaga, were'ma re, inane kamo igi'lek, lingge hundik, hup hundik, Allah apne wanhi logolik he, ”Nineisena Tuhan Allah omame hokho mene, Attak tegelek welaga, Yogondak tegelek werek, Hobuk tegelegat logogin,” iluk fogeratu mondok welagaikha.

⁹ A'nogo ikhi logolik, hundik-handik at kain eluk mondok welagarek mene a'nogo ebe obuluk oba were'ma fogerati logolik, ”Nineisena kain welagendek mene harat hai wathafik, fogethafik, esinethafik, ikhi logogun o,” ugunem he,

¹⁰ it ap inaluendek inebe 24 omanogo nen, at kain eluk mondok welagarek mene a'nogo ineindep awi yagaisogo fogerati logolik, kware-kware inunggulmo ugu mene kirik-korokhogo, at kain welagarek obulu'mo a'nogo elokhoma yethikhi logolik he, yi'nogo ikhi lagaikha:

¹¹ ”Nineisena Allah Henupogot, Yi mene ti mene mondogat, Hat hendawimo anggasigindigen elalhigin, Elalogo fesiginmo werek andi, Harat kain homame hokho welagen andi nen, Fogethafik, agaugwethafik, ikhi logogun,” iluk apne waganogo fogerati lagaikha isigi.