WAHYU 19 - Allah Wene Fano Wene Hupla Inane

¹ A'nogo ugunem holhiri'mo nen, ombo'ne re, afuni hokhorogo pogoroba logolik inane hokhorogo mel ugunem holhi: ”Nineisena Allah homame hokho, Ninebe telninafendek, Harat fogethabugun, Fogethafi lago u hak, Haleluya ikhi lago.

² Haren wene inoba figik, kotik, Eberogoat enek egendek, Higithogo nek egendek a'nogo nen, Afuni o Babel mene inobabut, He yanani hilingirik nikherek mene hangge omanogo nen, Afuni o yi awi ti awi welagaikharek mene, Weak hilinginafarek andi nen, Wene inoba fegendik weagerinafen, Iren hamingmingengge mene inamep wulagaisogo inoatukwa mene faget, Inunggulmo inoaten andi nen, Fogethafi lago,” iluk wuni wati lagaikha.

³ ”A'nogo watasigen, hobuk ekhe wati logolik he: Allah nineisena, Fogethafi lago, u hak, Haleluya ikhi lago, Afuni Babel mene inesi hule, Palagi'lek lagagu mondok werek,” iluk ikhi lagaikha.

⁴ A'nogo ugu kwelek, it ap inaluendek inebe 24 en omanogo inom, it Allah nen elalinafikhemo ineluk welagaikharek mene inebe enggaminogo nen omanogo inom, inomen at Allah ebe kain welagarek obuluk oba were'ma awe a'ma kuluk, ineindep awi yagaisogo fogerati logolik mel ikhi lagaikha: ”Ebe asuak,” u hak, ”Amin,” igik, ”Fogethafi lago,” u hak, ”Haleluya,” igik, ikhi lagaikha.

Domba Eak agwe igeti logolik, seni hokho mene nogoin wene

⁵ Nen, Allah kain welagarek obuluk oba a'nogo nen mel ikhi lagaikha holhi: ”Hit Allah amingmingengge kaindek mene inom, afuni we mene inom, hinebe mondogat Allah hinailorogo welagep mene nen nineisena Allah fogerati logoino o,” iluk ikhi lagaikha holhi.

⁶ A'nogo ugunem nesanggo holhiri'mo nen ombo'ne re, afuni hokhorogo andogorek logolik, inane re, i hut hokho mene ane ikherek hangge inom, unggunggu ane hokho pak ilugen ane lulu lagarek hangge inom, mel ikhi lagaikha: ”Nineisena Allah fogethafi lago, u hak, Haleluya, ikhi lago. Hat homame mondok hokhoma, yi mene ti mene hilingitendek enek a'nogo nen, yogondak arat hawe a'ma ninobagegendik fetninarek welagen o.

⁷ A'nogo logolik, Domba Eak agwe ikhageluk awi arat wei ikhemo, at agwe a'nogo onggwaregen arat lombologo fakhikhemo andi nen he, ebe arat isigiluk logolik ninendawimo ninagaiyegen ninanggilukhogo at fogerati logouwogo.

⁸ Agwe a'nogo ikhageluk, asu lenan kut elokhonggen sobalek amulit fano mene laberek logouwageluk wogetemo higi. Su fano andi ebe re, afuni Allah againafuri inobabut higithogo hilingitarek mene andi aro,” iluk ikhi lagaikha.

⁹ A'nogo ugunem holhiri'mo nen, at malaikat a'nogo nen yi'nogo yaganete: ”It afuni Domba Eak agwe hak ikhikhi logolik, seni isago na wesuageluk inayonggo faga mene halok inendawimo inagaiyek asuago, iluk lisu palino o,” iluk yaganetesik, hobuk yaganeti logolik: ”Wene yi re, eberogoat Allah nen ikhe mene o,” iluk yaganete.

¹⁰ A'nogo yaganeti lagama, an nen, at malaikat a'nogo awe a'ma kuluk neindep awi yagaisogo fogerasigeluk igi meneat he, aren yaganeti logolik: ”A'nogo fuk. A'nogo fogetnabugun lego. An nebe re, hat, hagaila'lak inom, ninom higit. Wene Yesus nen yaganisasikhe mene yagaisilik nikharek mene andi, at Allah Areagun en inendawimo kagalogo yagaisugunem yagaisagarek andi, wene ero at Yesus nen yaganisasikhe andi aro. Halok he, at Allah andiat fogerasugun o,” iluk yaganete.

Ap ekhe wam kuda esi kut meneba hurek were'ma eilenggen yethasikhe wene

¹¹ Wene a'nogo yaganetesi'mo nen ombo'ne re, pogot healagunem wam enu kuda esi kut mene amboroba, ap ekhe enu re Hombunhogo igik. at ekhe re Eberogoat igik, agarek mene, hurek logolik, weim higithogo yafik, wene higithogo inoba figik, kotik, ilik nugunem yethigi o.

¹² Ap andi eilenggen he, endu amulok hangge, nen unggul oba re, kware-kware ebe hokho ap kaindek inenupogot ikfisagarek andi hangge ugu. Nen, at enu salek hangge ekhe hunogo mene at ebene lisu palek were'ma afuni mondogat inonggot, we, at onggwarek enek elu mene lisu palek welaga higi.

¹³ Nen, at andi asu uan mep labulik mene laberogo, nen, enu re Allah Wene ikhi lagaikha.

¹⁴ A'nogo ugunem, ap kaindek pogoroba mene mondogat hokhorogo inasu kain lenan su kut mene laberek, nen, inebe lombok inanggo kuda esi kut mene amboroba hurek logolik, at ombo'ne nugunem yerisigi.

¹⁵ At a'nogo nikhi logolik, afuni inunggulenu lombok mondogat mabenetfisagain mene, karok enggat hokho mene ambelema nen wulabi waga laga higi. A'nogo mabenetfisaluk sige tomuk posiemanggen omame hokho andi hak, at ane omameba afuni fakfisaluk, eisena Allah omame mondok hokho yi mene ti mene hilingisu hagenek a'nogo a'mage lagaluk, wene inoba fugunem anggur enggen amusu keraluogeluk obuluk oba sagalharek andi hak, at eisogen al perelinabigin mene higi.

¹⁶ Nen, at enu salek ekhe yi'nogo: ”Ap kaindek inenupogot mondogat inom, inogogwi kaindek mondogat inom, inoe kain Nenupogot he, an aro,” iluk asu uan mene a'nogoba inom, agoba inom, lisu palek were'ma higi o.

^17-18 A'nogo higiri'mo nen ombo'ne re, at malaikat ekhe moba mendek logolik, ane hokhorogo it yi rue ti rue mondogat pogot ebene higit tulem tarogo nugunem, mel yagaisikhi laga: ”Ap kaindek inenupogot inom, weim wenewule mene inom, inagoromi kabelek mene inom, wam kuda ebe inom, ap amboroba hurek nikharek mene inom, afuni inenuwerek mene inom, inenu lek mene inom, inamingmingengge mene inom, inale'ma welagaikharek mene inom, mondogat Allah nen inoatesik ineino hokhorogoat hinobagaikhe mene nobagaigen hinebe andogosi we'ni o,” iluk ugunem holhi.

¹⁹ A'nogo holhirik yethigi hak he, mene olomene hangge hokho a'nogo agoromi kaindek inenupogot kweangma mene inom, inagoromi tentara mene inom, inomen, at wam kuda amboroba hurek a'nogo inom, agoromi tentara mene inom, inom weim yabuogeluk inebe hokhorogo were'ma isigi.

²⁰ A'nogo were'ma, at ekhe attagat wagaikhesik, ”An Allah ane yagahisikhi lagi,” iluk eranenat mene olomene hangge a'nogo eilhanem elalin mene hilingiti lagaikhe a'nogo nen, lalinafunem eberogoat hangge, it afuni ekhe nen he, ”Nit at mene olomene hokho mene a'nogo agoromi,” iluk enegengge inoba wanhik, mene olomene hokho a'nogo ebe ilirengge hilingik a'nogoba inendawinggen himbiret figik, ikhi lagaikha meneat he, yogondak mene olomene a'nogo ebe inom, eranenat lalinafi laga mene a'nogo inom, emberek fakfisaluk, hele warogo i laut endu mene yenggele'ma hendali al hangge amben weak mene enu belerang inom amulok palfigi''lek nunggu mondok welagare'ma andoma inebe inelugengge pelakfisikhemo were'ma yerisigi.

²¹ A'nogo yerisikhi logolik, afuni it inagoromi mondogat herakfisaluk lagaikha mene, at wam kuda amboroba hurek nikhi laga a'nogo ambelema nen karok wulabi waga logolik inoati laga. A'nogo inebe warogo fisikhemo yi rue ti rue mondogat wagaikhasik, ineino inalabut ninghogo ninggi lagaikha isigi.