WAHYU 16 - Allah Wene Fano Wene Hupla Inane

Allah nen a'mage inoba fuluk weagerinafunem yethasikhe wene

¹ A'nogo yethigiri'mo nen, ombo'ne re, Allah awi wuri'mo a'nogo nen, at ane hokhorogo it malaikat inebe 7 nen omanogo mel yagaisugunem nesanggo holhi: ”An Allah na'mage i hak iwak ebe 7 ba hinago mene ari kweisalogo afuni kweangma mene inoba pelabi lani o,” iluk yagaisugunem holhi.

² Yagaisikhemo, it malaikat inebe 7 omanogo misik attak menere, Allah a'mage i hak hinago a'nogo mene ekhe kweisalogo afuni kweangma mene inoba pelabi wagunem he, it afuni fena ekhe mondogat inendawinggen wenggelogo mene olomene hokho a'nogo enu lisu palek a'nogo wanhik, inendawinggen ilirengge at ebe hangge hilingitarek a'nogo oba himbiret figik, aga mene halok, inebene pot mondok weak mene tugetunem yethigi.

³ A'nogo higiri'mo nen, ombo'ne re, malaikat pirenek mene ekhe Allah a'mage i hak hinago mene a'nogo kweisalogo i laut yenggelek oba pelafunem he, i elokhonggen afuni inoatunem inamep hangge hilinglaga logolik he, yi mene ti mene i laut yenggelek elonggoma eluk welagarek mene mondogat wa'larik laga-laga higi.

⁴ A'nogo higiri'mo nen, ombo'ne re, at malaikat henaganek mene ekhe nen Allah a'mage i hak hinago a'nogo mene ekhe kweisalogo i elesikwe inom, nen i ebe hokho asi wagarekwe inom oba pelafunem he, i mondogat elokhonggen mep aga laga higi.

⁵ A'nogo hilinglagunem he, at malaikat i eisewerek mene nen Allah mel yagate: ”Allah hebe attak welagagindik, yogondak hetok mondogat logolik, tegelek welagandek mene nen, afuni wene higithogoat inoba fegen o.

⁶ It ap andi nen, hat hagainafuri mene inom, hat hane yagaisagarek mene inom, inamep wulagaisogo inoatukwama re, mep noageluk wogisegen andi re, inobabut obaat higithogo wogisegen o, neisena,” iluk ikhi laga holhi.

⁷ A'nogo ikhesi'mo nen, ombo'ne re, Allah anggo warogo noletarek oba nen mel ugunem holhi: ”Allah neisena, Tuhan homame mondok hokho yi mene ti mene hilingisu higit enek logolik, wene inoba figik, kotik eberogoat egendek a'nogo nen, higithogo hilingiten o, neisena,” iluk ikhi laga holhi.

⁸ At malaikat enggaminogo nek mene nen he, Allah a'mage i hak hinago a'nogo mene ekhe moba kweisalogo fugunem he, mo aigen afuni inoba endu hangge ninggi logouwageluk, mo aik hokhorogo hilingisogo fikhemo, afuni inoba endu hangge ninggi laga yethigi.

⁹ A'nogo aigen endu hangge inoba hokhorogo nunggunem heinet wati logolik, Allah a'mage inoba fuluk weagerinabigin higithogoat weagerinafi laga meneat he, at ebe fogerasuogeluk weak hilingiti lagaikha mene herakfisaluk, inobabut hebelagi'lek logolik, iren he, ”Allah ebe ninggin la'lebe,” iluk, enu weageratoat welagaikha isigi.

¹⁰ At malaikat fuaben mene ekhe nen Allah a'mage i hak hinago a'nogo mene ekhe kweisalogo mene olomene hangge hokho mene a'nogo kain welagarek obuluk oba pelafunem he, o at kain logolik ferinarek welagarek oba mondogat mum aga laga. A'nogo mum agunem, it afuni heinet wati logolik, inameli inaigen himbiret fuluk, mel ikhi lagaikha: ”Ninoumo ou weak yoma nabire,” iluk,

¹¹ inobabut inetogat logolik weak hilingiti lagaikha mene herakfisaluk, inobabut hebelagi'lek logolik, iren he, ”Allah ebe ninggin la'lebe,” iluk Allah pogoroba mene enu weageratoat welagaikha isigi.

¹² A'nogo werek kwelek, at malaikat falfalik mene nen he Allah a'mage i hak hinago a'nogo mene ekhe kweisalogo, it ap inenupogot o mo lagai wagare'ma mene wesuageluk, i hokho enu Efrat oba pelafunem he, it wesugunkwe i ebe firitok ikhi laga.

¹³ A'nogo firitok ugunem en, ombo'ne re, kisu a'nogo inom, mene olomene hokho a'nogo inom, Allah ane yagaisikherek mene hangge eranen ikherek mene a'nogo inom, inambelema nen munggwarengge inobabut weak mene inebe henagan yagaise hangge mene wulibi waga laga.

¹⁴ Munggwarengge andi inebe re, Iblis agoromi mene afuni inoba louk i wagunem hilingisu lek mene elalin hilingitarek mene a'nogo aro. It a'nogo wulibi wagaikhasik he, Allah omame hokho yi mene ti mene hilingisu higit enek a'nogo awi wei igin andiba weim inom yabuogeluk, ap inenupogot yi awi ti awi andogerinabuogeluk, weim yonggo laga lagaikha isigi.

¹⁵ A'nogo lagaikhasi'mo nen, at Yesus nen mel yaganete: ”Hesanggo holin o. Afuni yogot wanuogeluk hinagaisogo wagaikharek andi hak, an a'nogoat wesigin o. A'nogo wagunem, afuni inalfulukwa were'ma inenggali agarek andi hak, hit a'nogoat hinenggali asinogo iluk hinasu weak-weak ikhouwogeluk tegelogo fuluk logogun halok he, Allah nen fanothinafunem hinendawimo hinagaiyek asugun o,” iluk yaganetunem holhi.

¹⁶ Nen, it Iblis agoromi inobabut weak mene nen, it ap kaindek omanogo, o it afuni Ibrani mene inaneba enu Harmagedon agarek oba andi, andogorogo fisugunem yerisigi.

¹⁷ A'nogo higiri'mo nen, ombo'ne re, at malaikat mene sabit mene a'nogo nen, Allah a'mage i hak hinago a'nogo mene ekhe kweisalogo pogot abel manggwe ohena obali'mo pelafunem he, Allah awi wuri'mo at kain welagarek obuluk oba nen ane hokhorogo mel ikhe: ”Arat wurep kobokhogo hilinglaga o,” iluk ikhe.

¹⁸ A'nogo ugunem he, eilabut hobugalep yararethigik, unggunggu ane pak ilugen, ane lulu lagik, lugul inailo mene afuni Allah nen elalinafikhe huli nen yogondak huli, lugul andi hangge ekhe langfanget higi'lek mene andiat langfanget higik, ikhi laga yethigi.

¹⁹ A'nogo ugunem he, o sili hokho a'nogo kweang pakhogo henagan minggilogo hilinglagik, afuni inunggulenu lombok Allah ebe inonggot mene inawi sili lombok mondogat sanik-sanokhogo wolelenggen tagalagik, ugunem, Allah nen he, ”An na'mage hokho anggur amusu hinago hak a'nogo, at o Babel hokho a'nogo wogosigin,” iluk abok yagatikhe mene andi endawimo ebetesik, wogeti laga higi.

²⁰ Nen, i kweang enggen kwe mondogat inom, tom mondogat inom, legagik,

²¹ pogoroba nen meiso sogonggen hokho mene ebe lombok enggin he, 50 kilo mene pi waga logolik, afuni inebe inoatik, ikhi laga. A'nogo inoatunem, iren ikhi logolik he, ”Meiso sogonggen weak ninoari'logo yi re, Allah ebe ninggin la'lep he,” iluk enu weageratoat welagaikha yerisigi.