WAHYU 15 - Allah Wene Fano Wene Hupla Inane

Allah a'mage wurep kobokhogo afuni inoba fagain mene malaikat inebe 7 nen wogisugunem yerisasikhe wene

¹ Neilenggen a'nogo yethigiri'mo nen, ombo'ne re, afuni nen futfouwageluk, elalin hokho inailo mene yi'nogo pogoroba weinam agunem yethigi. Allah a'mage wurep kobokhogo afuni inoba fembik weagerinabigin andi nen he, inenggi 7 ba weagerinabigin mene, malaikat inebe 7 nenat weinam agunem yerisigi.

² A'nogo higiri'mo nen, ombo'ne re, i laut elokhonggen muli inafumak hangge mene endu inom nanggelek-hanggelek yenggelek mene yethigi. A'nogo higirik yethigi hak he, afuni ekhe inendawinggen mene olo mene hangge a'nogo inom, ilirengge at ebe hangge hilingitarek a'nogo inom, inoba himbiret fuluk fogerinafi'legat, nen enu inenggi wenagaisogo lisu palek mene a'nogo wanhi'legat, hilingiti lagaikhaba inomame agaikhasik, pinggong gitar hangge Allah nen wogisikhemo inenggimo waluk, i laut yenggelek andi esanggokwe mendek were'ma yerisigi o.

³ A'nogo logolik, at Musa Allah amingmingengge a'nogo awuni inom, Domba Eak a'nogo awuni inom, emberek inawuni wati logolik mel ikhi lagaikha: ”Allah nineisena, Hat homame hokhoma re, Yi mene ti mene hilingisu hagenek, Elalin mene hokhorogo inailo mene nek hilingitendek. Hat yi afuni ti afuni ineisena Henupogot logolik, Higithogo nek hilinginafendek, Fano nek hilinginafendek, Nineisena.

⁴ Nineisena Henupogot hat halegat tegelek logolik, Afuni wene inoba figik, kotik, ikhi logolik, Afuni mondogat ineilhanem, Eberogoat mondok hilingitendek. Afuni inunggulenu lombok mondogat, Hawe a'ma kwi we'luk, Ineindep awi yagaisogo, Fogethafik, hai wathafik, ugunem, It afuni sani hagen hat inailo lek logolik, Fogethafi'lek kamo ugun, Lek,” iluk wuni wati lagaikha holhi.

⁵ A'nogo higiri'mo nen ombo'ne re, pogoroba Allah awi wuri'mo kwe hu'lagunem elonggoma re, at Allah ebe welagarek iluk, o su mene wurik a'nogo were'ma yethigi o.

⁶ A'nogo kwe hurik were'ma re, it malaikat inebe 7 nen inasu mene enu lenan elokhonggen amulit habul-habalengget hikherek mene laberek mene nen sing itarek hak, emas mene inamik oba laberek mene, Allah nen enggi 7 ba afuni weagerinabigin mene waluk wulibi wagaikha yerisigi.

⁷ A'nogo wulibi wagaikhama re, it Allah nen elalinafikhemo ineluk welagaikharek mene inebe enggaminogo omanogo ekhe iwak ebe 7 nen emas oba hilingik meneba Allah eluk mondok welagarek mene a'mage i hak hinago a'nogo, Allah nen it malaikat inebe 7 mene omanogo wogisikhi laga yethigi.

⁸ Wogisugunem, Allah awi wuri'mo Allah omame hokho fogeratarek mene a'nogo re endu so'le higit pete ikhemo, it malaikat inebe 7 omanogo nen afuni weagerinabigin mene a'nogo wurep kobokhogo weagerinafi'lek werek kwelek, afuni ekhe Allah awi wuri'mo andi kwikhi lagaikha isigi mondok lego.