WAHYU 10 - Allah Wene Fano Wene Hupla Inane

Malaikat ekhe lisu palek enggimo waluk wagunem hasikhe wene

^1-2 A'nogo isigiri'mo nen hobuk he, at malaikat omame hokho mene ekhe asu higit he ohena mene huliliphogo. Nen, unggulkwe re kware-kware uware higit pukhogo. Nen, elokhonggen he, mo hangge. Nen, eisok he, endu amulok mot lagaikherek hangge mene, lisu palek yinggilik mage mene fikhalegengge enggim waluk pogoroba nen pi wagasik, eisok ebekwe re, i laut yenggelek oba figik, nen eisok harekwe re, kweang oba figik, ikhi logolik,

³ mene olo mene hangge enu singa andi mene ane kwe ikherek andi hak ane hokhorogo ugunem, wene onggo re, unggunggu ebe 7 nen mene inane pakhogo yagati lagaikha.

⁴ Unggunggu ane a'nogo ugunem he, an lisu paligeluk igi meneat he, pogoroba nen mel yaganeta: ”Unggunggu ane 7 nen ugunem hesanggo holhen mene andi, lisu paligin lego. We, hendawimo kamo ino,” iluk yaganetama holhirik he, kamo igi.

⁵ A'nogo yaganetama kamo igirik, yethigi hak he, malaikat eisok fenakwe i laut yenggelek oba, nen, fenakwe kweang oba fikhesik mendek were'ma yethigi a'nogo enggi ebekwe pogoroba higit liakfuluk he,

⁶ Allah nen pogot ebe inom, oba welagarek mene inom, kweang ebe inom, oba welagarek mene inom, i laut yenggelek inom, elonggoma welagarek mene inom, mondogat elalhikhesik eluk mondok welagarek mene at enuba hombuk palhunem holhi: ”Allah nen hilingisigin andi yi sambul igik, ti sambul igik, aninurogo logogun lego.

⁷ We, malaikat inebe falfaligen inambinggong anet hagasik ekhe ambinggong anet hugunem he, at Allah nen wene endawimo hinago mene it ap amingmingengge ane yagaisikhi lagaukwa mene omanogo yagaisikhi logolik he, Hobuk an yi'nogo hilingisigin iluk wene warisasikhe hagat arat hilinglasigin o,” iluk hombuk palhe.

⁸ A'nogo hombuk palhesi'mo nen ombo'ne re, pogoroba nen ane yaganete mene a'nogo nen hobuk mel yaganete: ”Lisu palek yinggilik fikhalek mene a'nogo at, malaikat eisok fenakwe i laut yenggelek oba, nen fenakwe re, kweang oba fikhesik mendek werek a'nogo, enggimo fisogo werek a'li wani lan o,”

⁹ iluk yaganetemo, wo'nesuageluk kino oba lagunem he, aren mel yaganete: ”Wanimbik he, nano o. A'nogo nunggunem he, hambema kin amusu hangge enduk fano nagain meneat he, helonggoma pelafunem he, enduk ale weak hilinglasigin a'naga o,” iluk yaganete.

¹⁰ Yaganetemo, lisu mage mene palek andi enggimo nen wanhirik ebe nunggunem he, nambema kin amusu hangge enduk fano meneat he, nelonggoma pelafunem ale mondok weak hilinglagunem higi o.

¹¹ A'nogo higirik hobuk pogoroba nen wene mel yaganete: ”Haren wene Allah nen afuni inunggulenu lombok, inawi ero lombok, inane lombok, inogogwi kaindek inenupogot hokhorogoat inenu lombok hobuk hilinginabigin wene andi, yagaisikhi logoino o,” iluk yaganete.