ULANGAN 34 - Allah Wene Fano Wene Hupla Inane

At Musa ebe wa'lagaikhe wene

¹ A'nogo yagaisasikhesik, at Musa ebe o Moab leimo kweang liokse'ma andoma nen tom enu Nebo punu Piska ba o Yerikho nen i aik eliba mo liabi wagarek higit andoma lagasikhe. Lagasikhemo, nineisena Tuhan nen he, o longgo andoma mondogat eilenggen yetha wesuagaluk yagatikhemo, yi awi ti awi o Gilead yogondak afuni inunggulenu Dan mene inaiba kota weregen abel elikwe higit andoma inom,

² afuni inunggulenu Naftali mene inaiba mondogat inom, afuni inunggulenu Efraim mene inaiba inom, afuni inunggulenu Manasye mene inaiba inom, afuni inunggulenu Yehuda mene inaiba o mo ubuk ikherek higit i laut tulem yenggele'ma yatmaat elikwe andoma mene inom,

³ nen yikwe i ambut higit o Zoar en kota Yeriko e kurma hokhorogo were'ma andoma lagai wagaikharek oba lei mondok liok layokse'ma andoma inom, yetha wesuagaluk yagatikhe.

⁴ A'nogo yagatikhesik, at nineisena Tuhan nen Musa mel yagatikhe: ”Musa, o heilenggen yethegen oma re, An nen Abraham inom, Ishak inom, Yakub inom, yagaisikhi logolik, O hiren tagongge mene wogisagain o, iluk wene warisasigi a'nogo re, ebe yethegen oma o. O oma re, we, heilenggen enek yethanogen iluk yagaheti meneat he, hat hebe o a'lima lanogoluk yagahesigin lego,” iluk yagatikhe.

⁵ A'nogo yagatikhemo, At nineisen Tuhan nen amingmingengge Musa ebe wa'lagi'lek werek kwelek yagatikhe higit hogoat, at ebe o Moab andoma wa'lagaikhe.

⁶ A'nogo wa'lagaikhemo nineisena Tuhan nen at Musa ebe warek o Moab tonggwe ekhe, o Bet-Peor en elikwe andoma salhikhe. A'nogo salhikhe meneat he, warek salhikheba andoma huli yogondagen afuni nen tukhumhogo inonggot mondogat werek.

⁷ Musa ebe re umur 120 tahun oba were'ma wa'lagaikhe. Ebe omame lek agik, eilenggen mum agik, igi'le'ma wa'lagaikhe andi.

⁸ A'nogo wa'lagaikhemo, afuni Israel mene o Moab kweang mondok liok layokse'ma andoma andogorek logolik, fong watu inenggi 30 nen welagaukwa.

⁹ At Musa a'nogo wa'lagaikhemo, Tuhan nen Yosua ap Nun amlogo a'nogo Musa nen at obulu'mo menfesikhe andi nen he, yi mene ti mene oba heilarogo wogisagarek andi hak, endawinggen kagalek mondok logouwagaluk hilingisogo fesikhe. A'nogo fesikhemo, it afuni inunggulenu Israel mene at Yosua ane hologo logolik, nineisena Tuhan nen, Yi'nogo hilingiti logoino, ti'nogo hilingiti logoino, iluk at Musa yagatikhemo it yagaisasikhe mene andi higithogo hilingiti lagaukwa.

¹⁰ Afuni Israel mene, ap ekhe Allah ane yagaisagarek mene, at Musa nineisena Tuhan emberek weneane inolokheba lakfigik-wakfigik ikhi lagaukwa andi hangge ekhe welagaikharek mondok lek.

¹¹ Andi nen he, Tuhan nen Musa yagati logolik, Yi'nogo hilingisi lano, iluk yagatikhe higithogoat, it afuni Mesir mene inom, inoe kain Firaun inom, agoromi inom, futfouwagaluk, ineilhanem hilingisu'lek mene hilingitik, elalin mene hilingitik, ikhi lagaikhe andi hangge ekhe hilingitarek mondok legat.

¹² At Musa nen afuni Israel mene mondogat ineilhanem elalin mene hokhorogo hilingitik, inailo mene hilingitik, ikhi lagaikhe andi hak ekhe hilingitarek mondok legaro.