ULANGAN 2 - Allah Wene Fano Wene Hupla Inane

¹ A'nogo welagagusik Tuhan nen wene yaganetikhe higithogo ninelokhe hebekhogo sugulogo kwe Teluk Akaba unggut halogo lagarek kwe andoma nen o leimo hobuk wulifugu. Wulifugusik o Edom tonggwe andoma leil warik nikhi lagagu.

² A'nogo leil warik nugunem at Tuhan nen an yaganeti logolik, ”Mondogat hinenggi aninurogo o andoma leil wati lagep,

³ enggere o abel ambolkwe fikhit andoma lano,” isikhe.

⁴ A'nogo isikhemo an nen wene melalek yi'nogo hilingiti logogun ti'nogo hilingiti logogun iluk Tuhan nen hit yagahisoageluk mimingnafi logolik he, yi'nogo isikhe: we hinenggi welagi'legat o Edom kweang oba hit Esau nen tagomangge mene were'ma kuogeluk welagep. Nen hit a'nogo kugunem iren hit faget inailot hinabugun aplerek logou hak.

⁵ Oba nen he o Edom kwe andoma re, it Esau nen tagomangge faget wogisasikhemo re kweang andoma we endebengge iluk ogo hit mene ekhe wokhisagain lek enggere hiren it inebe inoasi kwi fuk.

⁶ Hiren we it inagai inom, inamburu inom enek he hunirogoin halok fano.

⁷ Hit hineisena Tuhan Allah nen hiren yi aple ti aple hilingitunem Aren aneba fanot hinobagagik, hit o lei mondok uankwe leil warik nugunem 40 tahun ariba fethinarek welagik, yi mene ti mene hit hinamolo mene wokhisigik hilinghinafi lagaikhe mene a'nogo hinendawimo ebethano.

⁸ Andi nen nit laga logolik, ebekwe o kota Elat kwe nen he, o Ezion-Geberi i hokho yenggelek mene enu Laut Mati werek fikhit lagarek mene a'nogo herakfuluk haningisogo re timur laut fikhit o Moab leimo lagagu.

⁹ Lagagusik he, Tuhan nen an yaganeti logolik, afuni Moab mene andoma re at Lot ambisangma mene hilingi'mo, hiren inane yingerinafik, inoasi kwigik hilinginabi fuk. O Ar fam andoma re it wogisasigimo kweang andem oba nen hit endebengge ekhe wokhisagain lek iluk yaganetikhemo yagahisasigi a'nogo, iluk yagaisasikhe.

¹⁰ O Ar andire attak it ap Emim inap welagaukwaba. Nen it inobabut inom inebe hilingik aple inom he it ap Enak inap hakhogo logolik he, it inunggulenu hokho inoakhuse yatek-patek inap welagaukwa.

¹¹ It afuni Enak inap hakhogo it faget Refaim inap ikhi lagaikhaba nen he, it Moab inaben he Emim inap iluk salinarek welagaukwa.

¹² Attak it Hori inap he o Edom andoma welagaukwa oba nen he it Esau ambisangma mene nen it kweang andi helouwogeluk logolik mugusogo wulakfisasukwasik leget fisasukwa. A'nogo at it afuni Israel inaben kweang Tuhan nen wogisasikheba a'nogo helouwogeluk it inaselei mene kweang andiba welagaukwa mene andoma mugusogo wulaginafukwa.

¹³ Andi nen at Tuhan nen yaganisasikhe higithogo i Zered palogo wulibi lagagu.

¹⁴ Andi hilinglagaikhe andi re, nit o Kades Barnea herakfisaluk wagagusik he 38 tahun hilingitugumo nen he, it inogogwi weim yabi lagaukwa mene omanogo at Tuhan nen isikhe mene higithogo mondogat wa'lagaukwa.

¹⁵ At Tuhan nen it inom hundik-hundik weim kagalek welagaukwasik ambisangma nen it mondogat leget fisasikhe.

^16-17 It mondogat welagaukwama, Tuhan nen nit yaganisikhi logolik,

¹⁸ ”Yogondak yi sambul hit o Moab kwe nen he o Ar lani o.

¹⁹ Laga logombik afuni Amon mene inaiba it Lot ambisangma mene inanggweang oba asi lambik halok, kweang it wogisasigba andoma mene endep engge iluk ogo hit ekhe wokhisaga lek enggere, hiren it inane yinginafik, inoatik u fuk.

²⁰ O andoma re it afuni Refaim inap it inunggulenu attak welagaikhe mene inaiba iluk inelu welagaikhe. Nen it afuni Amon mene nen he it afuni andoma re Zamzumim inap iluk inenu salek welagaukwa.

²¹ It afuni Enak inap hakhogo re it inoak yatek-patek, inebe hokhondek, inomame hokho mene logolik esa hokho mene welagaukwa oba nen he, At Tuhan nen it inebe leget fisasikhemo it afuni Amon mene nen kweang andi helasukwasik o andoma welagaukwa.

²² Andi higit he, it Esau ambisangma mene Edom inap andi tomkwe andoma welagaukwa mene re, it faget Tuhan nen it Hori inap leget fisasikhe. It Edom inap en kweang a'nogo mikhasukwasik andoma mondogat welagaukwa. Nen yogondak huli weregat.

²³ Nen kweang uanhogo i hokho mene Laut Tengah yenggelek era'lukwe liabek pelabek andi it afuni kereta inap he, i alonggen kwe andoma welagaukwa. Andoma logolik he iren afuni Awi inap inaggweang eisewerek omanogo mikhasukwasik he o Gaza nen abel a'ma fikhit huli mondok uanhogoat fesukwasik welagaukwa.

²⁴ Nit o Moab mondogat herakfisaluk wagagumo Tuhan nen yaganisikhi logolik, ’An nen hun Sihon Amori inap faget inoe raja o Hesybon halinafi logolik werek mene andi hit hineisena hilingi'mo wokhisagain enggere i Arnon palogo lambik he at andi ambit pin talogo kwimbik he aiba hu'lasi kwino.

²⁵ O yogondak yi huli nen yi afuni ti afuni inunggulenu lombok welagaikharek mene nen inailot hinafi logouwageluk hilinghinobagagin, a'nogo hinobagaumore afuni nen hit faget inesanggo holhaluk he inailo nen inoak leigeti logogun, iluk yaganisasikhe a'nogo,’ iluk yagaisasikhe.

It afuni Israel mene nen Raja Sihon omame leget fesukwa mene faget yagaisasikhe wene.

²⁶ ”A'nogo yagaisasikhesik ekhe yagaisikhi logolik, andi nen o Kedemot leimo nen an ap wenagaisogo hun Raja Sihon o Hesybon agun a'nogo ambit nit liolhu aple ningginik iluk yonggo lakfisikhi logolik,

²⁷ ’Ninoe hat haiba hanggweang kwe nen loageluk fano anggan. Nit laga logolik he kwe obaluak oba nen taganhogo lagi'lek we ebe kwe andiba pikhithogo logoin o.

²⁸ Hit hinamburu inom hinagai inom nit nunggu mene faget he onggo fogoin oba nen he we nit kweanggwe logoin mene faget enek kino ogo.

²⁹ Lambik nit nineisena Tuhan Allah nen ninanggweang wo'nisasikheba i Yordan palogo wulibi louwogen he, it Esau nen ambisangmangge o Edom werek inaben ogo, nen it Moab inap o Ar werek inaben ogo, it inanggweang kwe loageluk yaganisaga iluk lakfesigi a'nogo.

³⁰ A'nogo lakfesigiba nen he, Tuhan Allah nen ap a'nogo endawinggen omamet fesikhemo Raja Sihon mene a'nogo nen at aiba kweang kwe loak anggasikhe lek. Andiba nen nit nina'mage lagasikhe a'nogoba at omame leget fesugusik kweang he huli yogondak oba nen nit sebelek welago ari.

³¹ A'nogo nen at Tuhan nen an yaganeti logolik, ’Raja Sihon inom at anggweang inom he, hat wokheti laginggere eise asimbik sebelek logoino,’ iluk yaganetikhe.

³² A'nogo yaganetemo nen he, o kota Yahas horokhogo omanogo nen he, at Raja Sihon a'nogo agoromi tentara sikhe fisogo mene inom wagaukwasik nit ninom weim yabi wagaukwa.

³³ A'nogo wagaukwaba nen he nit nineisena Tuhan Allah nen at ebe nit ninenggiba wo'nisasikhemo nogo nen he, at ebe inom againafuri inom agoromi tentara sikhe fisogo mene inomame leget fisasugu.

³⁴ A'nogo sambul ogore o kota omanogo pin kwikhi logolik, o ebe lilibuk-lalabakhogo hilingfisikhi logolik he, afuni inebe mondogat hemi inom, ap inom, inagainafuri yenggerugwi mene inom, ekhe fisigi'lek mondogat inoatugu.

³⁵ It inanggo halili'lagwi mene re mondogat nit helasugusik he, inaiba kota inom, mondogat nit sebelasugu.

³⁶ Nit nineisena Tuhan Allah nen lebetninafu kwelek o Arnon tongge fem wure'ma o Aroer huli nen o kota tongge andi elonggoma mene mondogat inom he, o Giliad huli o kota andoma mondogat eise asi kwisugumo re, o kota misik ekhe leget-pak leget helep oba omamerogo waganek mene welagaikhe mondok lek.

³⁷ Oba nen he Tuhan Allah nen hit logoin lek, isikhe kwe o afuni Amon mene werek kwe inom i Yabok esanggo kwe inom, o kota-kota tomkwe andoma inom, o obalik we koma kwe Tuhan nen la fuk ikhe kwe andoma horokhogo asi lagagu lek a'nogo,” iluk yagaisasikhe.