ULANGAN 19 - Allah Wene Fano Wene Hupla Inane

Kota fena wesa awi inagap telagarek oba fesukwa mene a'nogo

¹ At Musa nen a'nogo yagaisasikhesik ekhe yagaisikhi logolik, ”At hineisena Tuhan Allah nen afuni inunggulenu inap andoma mondogat leget fisambik, it inaiba hit wokhisamo, inawi sili inom, inawi wurik inom, hit eise akhambik andoma femhogo logolik he,

^2-3 o kweang andoma re henagan minggilimbik he o kota sili lombogen afuni o sili misik mene ekhe inoa'luk o andoma laga logouwak hogore horokhogo la higit oba nek fogoin.

⁴ A'nogo fugunem ap ekhe inom aselei mene lek oba nen, we ferekhogo aremnogo ap watfuluk halok o sili misik andomaba ekhe ailo nen heise lambik at ebe eluk logogin.

^5-6 Walhigik he ap inebe pire mene ekhe enggama laluk e mutunemen are ekhe e musigin mene a'nogo eyaga enggen omboba nen henogo laga logolik are ekhe a'nogo wasumo ebe pinggi wa'lasigin. A'nogo hilingisugun mene andi re at are eranen lek oba nen we fetakhogo paligin mene andi re aren weak hilingisigin lek andi nen o along palogo fogoin oba andoma misik oba ekhe at agap telogo iluk laga logogin. O along pale'ma andi ambi we misigen helepma nen lagu aple yat agu nen hilingitunem, it warek fikhit mene fena omanogo ina'mage nen muluk laluk ap andi eranen wate lek oba nen ebe wasu hak.

⁷ Andi faget he an nen o kota henagan along pale'ma feino iluk yagahisigi andi.

⁸ At hineisena Tuhan Allah nen it hinombawi wene abok yagaisikhi logolik, hit hinawi sili wogole'ma wokhisagain iluk yagahisikhe higithogo wokhisugu halok, nen o kweang andi mondogat hit wokhisugu halok he,

⁹ o along pale'ma andi re ekhe inomat henagan minggilogo fagain. (O kweang andi re an nen wene yi'nogo hilingi'no ti'nogo hilingi'no iluk yogondak hit yagahisigi mene andi higithogo hilingitu halok inom, hit hineisena Tuhan Allah hinendawinggen hundik hilingiti logolik, At awene yagaisugu aple a'nogo higithogo hilingiti logolik logogun halok he, o kweang andi mondogat hit wokhisagain.)

¹⁰ Wene yagahisigi mene andi hilingisugun lek halok he ap weak hilingitu lek mene o kweang hineisena Tuhan Allah nen wokhisasikhe ba andi nen warek logogun enggere wene andi furogo hilingi'no,” iluk yagaisasikhe.

¹¹ Ekhe ikhi logolik he, ”Andiba nen he ap misik ekhe nen are aselei mene ekhe ebekhalem kagalfuluk anini nen eranenat hogo watfuluk o along palogo logogin oba andoma ap misik ekheba hina'lasi lagain iluk lagain halok,

¹² Ero andi mene halok he ap ogogwi o kota melalinafu mene nen ap a'nogo wole'luk, it warek pugu mene fikhiren ogogwi agoromi nen it mene a'nogo unggulmo wasuageluk wogisogoin.

¹³ At faget elagaigen iluk hinendiwira su fuk. Hit hinebe mondok fanorogo logobagaigen he hit Israel oba nen ap wa'ni mene welagep hanogo,” iluk yagaisasikhe.

Kweang huli tagan esi fuk iluk yagaisasikhe wene

¹⁴ A'nogo yagaisasikhesik ekhe ikhi logolik: ”Hit ambi o kweang hineisena Tuhan Allah nen wohisagain oba andoma mondogat asi lambik he attak at kweang huli fagain meneba it hinori fena fikhit werek mene inaggweang huli-hulimo andoma higili la fuk,” iluk yagaisasikhe.

Afuni ekhe weak hilingitunem inebe pire ineilenggen isaga mene nen ugu halok eberogoat anggano, iluk yagaisasikhe wene

¹⁵ At Musa nen a'nogo yagaisasikhesik, wene ekhe mel yagaisasikhe: ”Afuni ekhe weak hilingitunem at ekhe misigagun nen, Eberogoat neilenggen higi, iluk ugu halok, at weak hilingite mene andi wene oba fogoin mondok lego. We, inebe pire nen he a, ekhe inomen he a, eberogoat nineilenggen hogo, iluk ugu halok, eberogoat iluk elok anggano o.

¹⁶ Nen, it afuni ekhe nen ineranen wene, it ekhe wene inoba fogoin halok he,

¹⁷ it wene wanhakwe inom, inoba fagakwe inom, at ap Allah eisewerek mene inom, ap wene inoba figik, kotik, agarek mene inom, andi inomen wene inoba figik, kotik, uagaluk, inebe o nineisena Enupogoren samban ikhi logouwagaluk wenagaisogo fagain oba andoma Allah faget yabu hilingitunem inoba laga logoino o.

¹⁸ Inoba a'nogo lagunem he, it ap wene ero pilingetfuluk, wene inoba figik, kotik, agarek mene andi nen wene andi fanorogo pilingetfulugen, ap andi agaila'lak inunggulenu Israel misigat mene wene inoba le'ma ineranen wene inenu weagarogo fagama halok,

¹⁹ ap andi eranen wene at ikhe, ap ekhe andi wene oba fikhe higithogoat onggore, wene oba fikhi logoino o. Hit a'nogo fikhi logogun halok, weak andi hangge ekhe hilingiti logogun mondok lego.

²⁰ Wene a'nogo inoba fogoin andiba, afuni mondogat wene andi inesanggo holuk, inailo a'luk he, weak andi hangge ekhe hilingiti logogun mondok lego.

²¹ Afuni weak andi hangge hilingitunem, hinendawirinafi'lek wene inoba fikhi logoino. Wene inoba fikhi logogun andi ebe yi'nogo: inebe inoatu halok, inebeat inoatunogo. Ineilenggen hemelhu halok, ineilenggenat hemelhu nogo. Inaik langgulhu halok, inaigat langgulhu nogo. Inenggi palhu halok, inenggiat palhunogo. Nen, ineisok palhu halok, ineisogat palhunogo,” iluk yagaisasikhe.