ULANGAN 12 - Allah Wene Fano Wene Hupla Inane

Allah faget obalik misi'mo andogoti logogun mene faget yagaisasikhe wene

¹ A'nogo yagaisasikhesik, wene ekhe mel yagaisasikhe: ”Ninombalak nineisena Tuhan Allah nen o hit wokhisagain oba a'nogo mondok logolik, At ane hologo hilingiti logogun mene ebe yi:

² Hit o andoma arat kwi lagep halok he, afuni inunggulenu lombok o andoma welagaikharek mene nen hunogoat mene faget, Nineisena ebe yi aro, iluk fogeratarek oba obuluk tom uan meneba inom, punuba inom, e hik mene erokwe inom, mondogat andoma wolelenggen tagalogo weagetfisilik lano o.

³ A'nogo hilingiti logolik, iren hunogoat mene faget, Nineisena ebe yiat, iluk, hilingitarek mene andi hobuk o andoma a'nogo ekhe fogerati'lek logouwageluk anggo waretarek oba obalik andoma inom, helep mene menfuluk wesa iluk agarek mene andi inom wolelenggen tagalogo leget fisigik, inagaisa Asera ebe alik waganogo fagarek mene andi endu nolhik, tugwi kembu alik waganek mene andi meisa'lambukhogo lakfisigik ilik lano o.

⁴ Hiren nineisena Tuhan Allah fogerasuogeluk halok he. it afuni andi nen, hunogoat mene faget, Nineisena ebe yiat, iluk andi mene fogerati logolik hilingitarek andi hak hilingiti logogubo.

⁵ O nit afuni Israel mene hinunggulenu lombok logogun oba andoma nen, nineisena Tuhan Allah fogerati logouwogeluk, At eilhanem andogosi laga logogun oba, Aren obalik ekhe wenagaisogo fagain werego.

⁶ Obalik a'nogo wenagaisogo fikhe halok, hiren wam yi mene ti mene Allah faget noleti logogun mene inom, At faget fisaluk wareti logogun mene faget inom, yi mene ti mene hit mene hinenggi wenagaisogo 10 ba asi laga halok 9 nen hit faget fakhaluk ekhe misik 10 mene At faget fikhi logogun mene andi inom, hiren, Allah faget yi'nogo wogoti logogin iluk huli wenagaisogo fikhi logogun mene andi inom, hinendawinggen nenat At faget fisikhi logogun mene andi inom, hinanggo sapi, domba, kambing inom, eagwi attak tati logogin mene ekhe inom, o andoma mondok waluk laga logoino o.

⁷ Nen, At nineisena Tuhan Allah nen, hit hinebe fanothinafik, hinamburu hinangge yi mene ti mene fanotfigik, ugunem he, hiren yi mene ti mene hilingitunem fano nek aga logogin andi nen, hit hinebe hinagainafuri hinom misigat lambukhogo o andoma nineisena Tuhan eilhanem andogetfuluk, hinendawimo hinagaiyek hikhi logolik, hinaggo hinamburu yi mene ti mene mondogat andoma ninggi logoino o.

^8-9 Yogondak he, o niniesena Tuhan Allah nen wokhisugunem eise asimbik fano logogun oba andoma oan lagi'lek welagep andi nen he, yoma Allah faget hilingisuogeluk halok he, hinendawimo nen anggaluk hilingiti lagep andi hak, o andoma arat lambik, a'nogo hilingiti logoun mondok lego.

¹⁰ Hit i Yordan palogo wulibi lagunem, nineisena Tuhan Allah nen hit o andoma sebeli kwimbik fano logobagaigeluk lebethisagain o. Lebethisambik, hinaselei mene nen hinoasinogo iluk fethinarek were'ma, lioksek fano mondok logogun o.

¹¹ Nen, At nineisena Tuhan Allah nen hiren At fogerati logogun oba obalik ekhe wenagaisogo fagain andi. A'nogo wenagaisogo fikhe halok, an nen he, yi mene ti mene At wogosugun iluk yagahisigi mene andi mondogat andoma wogosi laga logoino. Andi ebe re: hinanggo warogo At noleti logogun mene faget igi andi inom, yi mene ti mene hit mene hinenggi wenagaisogo, 10 ba asi laga halok, 9 mene hit aga logolik misik 10 mene andi re At faget fisikhi logogun igi andi inom, hiren he, An nen Allah faget huli ti huli wogoti logogin iluk wenagaisogo fikhi logogun mene faget igi andi inom, mondogat waluk andoma laga logoino o.

¹² O hit logogun oba andoma, it afuni Lewi mene kweang ekhe eise asugun lek andi nen he, it inebe hit hinaiba kota lombok logogun mene inom, hit hinebe inom, hinagainafuri inom, hinamingmingengge inom, hinom lambukhogo nen nineisena Tuhan eilhanem hinendawimo hinagaiyek hikhi logoino o.

¹³ Hiren hinendawimo anggaluk obalik ale'ma heragaisogo fuluk, yi mene ti mene Allah faget fikhi logogubo.

¹⁴ We, nineisena Tuhan obalik andi hit hinunggulenu ekhe hinaiba logogun oba andoma wenagaisogo fogoin oba andiat fikhi logoino. An nen he, yi'nogo hilingiti logoino, iluk yagahisigi andi hak, obalik andomaat hiren wam yi mene ti mene Allah faget warogo noletik, yi mene ti mene ekhe hilingitik, ikhi logoino o.

¹⁵ A'nogo hilingiti logogun meneat he, hinanggo weat mene watfuluk nouwogeluk halok, o koma nen hit hinebe logogun oba nen lombok andoma nen warogo ninggi logoumo re, fano. A'nogo ninggi logolik nineisena Tuhan Allah nen wokhisagain higithogo at hokhorogo warogo nogoin halok fano aro. Paik enu kijang inom, rusa inom, yugunat ninggi lagep andi hakhogo afuni ekhe inenggi sabul horugu mene inom, it ekhe horigi'lek mene inom, mondogat wam wasugun mene andi yugunat ninggi logoguno.

¹⁶ A'nogo higit nogoin meneat he, amep enek he nogoin mondok lego. We, i higit kweangma kweisalogo lakfisikhi logoino.

¹⁷ Hit hinaiba logogun oba andoma nen he, gandum inom, anggur enggen palugun mene inom, minyak zaitun amusu keralugun mene inom, hinenggi wenagaisogo 10 ba asi lagu halok, 9 nen hinonggwarek faget fakhaluk, ekhe misigat Allah faget fisogoin mene andi fisigik, nen hinanggo sapi, kambing, domba, eak attak tasigin mene andi ekhe fisigik, nen, hiren he, An nen Allah faget yi huli ti huli wogoti logogin iluk wenagaisogo fogoin mene andi higithogoat fisigik, nen, hinendawinggen nenat yi mene ti mene at faget fisogoin mene andi fisigik, fisalugen hiren Allah faget fisogoin mene andi hinailokwe ninggi logogun mondok lego.

¹⁸ We, it hinebe inom, hinagainafuri inom, hinamingmingengge inom, afuni inunggulenu Lewi mene hinaiba kota lombok logogun mene inom, hinom lambukhogo nen he, wam, yi mene ti mene Allah faget fisikhi logogun mene andi, nineisena Tuhan Allah eilhanem obuluk aren wenagaisogo fagain oba andoma nen enek ninggi logogun o. Hiren a'nogo hilingiti logolik, hinenggi nen yi mene ti mene hilingisugun mene andi mondogat faget he, hinendawimo hinagaiyegeti logoino.

¹⁹ Hit o andoma lambik logolik he, afuni Lewi mene andi inoba ebeti'lek herakfisanogo iluk, hineil woginafi logoino.

²⁰ Nineisena Tuhan Allah nen he, O hit logogun oba andoma obalik hokhotfagain iluk wene wathisasikhe hagat hokhotfugunem logolik he, hit hinendawinggen nenat, wam andi mene namolo, iluk anggogoin higithogo ninggi logogun aro.

²¹ Yi mene ti mene nineisena Tuhan Allah faget fisikhi logogun oba obalik aren wenagaisogo fagain oba andi hit hinaiba horokhogo lek. We, yatmaat halok, hinanggo sapi, domba, kambing Aren wokhisagain mene andi hinaiba andomaat watfakhaluk palogo an nen yagahisigi hagat, hit hinendawinggen nen, an ti mene namolo, iluk anggogoin higithogoat ninggi logogun aro.

²² Paik enu kijang inom, rusa inom, hesangge ninggi lagep andi hak, afuni ekhe arat inenggi sabul horek mene inom, it ekhe horek lek mene inom, mondogat wam wasugun mene andi hesangge ninggi logogun o.

²³ A'nogo ninggi logogun meneat he, yi mene ti mene meben eluk welagarek andi nen, wam kurik mep elonggoma werek menere nogoin mondok lego. Ma re, mep labulik mene halok he, mep andi nen eluk welaga mene iluk, ninggi logogun lego.

²⁴ Wam amep andi ninggi logogun mondok lego, we, i higit kweangma keisalisikhi logogun o.

²⁵ An nen, yi'nogo hilingiti logoino, iluk yagahisigi andi, hiren hologo hilingiti logogun halok he, nineisena Tuhan endawimo agaiyek agunem he, hit hinebe inom, hiren tagongge mene inom, hinom fano mondok logogun o.

²⁶ Wam yi mene ti mene mondogat Allah faget fisogoin iluk abok arat yagasugun mene andi obalik Allah nen wenagaisogo fagain oba andomaat waluk laga logoino.

²⁷ Wam Allah faget fisaluk nolesugun mene inom, afuni nogoin mene inom, waluk laluk he, wam Allah faget warogo noleti logogun oba fisaluk, amep he, obalik andiba kweisalhunogo o.

²⁸ An nen, Hit yi'nogo hilingiti logoino, ti'nogo hilingiti logoino, iluk wene mondogat yagahisigi andi, hinesanggo hologo hilingiti logolik, fano mondok hilingiti logogun. A'nogo hilingiti logogun halok, nineisena Tuhan Allah nen hit hinebe oba liok ugunem he, hit hinebe inom, hiren tagongge mene inom, fano mondok logogun o,” iluk yagaisasikhe.

Tugwi kembu fogerati logogun mondok lek, iluk eberek logouwageluk yagaisasikhe wene

²⁹ A'nogo yagaisasikhesik, ekhe mel Yagaisasikhe: ”Nineisena Tuhan Allah nen afuni inunggulenu hunogoat mene ekhe o andoma welagaikharek mene andi legetfisugunem he, hit elok sebeli kwimbik logogun o.

³⁰ Allah nen afuni andi legetfisambik oba nen, afuni andi nen hunogoat mene faget, Nineisena ebe andiat iluk fogeratarek andi hak, hiren ekhe fogeratunem he hinebe paik hele fugunem ke'nok ikherek andi hak ke'nok egep hanogo re, andi mene fogerati logogubo. Hiren a'nogo fogerasuogeluk, iren ninggi'nogo fogerati lagaikha, iluk mel heinok wanhi logou fugaro.

³¹ It afuni andi nen, hunogoat mene faget, Nineisena ebe andi aro, iluk fogerati logolik, mondok weak Allah abit mene hilingiti logolik, ineisena andi mene faget yi mene ti mene warogo noletarek oba inonggwarek inagainafuri mene warogo noletaregat. Andi nen he, hiren nineisena Tuhan Allah fogerasuogeluk halok he, it inobabut waganogo andi hangge ekhe hilingiti logou fugo.

³² Wene an nen, yi'nogo hilingiti logoino, iluk mondogat yagahisigi andi, hiren wene hunogo mene ekhe oba labelhik, ekhe sebelogo pelafik, ugun mondok lego,” iluk yagaisasikhe.