ULANGAN 11 - Allah Wene Fano Wene Hupla Inane

Allah anggiluk werek mene faget yagaisasikhe wene

¹ A'nogo yagaisasikhesik, ekhe yagaisikhi logolik, ”Hineisena Tuhan Allah ebe hinendawinggen hundik logolik, At awene melalek yagaisikhe mene higithogo ane hologo hilingiti logoino.

² Hit hinagainafuri re hilinglaga laga mene faget it inonggotsek oba nen he, hirenek he At Tuhan nen hilingiti lagaikhe aple omanogo hikhi lagagip mo re, andiba Tuhan ebe yi iluk hinelu mene a'nogo wenggel hikhi logoino. Hineisena Tuhan Allah anggiluk werek mene inom, omame hokho werek mene inom, along hokho werek mene inom faget he, hit hineilenggen tomok hikhi lagagip.

³ Arenat elalin mene hokhorogo hilingiti logolik, at raja Mesir agun a'nogo inom afuni aren halinafi lagaikhe mene omanogo inoba inom hilingfesikhe menere hit hinebe lombok hineilenggen hasigip.

⁴ At Tuhan nen o Mesir inap sikhe fisogo logolik, weim yafarek inap inom, inanggo kuda nen kereta li'luk lagunem iren amboloba lagaluk laga lagaukwa mene inom mondok felelenghogo leget fisasikhe a'nogo hasigibo. It inebe hit mukhinarek wagunemen it inebe mondogat i laut Gelaga nen sebelinafikhe.

⁵ Hit hinebe o yoma asi wagi le'ma, o leimo andoma nen hinobaget hineisena Tuhan nen hilingite aple a'nogo hirogo hinelu aro.

⁶ At hineisena Tuhan nen Eliap unggulenu Ruben mene amlogomi Datan inom Abiram inom inoba hilingfisasikhe aple a'nogo ebet hano. Hit hinebe mondok hineil werek kwelek kweang kagalik wagaikhesik it aremnogo inogogwi inagainafuri inom, inawi wurik inom, it inamingmingge inom, inanggo inom, kweang elekwe pilisasikhe.

⁷ We hit hineil tomok At Tuhan nen alonghogo hilingiti lagaikhe aple a'nogo hikhi lagagip,” iluk yagaisasikhe.

Afuni nane hologo hilingiti logogun mene fanorinafik, nane sagalogo hilingitu mene homan fisigik ikhi logogin iluk yagaisasikhe wene

⁸ A'nogo yagaisasikhesik, ekhe yagaisikhi logolik, ”Hiren ambi wene melalek An nen yogondak yagahisigi mene yi holfuluk hilingiti logogun halok he hit i palogo o horok yogondak ya helogoin iluk hilingiti lagep mene andi, sebeli kugun.

⁹ Nen hit hinebe hineluk uanhogo o kweang mondok muli fanore'ma at Tuhan nen hit inom, hiren tagomangge mene inom, wokhisagain iluk abok yagahisasikheba andoma logogun.

¹⁰ O Kweang hit logogun oba andoma re attak welagagip oba o Mesir kweang omanogo hakhogo hilingik fuk. Andoma nen he hit hineabumo awi yakfuluk he hinenggi omamerogo i halogo kwelafi lagagip.

¹¹ Oba nen he o hit kwi logoin oba andoma re, Tom weregat Tonggo weregat hilingi'more, kweang he meiso nen minet fikhi logogin.

¹² At hineisena Tuhan Allah nen o andoma halhik, kagalek welagik ugu werek kwelek enek yi tahun ti tahun logogin.

¹³ Ariginikmo re, wene melalek an nen yogondak yagahisikhi lagi mene andi re hologo nek hilingiti logoino. Hineisena Tuhan Allah oba nek hinendawinggen hundik hilingiti logolik, Arenek hinebe hineluk mondogaren apne wanhi logogun.

¹⁴ Hiren a'nogo hilingiti logogun halok he, at hineisena Tuhan nen meisoba hit enggen mondogat palhunem inom, awi ket yatunem inom, hinanggweang oba pelakhisa waga logogin. A'nogo hilinghinafunem, hit hinebe faget gandum inom, anggur inom, e zaitun amusu inom, nen hinanggo engga ninggerek mene faget inom, higithogo nek hilingik logogin.

¹⁵ Yi mene ti mene hiren nunggu mene re hinendawimo nen anggogoin mene higithogo nek were'ma helikhi logogun.

¹⁶ Hiren amu mene faget allah ap-ap hilingfuluk apne wanhi lagep mene andiba murok laga logolik obaget hilingisi laga lagep halok, Tuhan hinom eil uanhogo logogun andi re elo'lek.

¹⁷ Hiren wene melalek andi sagalogo fogoin halok he, At hineisena Tuhan nen a'mage hit hinoba fembik, hit hinobaget meiso pelabi wesigin lek halok, hinanggweang mondogat kelokhogo haro aga logogin. A'nogo hilinglasigin andiba yi mene ti mene yago mene enggen isu lek hak hilinglaga logogin. A'nogo hilingitu were'ma lingge eil misik oba nek hit kweang mondok muli fano mene At Tuhan nen wokhisikheba omanogo nen hinebe wa'lasugun.

¹⁸ Wene melalek andi re futfuluk eberek logoino. Senggan pugetarek hak hinenggiba pugetik, hinelhaba puget figik ino.

¹⁹ Hit hinagainafuri inoba oloba nen inom, endakwe nen inom, set warikhi logolik inom, yabu hilingiti logolik inom, tindel isigik, yagaisigik ikhi logoino.

²⁰ Hit hinaiba solombonma inom, leget waganek mene kwe kuguba inom palogo feino.

²¹ Hiren a'nogo hilingiti logogun halok he, o kweang At hineisena Tuhan Allah nen wokhisagain iluk it hinombawi inoba abok wene wogisasikheba andoma hit hinebe inom hinagainafuri inom hineluk uanhogo ekhe inom logogun. Pogot kweang amboloba poyi lek agi'lek werek kwelek hit mondogat hineluk a'nogo logogun.

²² An nen hit hinoba wene melalek yagahisikhi lagi mene andi hiren hologo nek hilingiti logoino. Hiren hineisena Tuhan Allahba hinendawi hundik mondok hilingiti logolik, Aren yi'nogo hilingi'no iluk yagahisikherek mene andi hilingitik, At oba tiphogo welagik hilingiti logoino.

²³ Hiren a'nogo hilingiti logogun halok At hineisena Tuhan nen it inunggulenu inap mondogat omanogo hit hineilhanem mugusogo wulaginafunem, hit hinebe it afuni inunggulenu hit hak mene re lek, we ap inebe mondok hokho mene re inomame werek inap andi inanggweang oba logogun.

²⁴ O yi kwe ti kwe hiren hineisok sebelik logoin kwe andoma re hit eisewerek asugun. Nen, hit hinawi logogun oba huli-hulire o lei eil a'ma fikhit yatma andoma nen he, eil ambolkwe utara fikhit he Tom Libanon huliba, nen mo liabi wagarek fikhit he, i Efrat ima andoma nen fikhit o mo ubuk ikherek fikhit he, i hokho mene yenggelek mene enu Laut Tengah werek huli andoma logogun.

²⁵ O sili andoma abirenggeba re At hineisena Tuhan Allah nen a'nogo hilingisigin iluk abok yagahisikhe higithogo inailo aga logouwageluk youk kwelakfoumo ap misigen ogo ekhe inelokhe palu elo'lek logogin.

²⁶ Yogondak yi sambulat hiren enek nit ninoba fanot ninobagakhi logogin igik, nit ninoba homan ugu logogun igik, sikhiphogo hinawene palani.

²⁷ Hiren ambi an nen wene melalek yogondak yagahisikhi lagi mene yi holfuluk hilingiti logogun halok he hinoba fanothinafi i logogin.

²⁸ Oba nen he, At hineisena Tuhan Allah nen wene melalek yagahisikhe mene a'nogo sagalogo herakfuluk, hinendawinggen sambanhogo amu mene faget allah ap-ap hilingfuluk apne wanharek mene andi attak hiren apne ekhe wanhi lagagip lek mene omanogo ba murok lagep halok he, hinoba homan ugu logogino.

²⁹ Hit he neisena Tuhan Allah nen hinebe mondogat o kweang logogun oba omanogo wokhinarek kwi lagu halok he, fanoabet hinobagauwageluk andi re Tom Gerizim oba nen hinaneba ino, nen homan andi re Tom Ebal oba nen ino.

³⁰ (Tom pire andem he i Yordan ima nen mo ubuk ikherek fikhit it afuni o Kanaan mene i Yordan tonggoma were'ma nen o kota Gilgal en horokhogo o More e wesagayo wilibi'mo aremnogoba nen he horokhogo abel mo ubuk ikherek fikhit werek.)

³¹ We horok yogondak arem kweang At hineisena Tuhan Allah nen wokhisasikheba omanogo sebeli kuluk logobagaigen i Yordan palogo hela kuogeluk welagep yi.

³² Enggere an nen wene melalek yogondak yagahisikhi lagi mene yire mondogat hologo nek hilingiti logoino,” iluk yagaisasikhe.