ULANGAN 10 - Allah Wene Fano Wene Hupla Inane

At Musa wene melalek 10 nen a'nogo hobuk enggi pirenek mene wogetikhe wene

¹ A'nogo yagaisasikhesik ekhe mel yagaisasikhe: ”An a'nogo samban nineisena Tuhan yagatigimo, hobuk Aren he mel yaganetikhe: Musa, helep sabia pire lisu palharek meneba. attak palhigin a'nogo hangge ekhe pali pin o. Palhen halok he, awingga peti e mene ekhe hilingisogo waluk noba tom punu ebeba lagai we'no o.

² Helep andem oba re, helep attak mene ebene lisu palhigi mene haren sirik-serekhogo lakfisegen a'nogo higithogo lisu hobuk An nen paligin o. A'nogo palhi halok he, haren helep andem he, peti andi elema kwalogo feino o, iluk yaganetikhe andi.

³ A'nogo yaganetikhemo re, an pi wagagisik peti e akasia mene hilingisogo figik, helep sabia mene pire attak palhigi hak palogo figik, isigisik he, waluk tom oba lagasigi.

⁴ A'nogo waluk lagasigimo, hit hinebe tom andi a'ma andogorek werek kwelek, o andi sambul At niniesena Tuhan ebe endu anggele'ma logolik, yi'nogo hilingiti logoino, ti'nogo hilingiti logoino, iluk wene ebe 10 nen komotninafikhe wene andi lisu attak palhikhe hak palhikhesik he, helep andi an wo'netikhemo waluk tom oba nen nambotkwe pi wagagi andi.

⁵ A'nogo waluk pi wagagisik, neisena Tuhan nen, yi'nogo hilingi'no, iluk yaganetikhe hagat, helep sabia pire andi peti hilingisogo fesigi mene andi elema kwalogo fesigi. A'nogo fesigi andi huli nen pikhit o yogondak huli andomaat welagarek andi,” iluk yagaisasikhe.

⁶ (Hobuk it afuni Israel mene a'nogo afuni Yaakan mene inagai mogo habuli'mo nen he, afuni Mosera mene inaiba wagaukwa. Wagaukwama nen he, Harun ebe wa'lagaikhemo ebe warek salhukwasik, at amlogo Eleazar eisena obulu'mo ebe Allah eisewerek logouwagaluk menfesukwa andi.

⁷ A'nogo menfesukwasik, o andoma nen o Gudgod wagaukwasigen pikhit o Yotbata inagai hokhorogo were'ma andoma wagaukwa.

⁸ Wagaukwama, At nineisena Tuhan tom andiba nen afuni inunggulenu Lewi mene At faget hilingitik, Peti Wene Warogo Aren wo'ninafikhe mene elema kwalek andi waluk lagik, Aren afuni ekhe fanorinafi logouwagaluk enu hombuk palogo yagaisigik, ikhi logouwageluk inebe At onggwarek faget hilingitikhe andi. A'nogo hilingitikhemo, it yabu andi mene hilingitu mondok huli yogondak hilingitoat welagaikharek.

⁹ At nineisena Tuhan Allah nen afuni inunggulenu Lewi mene yagaisikhi logolik he, ”Hit kweang wokhisamo eise asu hak he, An nebeat eise logoni o,” iluk yagaisasikhe hagat, it afuni inunggulenu Lewi mene andi inebe Allah eisewerek logolik, kweang it inunggulenu hunogoat mene eise aga lagaukwa andi hangge, it ekhe eise aga lagaukwa mondok lek andi.)

¹⁰ At Musa nen a'nogo yagaisasikhesik ekhe mel yagaisasikhe: ”An nenggi attak 40 hari nen tom oba welagagi hagat welagi andi. A'nogo were'ma, At Tuhan nen hobuk an nane esanggo holhikhesik, hit hinebe legethinabigin lego, iluk attak isikhe hagat isikhe andi.

¹¹ A'nogo isikhesik, an nen o nit ninombalak wogisagaluk wene warisasikheba andoma wokhinarek wesumo hit kwimbik eise asubagaigeluk nayonggo fesikhe andi o,” iluk yagaisasikhe.

An faget yi'nogo hilingiti logoino, iluk wene inoba fesikhe wene

¹² A'nogo yagaisasikhesik ekhe mel yagaisasikhe: ”Hit afuni Israel mene nerugwi nagaila'lak. Yogondak nineisena Tuhan nen he, Hiren yi'nogo hilingiti logoino, iluk yagahisili'logo mene andiat hilingiti logoino o. Nineisena Tuhan Allah agaugweratik, Aren, Yi'nogo hilingi'no, ti'nogo hilingi'no, iluk komotninabi'logo wene andi mondok higithogoat hiligitik ikhi logolik, hinebe hinendawinggen hinobabut misigat a'luk, nineisena Tuhan hinendawinggen mondok hundik logolik At faget hilingiti logoino o.

¹³ Nineisena Tuhan nen he, yi'nogo hilingiti logoino, ti'nogo hilingiti logoino, iluk komotninafikhe wene yogondak yagahisigi andi mondogat hit hinonggwarek fano asubagaigeluk hologo mondok hilingiti logoino o.

¹⁴ Pogot abel ambolkwe welagarek andi nineisena Tuhan Allah mene aro. Nen kweang ebe inom, yi mene ti mene oba welagarek mene mondogat inom, At meneat werek.

¹⁵ A'nogo meneat he, nineisena Tuhan nen nit ninombalak endawirinafikhe andi nek he, mondok hokho aro. A'nogo endawirinafikhe andi nen, afuni ninunggulenu nit mene it inunggulenu lombok hokhoat ekhe inanggele'ma nen kigilogo wena'ninafikhemo yogondak ninebe At againafuri wena'ninafikhe mene mondok welago andi.

¹⁶ Andi nen he, huli yogondagen, At ane hologo hilingiti'lek hinungguloak helep hangge hilingitubo. We, hinagainafuri ap halok inagap inenggalimo mene palinafi lagep andi hak, hinonggwarek hinendawinggen tegelogo At ane hologo hilingiti logoino o.

¹⁷ At nineisena Tuhan Allah re, afuni ekhe nen hunogoat mene faget, Nineisena ebe andi aro, iluk agarek mene mondogat inom, yi mene ti mene omame werek mene mondogat inom, elo'lek hangge werek kwelek, At enek he, Ebe Esin Lego Omame mondok Hokho welagarek. Andi nen he, At ane hologo higithogo hilingiti logogun o. At he, it ekhe inebikhit aga logolik, ekhe abit welagik, it inebikhit asuageluk onggo hinagaisogo wogetunem wanhik, ikherek mondok lego.

¹⁸ At he, yenggerugwi suarek mene inom, hemi sogwe mene inom, afuni ekhe nen weak hilinginafi'lek higithogo hilinginabuagaluk it inebikhit agarek. Andi nen, ap pok mene nit ninom welagorek mene andi endawi mondok logolik, inamburu nunggu mene inom, inasu laberugu mene inom, wogisikherek.

¹⁹ Andi hangge re, hit ogo re, afuni Mesir mene inaiba hinebe ap pogat welagagip andi nen he, afuni pok mene andi hinendawirogoat leberisikhi logoino o.

²⁰ Hiren he, nineisena Tuhan Allah agaugwerati logolik, At faget enek hilingiti logoino o. Hit hinebe At amu nek oba lombokhogo logolik, At enu nek hombuk palhi logoino o.

²¹ Nit nineisena re, at Allah amuat andi nen he At enek fogerati logoino o. Hiren futfouwageluk Aren elalin mene mondok hokhorogo hilingitik, inailo mene hilingitik, hilingitunem hit hineilenggen tomok hasigip andi.

²² Nit ninombalak o Mesir lagaukwa andi inebe endebat 70 nek lagaukwa meneat he, nineisena Tuhan Allah nen ninebe hokhorogo asuageluk hilingninafikhemo re, ninebe yogondak huli nen hesagal pogoroba welagarek andi hangge mondok hokho-pokhorogo hilinglagosik welago andi o,” iluk yagaisasikhe.