RUT 3 - Allah Wene Fano Wene Hupla Inane

Rut en Boas oba ninom logouwogo, iluk yagasi lagaikhe wene

¹ A'nogo welagaukwasik, at he Naomi nen Rut mel yagatikhe: ”An nen he, hat hagun helambik fanorogo logobagaigen iluk hagun ekhe herakhesigin o.

² Ap Boas hemi hinom eabumo enggen palhi lagep a'nogo, ap nit mene lek nogo? Nit mene aro. Ma re, at ebe o yogondak hubanggo re, gandum enggen o wuri'mo lologo pelafarek oba andoma lagain o.

³ Andi nen he, hat hebe kume fanorogo wasimbik amusu amben fano mene hebene watfembik he, hasu fano mene wendeberogo labesin. Labesimbik he, at Boas gandum enggen lologo pelafarek oba andoma ware'ma lambik logoino o. Lambik were'ma, at Boas hat hebe weinam were'ma elu asinogo nen he, at sumburu inom, i inom, nunggu kwelek nenangot hikhi logolik hebe hinagaiso logoino o.

⁴ A'nogo logolik, at Boas nogo igeluk kugunem heilenggen fanorogo wanino o. At lambik nogo obabe lek agu halok, andem horokhogo asi laluk aselimut lek hambik, eisok kwe higit horokhogo era'lu andemat weing lasi kwino. A'nogo hilingiten halok enek he, aren, yi'nogo hilingisin iluk yagahesigin a'naga,” iluk yagatikhe.

⁵ A'nogo yagatikhemo, at Rut en he, ”I o, nagaisa. An nen he, haren yaganeten higithogoat mondogat hilingisigin o,” iluk yagatikhe.

⁶ A'nogo yagatikhesik, afuni gandum enggen omboba nen lologo pelafarek oba omanogo lagaikhesik he, at oan Naomi nen yagatikhe mene omanogo mondok higithogo hilingitikhe.

⁷ At Boas sumburu inom, i inom, alabut ninghogo nasikhesik, oba hambuk isikhemo re, gandum enggen palogo fesukwaba era'lu horokhogo andoma nogo i kwisikhe. Nogo a'nogo i kwisikhemo, at Rut a'nogo ling long kwisikhesik he, Boas aselimut salek mene lekhasikhesik he, eiso'ma horokhogo weinglasi kwisikhe.

⁸ A'nogo wengik were'ma, at Boas o hup enggen tulem eluk agaikhesik, abel enden lasigin ha'ma re, eisok higithogo aremnogo re he mene wengik were'ma hasikhesik, a'manggen lagaikhe.

⁹ A'manggen a'nogo lagaikhesik, aren he, ”Hat sa,” iluk heinok wokhasikhemo, at Rut en he, ”An Rut o, neisena. Hat he, ap nit mene welagenma re, an nebe faget haren heilenggen futnobagambik an hat nemberek logouwogo,” iluk yagatikhe.

¹⁰ A'nogo yagatikhemo, at Boas en he, mel yagatikhe: ”Na'logo e, nineisena Tuhan nen fanothafi logouwago. Hat hobabut fano nen, afuni an mene hendawirogo logolik, hoan Naomi lebethikhi lagen mene andi we endebat hak. Oba nen he, yogondak an hendawit nafen mene yi re mondok hokho mene o. Haren he, haguni ap inenggi werek mene inom inenggi lek mene inom, alage mene halok inom heraginabu mene at he, haren a'nogo hilingiten lek andi.

¹¹ Andi nen he, Rut na'logo e. Ninggi'nogo hilingisigin he, iluk hendawi fitun o. Hat hobabut he, fano mondok hilingiti lagen andi nen, afuni o kota yoma mene mondogat inelu o. Ma re, haren yaganeten andi an nen hane hologo mondogat hilingisigin o.

¹² An nen hat hebe heluk faget halhobagagu aple andi re, an nebe re hat ero mene hilingik welagimo re, an nen hilingisu mene andi re ibi-eberogo oba nen he, hat hebe heluk halhobagagu aple andi re ap amu mene ekhe werek. Nen an he eil misik uan hak oba nen he, at andi nek he we ero mondok horokhogo mene.

¹³ Ohealek hubet halok, ap andi nen eilenggen hat wokhabimbik, hat faget elok hilingisigin a? Lega, iluk yagasigen he, yogondak enek he, ya nogo in o. An nen a'nogo yagasigin mene re, aren hat faget a'nogo hilingisigin ikhe halok he, fano meneat he, aren, An nen a'nogo hilingisigin nabit, iluk ikhe halok, an nenat neilenggen wokhabimbik he, hat faget hilingisigin iluk nineisena Allah eluk mondok werek mene enu hombuk palogo yagaheti o. Ma re, o wei ikhe halok lanogen he, yaat nogo in o,” iluk yagatikhe.

¹⁴ A'nogo yagatikhemo, at he Rut a'nogo at Boas eiso'ma horokhogo andoma nogo isikhe. Nogo isikhesik, at Boas endawimo nen he, ”Afuni nen he, Rut ap Boas werek oba andoma wagasik, iluk inelu asinogo,” iluk anggasikhe andi nen he, at Rut afuni nen ineilenggen hanogo iluk, o wei igiluk ugu kwelek eluk a'luk wulifikhe.

¹⁵ Wilibigeluk ugunem, at Boas nen he, ”Su endakwe mene ugu mene ari nonggologo ya talfein o,” iluk yagatikhemo, nonggologo talfesikhemo, at Boas nen he jelai enggen ibilik 20 kilo mene kwalogo wogetikhesik, he Rut ungguloba fesikhemo, waluk wagu kwelek, at Boas o kota wagaikhe.

¹⁶ A'nogo wagaikhemo, at he Rut a'nogo oloba wagaikhemo, at oan Naomi nen he, ”Ninggi'nogo yagahetemo wagen,” iluk heinok wokhasikhe. A'nogo heinok wokhasikhemo, at he Rut en he, Boas nen yagatikhe mene omanogo mondogat pilingisogo yagatikhe.

¹⁷ Yagati logolik, ”A'nogo yaganetesik he, aren he, Hat hoan oba weat lakhobagagin elo'lego, iluk ikhesik he, gandum enggen 20 kilo yoma wo'netemo waluk wagi yi o,” iluk yagatikhe.

¹⁸ A'nogo yagatikhemo, at Naomi nen he, ”Wene andi wurep oba re, ninggi'nogo hilinglasigin heilenggen logoino, neak. O yogondak yaba re at Boas wene yi tekhogo igi'lek logolik he, aren yamukhogo logogin lek, iluk yagatikhe.