RUT 1 - Allah Wene Fano Wene Hupla Inane

Hun Elimelekh againafuri inom o Moab lagaukwa wene

^1-2 O attagat he, afuni Israel mene inoe raja ekhe menlagi'lek werek kwelek, inogogwi kaindek en ferinarek welagaukwa. A'nogo ferinarek were'ma, afuni Israel mene inaiba Kanaan yi awi ti awi andoma mondogat sumburu ouwak hokho mene lagasikhe. Andem sambul he, ap ekhe unggulenu Efrata mene enu Elimelekh o wilayah Yehuda ba kota Betlehem andoma welagaikhe. A'nogo were'ma, sumburu ouwak agaikhe andi nen, at ebe inom, agwe Naomi inom, amlogomi inebe pire, Mahlon, Kilyon inom, Moab mene inaiba lagaukwa. Lagaukwasik a'lima were'ma,

³ at Elimelekh ebe wa'lagaikhe. A'nogo wa'lagaikhemo, at he Naomi eagwi inebe pire aremnogo nek inom welagaukwa.

⁴ A'nogo logolik, it ap pire aremnogo hemi o Moab mene inenu Orpa inom, Rut inom, woginafukwasik, 10 tahun were'ma nen,

⁵ he Naomi eagwi ap inebe pire aremnogo emberegat wa'lagaukwa. A'nogo wa'lagaukwama, at he Naomi eagwi inom, agun inom, le'ma amunek welagaikhe.

He Naomi Rut emberek o Betlehem inambotkwe wagaukwa wene

⁶ Enggi miren hakhogo were'ma nen he, afuni ekhe nen ikhi logolik, ”Afuni Israel mene re, ineisena Tuhan nen yi mene ti mene awi yatha mene fanot fisikhemo, elok nili'lagwi,” iluk ugunem esanggo holhikhe. A'nogo holhikhesik, a'logomi amlogomi inagagwi aremnogo inom o Moab herakfisaluk wesuogeluk inasunggwe tegelogo fesukwa.

⁷ A'nogo hilingitukwasik, o welagaukwaba andoma herakfisaluk, a'logomi inom o Yehuda wesuogeluk wagaukwa. A'nogo waga logolik,

⁸ at Naomi nen a'logomi amlogomi inagagwi inebe pire aremnogo mel yagaisasikhe: ”Hit hemberek he, hinagaisawi inoba hinambotkwe lani o. Hit hinobabut fano an neagwi wa'lagaikha a'nogo ninom logolik fano lebetnisikhi lagagipsik, yogondak an lebetniugu welagep andi hak, nineisena Tuhan obabut fano nen lebethisikhi logouwagaro.

⁹ Nineisena Tuhan nen, hit hinaguni hinom logogun mene ekhe wokhisoagaro, na'logomi,” iluk hai ambe saluk warinafikhe. A'nogo yagaisasikhe meneat he, at Orpa inom, Rut inom, emberek le inane kwi-kwerogo aga logolik,

¹⁰ Naomi mel yagatukwa: ”Ninagaisa. A'nogo ugun o. Nit hat ninom afuni hat mene inoba louwogo,” iluk yagatukwa.

¹¹ A'nogo yagatukwama, at Naomi nen he, ”Hinambotkwe lani o, neagwi. Nenahalok an ninom logoin anggegep? An neagwi ekhe taginabumo, hit hinaguni woginabugun mondok elo'lek andi hegeba?

¹² An ap hobuk woginabigin he, mondok elo'lego. Nebe arat yaman agi andi nen he, hit hinambotkwe hinaiba lani o. An nendawimo nen he, o yogondak hubanggo an ap ekhe wanimbik he, neagwi ap taginabigin halok,

¹³ hiren it inebe inalue agu kwelek elok nenangorinafi logogun anggegeba? Mondok elo'lego o. Hit ap hunogo mene ekhe woginafi'lek logogun elo'lego, neagwi. Neisena Tuhan nen ambot wo'netemo weak welagi andi nen he, hit nendawilago,” iluk yagaisasikhe.

¹⁴ A'nogo yagaisasikhemo, it Orpa inom, Rut inom aremnogo le inane kwi-kwerogo agaukwaat. Le a'nogo aga logolik, at Orpa nen he, ”An nambotkwe lagain o,” iluk oan a'nogo hai ambe saluk wa'luk he, lagaikhe. Meneat he, at Rut enek he, oan a'nogo ale'ma fuluk lagu aple abiren kamo isikhe.

¹⁵ A'nogo kamo isikhemo, at Naomi nen he, at mel yagatikhe: ”Rut, neak. Yethan! haipar Orpa a'nogo afuni at mene inom, nen, iren hunogo mene faget, Nineisena ebe yiaro, iluk inendawinggen oba himbiret fuluk fogeratarek mene inom, inoba ambotkwe laga o. Ma re, harogo at ombo'ne lan o, neak,” iluk yagatikhe.

¹⁶ A'nogo yagatikhe meneat he, at Rut en mel yagatikhe: ”Nagaisa. Haren an hat herakhobagaluk loagaluk yaganetun o. An hat nemberek logoin namolo o. Hat koma lagen halok, an nemberegat andoma logoin o. Hat koma welagen halok, an nemberagat andoma logogunaro. Afuni hat mene andi, an mene asuak, nen, hat hendawinggen heisena Allah oba himbiret fuluk fogeratendek mene andi, an neisena asumo nendawinggen at oba himbiret fuluk fogerati logogin aro.

¹⁷ Koma nen hat hebe wa'lagen halok, an nebe andomaat wa'lagunem kweangma salnabugun namolo o. Ninebe wa'lago halok enek he ninamu-ninamu asugun o. Ma re, an noan herakhobagaluk nale'ma lagi halok, Tuhan nen wene mondok engginhogo noba fouwago,” iluk yagatikhe.

¹⁸ A'nogo yagatikhemo, at Naomi endawimo nen he, ”Nemberek logoin amolo nen ili'lago oma re,” iluk obabut enegat futfesikhesik he, wene ekhe yagati'lek kamo isikhe.

¹⁹ It emberek pikhit waga lagaukwasik o Betlehem wagaukwa. A'nogo wagaukwama, afuni o kota andoma mene mondogat inane anggiluk weak hokhorogo ikhi logolik, it hemi nen he, mel isukwa: ”At andi re eberogo he Naomi a'nogo a?” iluk isukwa.

²⁰ A'nogo isukwama, at Naomi nen he, ”Nendawimo hai higirek mene u hak, an nenu Naomi iluk yaganeti logogubo. An he, Nineisena Allah Omame Mondok Hokho mene a'nogo nen he, nendawimo mondok alepalerogo hilingisogo nobagaikhemo wagi andi nen he, nenu Mara iluk yaganeti logoino.

²¹ An nebe o yoma nen lagagi re, nenggi werek hogoat lagagi, meneat he, yogondak neisena Tuhan nen nambotkwe nenggi lekhogo wo'narek waga. Andi nen he hiren an nenu Naomi re ikhi logou fuk, an he ”Tuhan Omame Mondok Hokho mene a'nogo nen enggin-fenggin hokhorogo hilingisogo nobagaikhemo welagarik waginggere,” iluk yagaisasikhe.

²² At he Naomi a'logo Rut aiba Moab mene a'nogo emberek wagaukwa re, it afuni Betlehem mene nen hombak hangge enu jelai andi mene enggen paluogeluk attak-attak inenggi fakhasukwa hak wagaukwa andi.