ROMA 16 - Allah Wene Fano Wene Hupla Inane

Paulus nen it afuni Roma mene ekhe inebe lombok hai warinafikhe wene

¹ He ninerei Febe andi ebe hinelurogo yagahisak. At obabut fano nen he, Allah againafuri o Kengkrea mene leberisikherek mene hinoba waga andi,

² hit hinoe Tuhan Yesus hinom hundik logolik, Allah againafuri nen wanugun higithogoat, at ebe wanubagaigen iluk yagahisigi o. At agarek yi mene ti mene lek halok he, hit mene ekhe wogeti logoino o. Aren he, afuni hokhorogoat leberisigik, an nebe inom lebetniigik, ikhi lagaikhesi'mo re, hiren at ebe wanino o.

³ Nen, ekhe re, he Priskila agun Akwila emberek ninom Kristus Yesus faget hilingiti lagosik wagaikha a'naga Paulus nen hai wathinafe iluk yagaisano o.

⁴ It an telnabuogeluk lagunem, inoa'lep andi nen, ”Nendawilage,” iluk an nen enek hai warinafi lagi fuk. It afuni Allah againafuri endakwe mene inom, inebe mondogat ninom enat hai warinafi lago o.

⁵ Allah againafuri it Priskila Akwila emberek inaiba andogori'lagwi mene inomat, ”Paulus lagen hai wathinafa,” iluk yagaisano aro. Nen, ekhe re, ap Epenetus nendawi mene andi, ”Aren hai wathafe,” iluk yaga'no aro. O Asia andoma re, at andi tak endawinggen Kristus oba himbiret fesikhemo nen, it ekhe hobuk himbiret fesukwa.

⁶ He Maria hit faget seget hokho hilingiti lagaikhe a'nogo, ”Aren hai wathafe,” iluk yaga'no aro.

⁷ At Andronikus, Yunias emberek, ”Aren hai wathinafe,” iluk yagaisano aro. It he, an ninom ninunggulenu misigat mene ninenggi hele warek ninomat warek welagagusik. Afuni hokhorogo hak Kristus nen inayonggo fesikhesik lakfisa wagaikhe meneat he, inenu werek he, iraro. It tak inendawinggen Kristus oba himbiret fesukwasi'mo nen, an hobuk himbiret fesigi.

⁸ Nen, ekhe re, an nagailak Ampliatus nemberek ninoe Tuhan Yesus ninom hundik welago andi nen, ebe nendawi o. ”Aren hai wathafe,” iluk yaga'no aro.

⁹ At Urbanus andi ninomat Kristus faget hilingiti lagagu mene andi inom, Stakhis nendawi mene andi inom, ”Aren hai wathinafe,” iluk yagaisano aro.

¹⁰ At Apeles Kristus emberek hundik logolik humbunhogo hilingitunem obabut fano pali'lagwi mene andi, ”Aren hai wathafe,” iluk yagatik, Aristobulus againafuri inom, ”Aren hai wathinafe,” iluk yagaisigik, ino aro.

¹¹ At Herodion ap ninunggulenu misigat mene andi, ”Aren hai wathafe,” iluk yaga'noat. Nen, Narkisus againafuri ninom ninoe Tuhan Yesus inom hundik mene andi, ”Aren hai wathinafe,” iluk yagaisano aro.

¹² Nen, ekhe re, hemi Terifena Terifosa emberek ninoe Tuhan Yesus faget set kwalogo tegeli'lagwi mene andem, ”Aren hai wathinafe,” iluk yagaisigik, he Persis attagaren ninoe Tuhan Yesus faget set kwil-kwalhogo hokhorogo tegeli'logo mene andi nendawi e, ”Aren hai wathafe,” iluk yagatik, ino aro.

¹³ At Rufus andi ninoe Tuhan Yesus nen ayonggo fesikhemo fogeratarek andi. At agaisa andi, an nagaisa hangge aro. Eak emberegat, ”Aren hai wathinafe,” iluk yagaisano aro.

¹⁴ At Asinkretus inom, Flegon inom, Hermes inom, Patrobas inom, Hermas inom, ninerugwi ninagaila'lak Allah againafuri ekhe it inom welagaikharek mene mondogat inomat, ”Aren hai wathinafe,” iluk yagaisano aro.

¹⁵ At Filologus he Yulia emberek, Nereus erei emberek, Olimpas inomat, Allah againafuri it inom welagaikharek mene mondogat inomat he, ”Aren hai wathinafe,” iluk yagaisano aro.

¹⁶ Nen, ekhe re, hinebe Allah againafuri welagep andi, hai hinambe saluk wat-wat ilik lano. Allah againafuri Kristus agoromi o yi awi ti awi andogori'lagwi mene nen: ”Hai warinafo,” iluk yaganetama nen yagahisigi aro.

Wene wurep oba komorinafikhe wene

¹⁷ Nerugwi nagaila'lak. Hinendawimo kagalogo re, wene ekhe yi nane ninghogo yagahisago. It afuni ekhe hobuk we'luk, wene attak yagahisasukwama wanhigip mene herakfisoageluk he, hinebe minggilogo hinobagagik, hinendawimo weagethinafik, ugu halok he, hinebe hebelogo logolik, inane hinesanggo holhi'lek, herakfisaluk agaiseti logoino.

¹⁸ It andi re, ninoe Enupogot Kristus awe a'ma logolik, at faget hilingiri'lagwi fuk. We, inonggwarek inendawimo inamolo mene hilingiri'lagwi o. A'nogo hilingiti logolik, inane fano igik, liokhogo igik, ikhi logolik he, it afuni ekhe inobabut, ”I o,” nek agarek mene andi lalinabi'lagwi andi.

¹⁹ Mene re, hit Allah ane hologo hilingiti lagep mene andi, it afuni mondogaren hinobabut enegat pali'lagwi andi nen, an nendawimo nagaiyek anggikhi lagi o. Hit fano wene faget hinendawimo kagalek welagik, weak wene faget hinafe morogo welagik, umo re, fano. An nendawimo namolo.

²⁰ At Allah afuni inendawinggen hambuget fikherek mene a'nogo nen, at Iblis andi hineisogen alperelogo herakfisoageluk weak-weagat hinawe a'ma fei wesigin werego. Ninoe Enupogot Yesus Kristus obabut fano a'nogo nen kwelakhinarek logouwago.

²¹ At Timotius an nagailak nemberek Allah faget hilingiti lago mene a'nogo nen: ”Hai warinafi o,” iluk yaganetemo nen yagahisigi o. Ap nit mene Lukius inom, Yason inom, Sosipater inom, yoma nen: ”It hai warinafo,” iluk yaganetama nen yagahisigi aro.

²² ”An Tertius Paulus ane ugu kwelek lisu yi palhi mene nen, ninoe Yesus Kristus ninom hundik logolik hai wathinafi aro.

²³ At Kayus nen an nebe wo'nafik, Allah againafuri mondogat at aiba andogoti logouwagen woginafik, ikhe mene andi nen hai wathinafe aro. At Erastus o kota yoma faget uang fisugunem fisogo welagarek mene andi nen hai wathinafe aro. Nen, ninagailak Kwartus nen hai wathinafe aro.”

²⁴ Ninoe Enupogot Yesus Kristus obabut fano a'nogo nen, fethinarek logouwak, iluk, ”Ebe asuak,” u hak, ”Amin,” igi andi.

Wene wurep kobokhogo Allah fogeratikhe wene

²⁵ Allah fogerati logouwogo! An nen fano wene Yesus Kristus hilingitikhe wene yagahisasigi hak, at Allah omame hokho mene a'nogo nen hinendawinggen wurigethinafi logogin elogo. Wene Allah endawimo mene andi, attagaren hinago welagaikhe mene re, yogondak Allah nen weinamet fesikhe.

²⁶ Andi re, it ap at ane yagaisikhi lagaukwa mene omanogo nen lisu palogo re, sele'matfesukwama were'ma an nen yagahisasigi andi. Yi afuni ti afuni inunggulenu lombok mondogat wene andi inesanggo holiluk inendawinggen Yesus oba himbiret fuluk ane hologo hilingiti logouwageluk, at Allah etok mondok welagarek mene a'nogo nenat: ”Wene yi afuni inelu asuago,” iluk isikhe.

²⁷ At Allah alegat endawimo kagalek welagarego. At Yesus Kristus nen hilingitikhe mene faget Allah fogeratu mondok logouwogo, iluk, ”Ebe asuak,” iluk u hak, ”Amin,” igi andi.