ROMA 11 - Allah Wene Fano Wene Hupla Inane

Allah obabut fano nen afuni Israel mene fena nek telinabigin wene

¹ An nen wene ekhe heinok wokhisak. At Allah nen againafuri Israel mene andi mondok herakfisasikhe anggegep? Mondok lego. An nebe re, Israel mene Abraham en tagongge nunggulenu Benyamin mene welagi.

² Allah nen againafuri attagaren wenaginafikhe mene andi herakfisasikhe lego. Wene at Elia nen hilingitikhe wene lisu palek werek a'nogo hinonggot nogo? Aren he, Allah nen it wene inoba fikhi logouwageluk, mel ikhi lagaikhe:

³ ”Allah Henupogot neisena. Ap hat hane yagaisilik nikharek mene omanogo, inoatik, e mezbah hat faget wam warogo nolhetarek oba omanogo meisalhik, agasik he, an nalegenek heraknobagagasik hobuk noasuogeluk hera'nabik nikho aro,” iluk yagatikhemo re,

⁴ at Allah nen he, onggo ninggi'nogo yagatikhe nogo? Yi'nogo yagatikheat anggigi: ”Ap inebe 7.000 nen kembu su an faget wenaginafigimo werego,” iluk yagatikhe.

⁵ Andi hak he, Allah obabut fano nen, wenaginafikhe mene o yogondak ya inebe fena endebat ekhe weregaro.

⁶ It afuni nen fano ekhe hilingitukwaba, Allah nen inobabut palogo wenaginabilepma re, at obabut fano nen wenaginafikhe iluk ugun lek andi nen he, iren fano ekhe hilingitukwaba Allah nen inobabut palogo wenaginafikhe fuk. We, at obabut fano nen wenaginafikhe andi.

⁷ Halok he, niren wene ninggi'nogo ugun? It afuni Israel mene fano wene eisewerek asuogeluk ninghogo hilingiti lagaukwa meneat he, ebe eise agi'lek. We, it ekhe inebe endebat Allah nen wenaginafikhe mene halok fano wene eisewerek agu kwelegat he, inebe hokhokwe inendawinggen omamet fesikhe.

⁸ Andi faget he Allah nen mel isikhe: ”Ineilenggen higik, inesanggo holhik, inogo iluk, inafekwe wongetfesigimo, yogondak a'nogo werego,” iluk isikhemo lisu palogo fesukwa.

⁹ Wene andi higit, at Daud en mel isikhe: ”Afuni nen sue inom, paik inom, hele fugunem ke'nok ikherek hak, it andi seni hokho isari'lagwi andiba inonggwarek inebe ke'nok uago. Inebe nong akhigik, tunghogo hela pigik, uago.

¹⁰ Ineilenggen hanogo iluk he, mum asuago. Enggin mene inot oba mondok logouwago,” iluk Daud en isikhe.

Allah nen afuni endakwe mene telinafikhe wene

¹¹ An nen heinok ekhe wokhisagat. Afuni kwe lagunem ineisok a'lip silukhogo waragarek hak, it afuni Israel mene weak agaukwa andi, mondok-mondogat alomat lagaukwa nogo? Mondok lego. We, it weak hilingitukwa andi nen, Allah nen it afuni endakwe mene telinafikhe andi. A'nogo telinafunem he, it Israel mene nen: ”Nit telninabuem,” iluk inendawimo weak a'luk inafe hebelasuageluk hilingitikhe andi.

¹² It afuni Israel mene weak hilingitukwa andi nen, yi afuni ti afuni mondogat andoma Allah nen fanorinafikhe. It nong agaukwa andi nen, afuni endakwe mene andi hokhorogoat saburasukwa. Halok he, hobuk it Israel mene inebe mondogat Allah nen fanorinafi logolik, yi afuni ti afuni endakwe mene andoma hokhorogo fanorinabigin lek nogo? Fanorinabigin aro.

¹³ Wene yi hit afuni endakwe mene yagahisak. Allah nen he, an nayonggo fuluk hit endakwe mene hinoba laknobagai wagaikhemo wagagisik hilingiti lagi andi nen, esin mondok iluk fogerakhikhi lagi o.

¹⁴ An nerugwi nagaila'lak ninunggulenu misigat mene, Allah nen fena telinabuageluk, an nen a'nogo hilingiti lagi andiba, ina'mage lagaluk wene paluageluk hilingiti lagi.

¹⁵ Allah nen, it afuni Israel mene inebe herakfisasikhe andiba, yi afuni ti afuni mondogat andoma Allah inom lambulinafikhe andi. Hobuk it woginafunem en ninggi'nogo hilinglasigin? Afuni warek mene inelugerinabu hak woginabigin andi.

¹⁶ Sumburu roti attak mene Allah faget fisogoin halok he, ebe mondogat he, Allah mene aro. Nen, e ero Allah faget fisogoin halok he, enggisok At mene aro.

¹⁷ E zaitun ero fano mene were'ma re, enggi ekhe palogo lakfisaluk he, obali'mo e zaitun enggama mene enggi palogo hunesi wesumo re, e ero hundik logolik amusu werek logou hak, hit andi re, hinebe enda'ma mene Allah nen it Yahudi mene omanogo hinom hunogo hinobagasikhemo fano welagebo.

¹⁸ A'nogo logolik, hiren he, it inebe enggi palek mene hangge andi faget: ”It weak. Nit fano o,” iluk fogerakhikhi logogup. E ero nen he, enggisok kerabeterek andi. Nen, enggisogen he, ero kerabeterek lek andi hangge, it ero mene nen he, hit enggisok mene kerabethinafarego.

¹⁹ Mene re, hiren he: ”Allah nen, nit e eroba hunogo ninobagai wesigeluk he, it palogo lakfisasikhe,” iluk ikhi lagep andi.

²⁰ A'nogo higirat anggikhi lagep meneat he, hinendawimo ebe'ni. It inendawinggen Allah oba himbiret figi'legen palogo lakfisasikhe. Mene re, hit enek he, hinendawinggen Allah oba himbiret fesigip andi nen wokhinafikhemo welagep andi. Halok he, hinonggwaregen fogerakhigi'lek, hinailorogo logoino.

²¹ It he, e enggi ero ebeba hundik mene endawirinafi'lek palogo lakfisasikhe andi. Halok, hit endawithinabimbik herakhinobagagin nogo? Lego.

²² Allah obabut he, fano inom, weak inom, welagarek andi hani! It alomat lagaukwa mene faget he, obabut weak andi. Nen, hit at obabut fano mene hinom hundik logogun halok he, obabut fano andi. Mene re, a'nogo hundik logogun lek halok he, hit a'nogoat palogo lakhinobagagin o.

²³ It he, inendawinggen Allah oba himbiret figi'lek werek andi, hobuk himbiret fogoin halok, at Allah nen hunogo fisagain higit werek andi nen, hobuk hunogo fisa wesigin aro.

²⁴ E zaitun enggama mene enggi palogo re, oloba meneba hunisu elo'lek meneat he, hunisi wesu hak, hit he, hunogo hinobagai wagaikhemo welagep andi. Nen, e zaitun enggi ebeba hundik mene palogo lakfisaluk, hobuk obali'mo hunogo fei wesu hak, it he hunogo fisa wesumo elogo.

Allah nen afuni Israel mene hobuk fanorinabigin wene

²⁵ Nerugwi nagaila'lak. Wene Allah endawimo welagarek wene yi hinonggot logogun andi, an nabit. Hit hinonggwaregen he: ”Nit wene ninelu o,” iluk fogerakhegep hanogo iluk he, wene yi yagahisak. It afuni Israel mene ekhe inendawinggen ningsek andi re, elama fagerat werego. Nen, hobuk it afuni endakwe mene kwi wesugun mene huli elok kwi wagaikha halok he,

²⁶ Allah nen afuni Israel mene mondogat fanorinabigin o. Wene a'nogo iluk he, at Allah nen mel isikhemo aneba lisu palek werek: ”Telinafarek mene ebe re, o Sion nen wesigin o. Wesimbik he, it Yakub en tagongge mene nen an nebe inailo lek logolik weak hilingiri'lagwi mene korogo wokhagain o.

²⁷ Nen, weak hilingiri'lagwi mene andi sebelogo legetfisikhi logolik he, wene yi'nogo warogo woginabigin o,” iluk isikhemo re, lisu palogo fesukwa.

²⁸ It Israel mene fano wene wanu inabiren Allah inom weak agaukwa andi, hit endakwe mene fanothinabuagaluk inom weak agaukwa. Mene re, Allah nen wenaginafikhesik andi nen he, inambulak Allah inom hundik andi nen inebe endawi o.

²⁹ At Allah obabut fano nen yi mene ti mene wo'nisigik, ninebe wena'ninafik, ilugen he, hobuk ane hunogoat ekhe ikherek lek.

³⁰ Hit attak Allah ane hologo hilingiti'lek welagagip. Meneat he, yogondak it Israel mene Allah ane hologo hilingiti'lek oba re, hit hinebe endawithinafikhe andi o.

³¹ A'nogoat he, yogondak it hinomat endawithinabuageluk, hit hinebe endawithinafikhe andiba re, yogondak it Allah ane hologo hilingiti'lek welagaikharek andi.

³² At Allah nenat he, afuni weak hilingitunem inenggi hele hobuk fikhaluogeluk warogo fisagarek andi hak, afuni inebe mondogat endawirinabigiluk he, inebe mondogat aren at ane hologo hilingiti'legen honggole'ma fisasikhe andi.

Paulus nen Allah fogeratikhe wene

³³ At Allah oba mene hokhorogo welagik, endawimo mondok kagalek welagik, wene mondok elu welagik, ikherek andi nailo e. Aren wene elugun waterek mene, nit afuni ninelu asugun nogo? Aren yi mene ti mene hilingiterek mene niren futfogoin nogo?

³⁴ Wene andi faget he, lisu yi'nogo palogo fesukwama werek: ”Nineisena Tuhan endawimo ebeterek andi, sa elu? At he, sa hagen komorasigin nogo?

³⁵ Nen, sa nen yi mene ti mene at woge'luk, Onggo wo'nom, iluk yagasugun nogo?” iluk isukwama lisu palek werek andi.

³⁶ Eroba, yi mene ti mene mondogat he, at Allah nenat elalhikhemo, at enggiba welagarek. Logombik he, wurep oba, aren at hilingisigin. Halok, at enek fogeratu mondok logouwogo, iluk igi andi, ebe asuak u hak, ”Amin,” igi andi.