PENGKHOTBAH 9 - Allah Wene Fano Wene Hupla Inane

¹ Mondogat hilingik mene andoma re an nen ero pilingisogo wenggel hikhi lagimo re, At Allah nen he ap fano hilingitarek mene andi inom, inendawinggen kagalek inap andi inom, nen inobabut ekhe inendawirinafarek andi inom, inabit welagaikharek andi inom mondogat andoma faget ineluk logouwageluk halogo fisasikhe. Nen hobuk yi'nogo hilinglasigin iluk he ap misigen iluk ogo ekhe elu welagarek mondok lek.

² Eberogo nenat, ap mondogat inobabut he misigat asugun: Ap higithogo hilingiterek mene andi ogo, ap kwanirogo hilingitarek mene andi ogo, ap obabut fano mene ogo ap obabut weak mene ogo, ap pugunsek mene ogo, ap emerek mene ogo, ap obaget fikherek mene ogo, ap obaget fikherek lek mene ogo mondogat he higirenek. Ap weak hilingiterek mene inom weak hilingiterek lek mene inom, nen ap ane hombuk palherek mene inom ane hombuk palherek lek mene inom emberek he higirenek.

³ Arigini'mo re inebe mondogat he obabut higithogo nek inoba fagain, nen o kweangma yoma yi'nogo ti'nogo hilinglagarek mene omanogoba nen inendawinggen mondogat heiselek mene re andi nek werek. At ebe eluk logolik oba re weak mene omanogo endawinggenma peterogo welagik, wenggelherek mene agore kemburogo nek ebethaluk igik, ikherek. A'nogo hilingitila'luk ferekhogo aremnogoat at ebe wa'lagarek.

⁴ Oba nen he inebe inareagun were'ma andem enek he nineluk welago anggagarek. Andi hak he singa wa'lagarek andi re mondok-mondogat wa'lagarek, oba nen mene eluk werek mene nek he eluk agaiyekhogo welagarek.

⁵ Afuni ineluk werek mene andi re wa'lasugun iluk he inelu logoumo fano, nen it afuni arat wa'lagaikha mene nen he yi'nogo ti'nogo mondogat inonggot werek. It inobaget wogisugu mene inom inoba eberek werek aple inom ekhe werek lek, nen inenu ogore inonggot agaikharegat.

⁶ Endawi hundik mene inom, a'mage lagaikherek mene inom, endawinggen ninggerek mene inom, andoma mondogat he at ebe inom mondok-mondok wa'lasigin. O kweangma yoma hilinglari'lago mene oma aren hilingisu mene ekhe logogin lek.

⁷ Halok he nunggu mene ninggi logolik he hagaiyegeti logoino, nen, hagai anggur amusu ninggi logolik hagaiyekhogoat ninggi logoino. Allah nen a'nogo hilingitu mene faget he enggin anggili'logo lek, oba nen Aren anggikhi logolik he ari fano hilingiri'lago anggikherek.

^8-9 Hit hinebe hineisena Allah nen o kweangma elama faget logouwagaluk hinobagaikhemo logolik set kwil kwalhogo hilingiti logogun mene andi faget hinenggi onggo wanu hak, hinendawimo hinagaiyek hikhi logogun andi aro. Andi nen he, hinagagwi hinendawinggen hundik mene hinom fano hai warogo logoubagaik iluk wokhisasikhemore hundik-handik we elama faget logolik he hinoba heanerogo nek logoino o.

¹⁰ Afuni inebe wa'la'luk lagaikharek oba andoma re yabu hilingitik, menenei ebetik, yi wene ti wene inelu agik, inendawinggen kagalek mene hilinglagik agarek le'ma andomaat hit logoin andi nen he, hineluk logolik yi yabu ti yabu hinomamerogo hilingiti logoino.

¹¹ O kweangma yoma ekhe yi'nogo hilingitunem isigiregat. Afuni inebe lombok inoba hilinglasigin ilugat hilinglagarek andi nen he, it afuni sa awewerek-sa awewerek walhugunem at ekhe awe werek agarek mene andi nek onggo helikherek fuk. Nen, weim yafi logolik inomame agaikharek mene andi, hobuk yafi logolik inomame agunem isigirek legat. Nen, it inendawinggen kagalek mene andi, inebe mondogat inamburu yi mene ti mene oba heilarogo nek nunggunem isigirek legat. Nen, inobabut hebelek mene andi, inebe mondogat inangge yi mene ti mene hokhorogo nek hilinglagunem isigirek legat. Nen, it yi wene ti wene inelu mene andi, inebe mondogat inenuwerek agunem isigirek legaro.

¹² Yi sambul hilinglasigin ti sambul hilinglasigin iluk inonggot were'ma, sue hele fagarek oba ke'nok igik, nen ikan onggotma su webet fagarek oba elema kwalagik ikherek hak, nit afuni ninoba ogo ninonggot were'ma enggin mene ninoba asi wagarek andi o,” iluk isikhe.

Hebelek mene faget inom morue mene faget inom wenggelharek wene.

¹³ Ombo'ne yi ogore walhogo wene misik ekhe ebe fi-furogo afuni hebelagaikharek mene andi omame werek anggigi mene faget he yi'nogo.

¹⁴ O kota misik ekhe afuni we endebengge were'ma, inenggi ekhe sambul he ap raja omame hokho mene ekhe o kota andi inoasi kwigin iluk wagaikhe. Wagaikhesik he aren o kota a'nogo walinget hikhi logolik leget fak waganek mene meisalogo kwigin iluk fikfougeti lagaikhe.

¹⁵ Andi nen o kota andiba, ap ekhe enggi lek meneba nen ebe hebelek mene welagaikhe. Nen o kota ebe andi elok telu higit oba nen at enggi lek hilingi'mo aren hilingite mene a'nogo ambisangma iluk wenggel haga lek, nen ap we misik agun nen iluk ogo ekhe fut figi'legat.

¹⁶ Andi nen an nen wenggel hikhi logolik he, hebelagaikharek andi re inomame mene inom higitsek lek mondok along werek. A'nogo hilingik oba nen ap inenggi lek mene nen hebel-hebel aple hilingitu mene a'nogo re legeisogo fagarek lek. Nen, at ane ikherek mene ogo futfagarek legat.

¹⁷ Mondok fano re, ap ero elu mene nen ane orogat ikherek mene andi fanorogo holugun oba nen, ap kembu mene andogore'ma andoma nen ap kain enu werek mene nen ane hokhoba ugunem holugun mene andi re we elo'lek hangge.

¹⁸ Sige sikhe wanharek andi sebelek hak oba nen he inendawinggen kagalek welagaikharek andi nek he mondok esin, oba nen weak mene endebat ekhe tephogo pigin mene nen amusu fano mene belanga misik keralek weagerogo fou hak.