PENGKHOTBAH 8 - Allah Wene Fano Wene Hupla Inane

¹ Ap hebelogo nek hilingiterek mene andi re agaiyek mondok hikherek, aren he yi wene ti wene faget onggo higithogo nek ikherek. Endawinggen kagalek mene a'nogo nen elokheba heanetfigik, nen elokhe haro mene a'nogo oba heanetfigik, ikherek.

Raja ane higithogo hilingitarek wene

² Raja nen wene wulafu halok higithogo hilingiti logoino, nen hiren hinane yugunat Allah ba wene waresu fuk.

³ At raja re aren endawimo anggikherek mene omanogo higithogo nek hilingiti logogin enggere, aren hit endawirogo agaiyek hinoba fugu lek halok he ogalogo yatma logoin halok fano.

⁴ Raja omame werek mene a'nogoba yi wene ti wene hilingitunem he, sa nen ailo legengge ane oak sagalu hak nogo?

⁵ Ap at ane hologo hilingitarek mene re ailo lekhogo logolik lombukhogo logogin, ap hebelek mene nen he ki sambul nen raja ane ninggi'nogo ikhe iluk elok futfikherek enek.

⁶ Yi'nogo ti'nogo hilingitarek mene omanogo faget he hilinglasigin iluk werek oba nek hilinglagarek, oba nen he niren we endebarenek futfikhi lago.

⁷ Ebe ki mene asigin iluk nenangotharek mene andi re ap misigen ogo ekhe elu mene werek lek, nen hobuk asigin mene faget yi'nogo asigin iluk he ap ekhe nen ogo u lek hagat.

⁸ Ap misik ekhe nen wa'lagu mene faget oanma iluk senfigik, higilogo fei lagik u lek hak, Andi re afuni mondogaren inebe lombok hogoin enek hilingi'mo re, We ineranen wene agarek oba inom henarogo wene agarek oba inom, wa'lagaikharek mene andiba nen ogalogo la lek hak.

Ap eberogo hilingitarek mene inom, weak kwanirogo hilingitarek mene inomen hilingitarek wene

⁹ Mondogat andoma re an nen o kweangma yoma hilinglagarek mene higirik futfigi. Ekhe sambul he ap omame werek mene nen it ekhe agaila'lak mene omanogo weaget fisagain iluk omameba alomat fisikhi laga.

¹⁰ Nen ekhe sambul hugunemen he ”Ap ekhe kwanirogo hilingiterek mene ebe wa'lagama re salinafuba omanogo salhi lagaikha. Oba nen ap sali lagaikha mene omanogo inambotkwe inaiba waga logolik he, ap wa'laga mene a'nogo ebe o kota logolik kwanirogo hilingiti laga mene omanogo faget fogerarik lagunem isigi. Arigini'mo re andi ogore we alomarogoat.

¹¹ Nena mene faget afuni nen inailo anggigi'legengge weak mene nek hilingitarek nogo? Andi re unggum weak-weak wogisagarek lek andi nen hilingitarek.

¹² Ap weak enek hilingitarek mene nen weak ero seratus nen hilingirik lagain meneba nen ogore at ebe eluk uanhogo werek. Oba nen he ap Allah faget inailo anggagarek mene halok he ineluk fano inagaiyekhogo nek logogun.

¹³ Agaumhogo re ap kwanirogo hilingitarek mene re enggin-fenggin hokhorogo hikhi logogun. At ebe eluk werek mene re inafumagengge palago lagarek hak weak-weak legasigin. Andi re aren eisena Tuhan oba tiphogo hilingiti logogin lek andi nen at ebe umur oan werek kwelek wa'lasigin andi.

¹⁴ Oba nen mondogat andoma re we ineranen wene nek hilingitarek, kweangma yoma ki mene hilinglasigin iluk kwelakhikhi logoni. Ap eberogo hilingitarek mene re ap weak hilingita mene hakhogo unggum wogisagarek, nen ap ekhe a'mageba nek hilingiterek mene re ap eberogo hilingitarek mene hakhogo hilingfisagarek. Ma re andoma we alomarogo nek hilingitarek.

¹⁵ Wene ambisangma elugun warogo re afuni nen he inendawimo inagaiyek enek anggikhi logogun. Andi re at ebe o kweangma yoma logolik, agaiyek amu mene faget ekhe hikhi logogin lek, we inamburu ninggik, inagai ninggik, inagaiyegetik, hilingitarek mene andem enek werek. Eluk Allah nen wogete mene andem oba logolik he, aren hilingiterek mene omanogo oba nen we andem enek hikhi logolik logogin.

¹⁶ Andi nen he yi'nogo ti'nogo kweangma yoma agarek mene andoma futfugu aple faget hebelek mene wo'nesuageluk hilingitik, nen o kweangma yoma ina'mageba hilingiri'lagwi mene andoma futfigik, hilingisigin iluk ugunem he an nen futfigi mene re, niren set warigi'legengge hup hundik lingge hundik yi mene ti mene hilingitu mondok welagorek,

¹⁷ Allah nen hilingiterek mene andi re niren ninelu asu lek hak. Niren ninamurururogo herasugun meneba nen ogore futfoumo re elo'lek. Ap hebelek mene nen an nelu iluk fogerakhikherek oba nen he, at ogore onggorengge nen ikherek.