NEHEMIA 8 - Allah Wene Fano Wene Hupla Inane

Ap Ezra nen he, Allah nen komorinafikhe mene a'nogo enu salogo afuni mondogat yagaisasikhe wene

¹ It afuni Israel mene inawi kota welagaukwa kwe lombok kwi wagaukwasik were'ma tugi iren wenati lagaukwa higithogo 7 mene folelhikhemo re, tanggal 1 ba inebe mondogat o Yerusalem leget pak leget ambe palek mene enu Pintu Gerbang Air salhukwaba andoma elonggoma o silimo andogotukwa. A'nogo andogotukwasik he buku Allah awene melalek afuni Israel mene faget Musa ba fesikhe mene a'nogo ap imam Ezra wene TUHAN nen, ”Yi'nogo hilingiti logoino, ti'nogo hilingiti logoino,” iluk komorinafikhe wene andi mondok elu agun a'nogo nen wanuageluk yagatukwa.

² A'nogo yagatukwama, at Ezra nen wene Allah nen komorinafikhe wene a'nogo waluk afuni ap inom, hemi inom, yenggerugwi elok futfou hak mene inom, andogorek were'ma inoba waluk wagaikhe.

³ A'nogo waluk wagaikhesik, o huberen hundik linggene nen hundik buku a'nogo enu salhu kwelek, afuni mondogat omanogo inesanggo fanorogo hologo welagaukwa.

⁴ A'nogo hologo werek kwelek, at Ezra ebe e talek afuni inebe andogorek werek kwelek wenenggak agarek oba hilingisogo fesukwaba mendek logolik enu salhikhe. At Ezra buku andi enu salhu kwelek ap at enggi ebekwe fikhit mendek welagaukwa mene inenu re, yi: Matica inom, Sema inom, Anaya inom, Uria inom, Hilkia inom, Maaseya inom, inenu andem mendek welagaukwa, nen enggi harekwe re: Pedaya inom, Misael inom, Malkia inom, Hasum inom, Hasbadana inom Zakharia inom, Mesulam inom, mendek welagaukwa.

⁵ It afuni andi inebe a'ma hak mendek werek kwelek, at Ezra nek he, e talek afuni inebe andogorek were'ma lagaluk wenenggak yagaisagarek oba andi mondok legeisogo talfesukwama a'luk he, it afuni andi inebe mondogat he ineilenggen at Ezra oba yerogo welagaukwa. A'nogo yerogo werek kwelek, at Ezra nen wene Allah nen Komotninafikhe wene a'nogo enu saligiluk funggulhunem inebe mondogat menlagaukwa.

⁶ A'nogo menlagaukwama, Ezra nen he, mel isikhe: ”Nineisena TUHAN, Allah hebe hokho mene fogethafi lago, neisena,” iluk yagatikhemo, it afuni omanogo inebe mondogat inenggi uanhogo liakfesukwasik mel isukwa: ”Ebe asuak, u hak, amin, amin,” ugu welagaukwasik, ineindep awi yagaisogo Allah fogeratukwa.

⁷ A'nogo arat fogeratukwasik, inebe mondogat inobalik kwe lombok siakhogo menlagaukwama, it ap Lewi mene inebe esa ekhe nen wene Allah nen komotninafikhe wene Ezra nen enu salhikhe mene omanogo, wene enggen pilingisogo yagaisasukwa. Ap andi inenu re, yi: Yesua inom, Bani inom, Serebya inom, Yamin inom, Akub inom, Sabetai inom, Hodia inom, Maasya inom, Kelita inom, Azarya inom, Yosabad inom, Hanan inom, Pelaya inom.

⁸ It andi nen he, wene Allah nen komotninafikhe wene andi, ”Yiba nen he, huli ti huli faget isikhe,” iluk, it inaneba uluk he, wene enggen pilingisogo yagaisugu welagaukwa. A'nogo pilingisogo yagaisasukwama, it afuni omanogo nen he, fanorogo futfesukwa.

⁹ A'nogo enu salogo yagaisugunem, afuni omanogo inesanggo holhukwasik, inendawimo mondok weak agaikhesik he le agaukwa. A'nogo le agaukwama, at gubernur Nehemia inom, ap Ezra Allah eisewerek mene wene Allah nen komotninafikhe wene a'nogo elu mondok mene a'nogo inom, ap Lewi mene wene andi pilingisogo yagaisasukwa mene omanogo inom, inomen afuni omanogo mondogat inom yagaisikhi logolik he yi'nogo isukwa: ”O yogondak he, nineisena TUHAN Allah onggwarek awi wei ikhemo welago andi nen he, hit hinendawimo weak a'luk le agubo.

¹⁰ Nineisena TUHAN nen hinendawimo hai hakhoagaluk hilinghinafe mene andi nen hinendawinggen ago wasigin werego. Halok o yogondak he, nineisena onggwarek awi weikhemo welago andi nen he, hinailokwe hinambotkwe lambik, hinendawimo weak welagi'lek, hinagaiyek hikhi logolik, hinamburu ninggik, hinagai ninggik ino o. A'nogo hilingiti logolik, hit hinamburu inom, anggur amusu inom, it afuni ekhe inamburu inom, inagai inom, lek mene andi ekhe sumburogo wogisano aro,” iluk yagaisasukwa.

¹¹ A'nogo yagaisikhi logolik, ap Lewi mene omanogo nen he, ”O ninenggi yogondak nineisena TUHAN onggwarek awi yiba re, hit hinendawimo a'nogo weak asugun mondok lego,” iluk inane agap sagalhigik yagaisasukwaat.

¹² A'nogo yagaisasukwama, it afuni omanogo pugulogo inailokwe lagaukwasik, inamburu ninggik, inagai ninggik, ikhi logolik, it ekhe sumburogo wogisigik, uogeluk inailokwe inam-botkwe lagaukwa. Lagaukwasik, Allah nen wene komorinafikhe wene enu salogo yagaisasukwama inesanggo holhukwasik futfesukwa andi nen he, inendawimo inagaiyek agaukwa.

O Sabu Enggaba elama faget wurogo welagaukwa mene inendawimo eberek Pesta hilingitukwa wene

¹³ A'nogo pugulogo lagaukwasik, ohealekwe re, afuni inunggulenu lombok inogogwi kaindek mondogat inom, ap Allah eisewerek mene inom, Lewi mene inom, wene TUHAN nen komorinafikhe wene a'nogo ap Ezra nen yaganisoageluk oba wagaukwa.

¹⁴ Wagaukwama wene yagaisugunem he, TUHAN nen, ”Yi'nogo hilingi'no, ti'nogo hilingi'no,” iluk Musa bene nen At againafuri Israel mene yagaisikhi logolik he, ”Tugi 6 oba wela'luk ekhe 7 meneba, O Sabu Enggaba elama faget salhigik logolik pesta hilingiti logoino o,” iluk yagaisasikhemo, hilingiti lagaukwa mene a'nogo hobuk yagaisasikhemo inesanggo holhukwasik inelu agaikhe.

¹⁵ A'nogo inelu agaukwasik he, afuni o Yerusalem kota ekhema-ekhema inom, esanggokwe inom, welagaukwa mene omanogo inoba wene yi'nogo yagaisilik lagaukwa: ”Allah nen he, hiren O Sabu Enggaba salhigik logolik, pesta hilingiti logoino, iluk yaganisasikhe mene lisu palek werek higithogoat wusuogen he, hinebe o tom oba lagambik he, e sin engga inom, e zaitun engga inom, e amusu werek mene engga inom, e amu-amu agayo engga inom, enggi sombol higik wanhi logolik he, sel inomat palogo, waluk we'no o,” iluk yagaisilik lagaukwa.

¹⁶ A'nogo yagaisilik lagaukwama, it afuni omanogo e enggisok sombol higik wani lagaukwasik waluk wagaukwa. A'nogo waluk wagaukwasik, it inebe mondogaren o sabu andi it inawi wurik o tum oba inom, inawi silikwe inom, o TUHAN awi silimo elokhoma andoma inom, obalik kwe ambe palek enu Pintu Gerbang Air ikhi lagaukwaba horogat andoma inom, Obalik ekhe enu Pintu Gerbang Efrayim ikhi lagaukwaba andoma inom, wurik lagaukwa.

¹⁷ Afuni inenggi hele warogo woginarek lagaukwa mene inambotkwe wagaukwa mene omanogo inebe mondogaren o sabu enggaba a'nogo wutukwasik, inebe andoma welagaukwa. Attagat it o sabu enggaba salhigik welagaukwa mene andi inendawimo eberogo re, at Nun amlogo Yosua werek oba wurogo welagaukwasik oba nen, hobuk ekhe wuti'lek welagaukwa mene re, andem sambul hobuk wutukwa andi. A'nogo hilingiti logolik, it inebe mondogat inendawimo inagaiyekhogo hikhi logolik fano liokhogo welagaukwa.

¹⁸ A'nogo wutukwasik, pesta hilingitu inenggi 7 nen welagaukwa. A'nogo hilingiti logolik, wene Allah nen komorinafikhe mene lisu palek mene a'nogo at Ezra nen hundik-handik enggi ekhe sambul wene ero ekhe mene enu salogo yagaisigik, inenggi ekhe sambul wene ero ekhe mene enu salogo yagaisigik, o ebe lombogat a'nogo nek yagaisikhi lagaikhe. A'nogo yagaisikhi lagaikhesik, inenggi ekhe 8 meneba re, wene palek a'nogo higithogo elugun warogo hilingitukwa.