NEHEMIA 6 - Allah Wene Fano Wene Hupla Inane

Nehemia wasugun iluk abok palhukwa wene

¹ Ap nit ninaselei mene, hun Sanbalat inom, Tobia inom, Gesyem inom it ekhe amu mene inom inesanggo holhunemen he, ”It afuni Israel mene nen he leget pak leget a'nogo mondok legeisogo ambotkwe wurik laga logolik, folelek omanogo mondogat to'morik lili'lagwi ugunem holhukwa. A'nogo holhukwaba nen he andem oba re o kota andi bene kwe ambe palek mene omanogo faget kwe sou ebe oan wurogo kolhi'lek kwelek oba nen a'nogo isukwa.

² A'nogo holhukwasik he it hun Sanbalat inom, Gesyem inomen he, o sili ekhe Lembah Ono ba andoma werek mene inoba wene misi'mo kabogesuogen eme o, iluk ap yonggongge an were'ma lakfei wagaukwa. Oba nen iren aga mene andi re an nebe weaget nobagauwogeluk aga higi iluk an nelu aga.

³ Andiba re an nen it inoba wene onggo yi'nogo lakfigi, ”An he yabu mondok lego mene hilingiti lagi hilingi'mo re wesigin lek. Nen, an nebe hit ninom ambi asuwogen iluk wesumo nen he yabu yi hesanggema linet fou hak oma,” iluk nane lakfigi.

⁴ A'nogo igimo nen he iren inenggi enggaminogoba at wene a'nogo nek lakfei wagu welagaukwama an nen ogore nane attak igi hakhogo nek lakfugu mondok welagi.

⁵ A'nogo hilingitimo nen he inenggi fuap meneba nek he at Sanbalat agot yabu a'ma hilingiti laga mene ekhe lakfei wagama, wagasik he lisu palek awinggaba kwelabek legengge wo'nesi waga.

⁶ Nen, lisu palek andiba re ane yi'nogo iluk palek welaga, ”It afuni inunggulenu inap horokwe yoma werek mene nen inane nen waluk ikhi logolik, hat inom, nen it afuni Yahudi mene mondogat inomen he weim abok egepsik he o kota leget pak leget andi legeisogo wanhi lagep mene andi faget ili'lagwi iluk at Gesyem en ogo eberogo ikhe. Nen, aren ekhe ikhi logolik he hat he afuni Yehuda mene inobaget onggwaregen raja logogin iluk legeisogo fakhikhi logolik,

⁷ ap nabi nen hat o Yerusalem oba andoma raja logouwageluk mennobagani iluk ikhi lagen aple faget mel ikhe. Ma re wene inane nen iluk waluk aga mene andi re at raja esanggoma ogo kwi lagain logou hak. Enggere wene andi faget nit ninane seberogo masuogen eme,” iluk palogo lakfei wagama welaga.

⁸ A'nogo palek welagaba nen an nen wene onggo lakfikhi logolik he, ”Wene hun haren egen mene andoma re hane nen lalogo we tulemat egen o,” iluk lakfesigi.

⁹ Onggo a'nogo lakfesigimo nen he iren nit yabu hilingiti lago mene andi hesanggema leisal fouwageluk he ninailoap kwelafi lagaukwa. A'nogo hilingitunem he an nen samban ikhi logolik he,” Neisena Allah nendawinggen hambuget nobagain o!” iluk samban isigi.

¹⁰ Andem oba re an nebe at Semaya hun Delaya amlogo, nen at Mehetabeel omba a'nogo, at ebe an nambit wesu elok legen he oba lagi. Lagimo re aren an noba ikhi logolik he, ”Aben hat hoasuogeluk ili'lagwi andi nen he, o yogondak hup yiba hoasi nogo re nit ninebe pire net he o TUHAN Awi wuri'mo hina'lasi lambik he, kwe sou kelok mondogat warik lambik logouwogo,” iluk yaganete.

¹¹ A'nogo ikheba nen he an nen onggo yagati logolik he, ”An he ap we tulem at heise lagirek nagun he lego. An nebe ap we mene welagimo re, an nebe noasugun logoumo o TUHAN Awi wuri'mo andoma ku lek hak. Enggere an nabiro!” iluk yagati.

¹² A'nogo yagatirigen wene a'nogo faget ninggi'nogo hilingiti ha iluk wil-walhigirigen he, an nen anggikhi logolik he an miming nabi'lago mene yi re Allah nen ikhemo re fuk, athe at Tobia inom, Sanbalat inomen agama. Iren he at Semaya ariba wene a'nogo yagasi lan iluk onggo inenggi a'makwe wogotama higi iluk nelu aga.

¹³ Iren anggikhi logolik he an nailo a'luk iren hilingisugun iluk aga mene andi ombo'ne higithogo asigin halok he an weak hilingisigin anggagasik hilingita. Nen, an weak hilingisigin andiba re iren iaple agama iluk an nenu weagerogo fuluk aren a'nogo hilingite mene iluk afuni nen tindelhi logouwak anggagasik hilingita.

¹⁴ A'nogo hilingitaba nen he an nen samban ikhi logolik he, ”Neisena Allah, it ap Tobia inom, Sanbalat inomen hilingiri'lagwi andi faget ebethan. It inoba unggum wogisan! Nen, athe nabi Noaja andi inom nen it nabi fenakwe inomen an nendawimo nailo asuageluk kwelabi'lagwi mene andoma inomat unggum wogisan,” iluk samban igi.

Pak leget a'nogo wurep kobokhogo wanhukwa wene

¹⁵ Leget pak mene a'nogo wilik lagu kwelek enek he inenggi wenagaisogo 52 huli nen wanhugusik he tanggal 25 tugi niren wenati lago mene enu Elul andiba nek he mondok kobokhogo wanhugu.

¹⁶ A'nogo wanhugumo re it ap inunggulenu inap horok-horokwe andoma welagaukwa mene nen, a'nogo hilingito mene a'nogo faget holhukwasik he, ”Leget andi re Allah nen leberinafu kwelek wanha,” iluk, it mondogaren inelu agama re, it inenggali aga.

¹⁷ A'nogo hilingitu kwelek he it ap Yahudi mene inogogwi melalinafu mene omanogo fena nen he at Tobia inom surat pal-pal aga lagaukwa.

¹⁸ At Tobia ebere hun Arah amlogo Sekhanya a'nogo eyamal hilingi'mo a'luk he ap Yahudi mene hokhorogo nen at Tobia inom sebeti lagaukwa. Andi nen ekhe at Yohanan, hun Tobia amlogo a'nogo nen he hun Berekhnya amlogo Mesulam a'nogo a'logo andi helasikhemo nogo nen he inom sebeti lagaukwaat.

¹⁹ Nen, at Tobia nen he surat hundik-hundik an nendawimo nailoap kwelagaisogo iluk palhu nek welagaikheba nen he it afuni Yahudi mene melalinafu mene andoma nen he an neilhanem at Tobia nen fano aple hilingitu mene omanogo tindelhu mondok welagaukwa. Andi nen an nane ugu mene omanogo re iren at Tobia ba tindeli laga lagaukwa.