NAHUM 2 - Allah Wene Fano Wene Hupla Inane

O Niniwe mene inomame leget fisasukwa wene

¹ Yago, hit Niniwe hinap yi hinesanggo holini o! Hit weaget hinabugun mene re mondogat asi wagaikha! Hiren hinaleget hinebe hinoasinogoluk waganek mene andoma fanorogo kagalek logoni! Ebekhalem kagalek logolik he, weim yabugun mene fik-fouge'ni.

² (Ibi-eberogo nen enggere At Tuhan nen attak afuni Israel mene inomame were'ma it inebe inaselei mene nen fakfisa elo'lek welagaukwa a'nogo hak hilingik logobagaigeluk halogo hinobagagin o.)

³ Hit hinaselei mene inandok peigengge re eil mep mene, nen inasu re eil misik mene laberek mene re eil mebat hilingik. A'nogo hilingi'mo re it hinaselei mene nen inebe leget fisa kugun iluk, mondogat fik-fouksek werek. It inangge kereta posiemanggen mene andoma re endu amulok higit amulit fili'lago. Nen, it inangge kuda re eisok sembel-bel wari'lago.

⁴ Ebekhe kwe re inangge kereta omanogo palfigi'lek weri'lago, nen kweang healekwe re it inebe sik-mugengge weri'lagwi. A'nogo hilingirik wagunem it inebe re endu amulok hilingitarek hak inom, eilaburen hilingitarek hak inom, kulunghogo lagik wagik, hilingirik weri'lagwi.

⁵ Ap sikhe fisogo inap omanogo weim yabi we'ni iluk wolinafunem wagu sambul inom, iren ap inoasugun iluk kwi lagu sambul inom he, it ineisok a'lip sulukhogo talori'lagwi. It he inebe hale'legengge o kota leget pa'leget wagane'ma omanogo asi laluk he, iren o pin tali kugungge a'nogo weak-weak inenggi omamerogo tamakhogo lakfisogoin iluk fougeri'lagwi.

⁶ I lagu agai anggwe lagukwe mondogat halogo-halogo hutfilik lagunem, afuni it inebe raja awi silimo welagaikharek mene omanogo youk laluk he, inailo ari'lagwi!

⁷ A'nogo hilingiti logolik it inagaisa ratu a'nogo senfugunem, it helime he andi faget halhu welagaikharek mene omanogo re inendawimo weak a'luk he le ari'lagwi. Le a'nogo agu mondok logolik inendawinggen heiselhu nen he fong warogo, sue yangwi nen hilingiterek hak inenggi nen inamik pothili'lagwi.

⁸ Afuni Niniwe mene re i helage palek mene huthugunem houwakhogo lagarek hak it inebe telfol ili'lagwi. A'nogo hilinglagunem afuni nen inane ikhi logolik, ”Po'logoni, po'logoni!” iluk ili'lagwiba nen he, it ekhe nen sugulogo wesure inabit mondok werek.

⁹ O kota yiba re inangge yi mene ti mene mondok hokho-pokhorogo hilingik enggere, inangge emas inom, perak inom mondogat andoma hugul hela kwino!

¹⁰ O Niniwe re mondogat wolelenggen tagalogo hilinglagama re, afuni inom, yi mene ti mene mondogat inom inane mondok tiring-terengsekma re, o andoma lei pirimhogo hilingik. It inailo nen inendawimo mondogat maben aga. Ineindep mondogat omame lek agasik inoak leigeri'lagwi. Afuni mondogat he inelokhe heiselogo ofuselogo hilingik.

¹¹ O kota a'nogo re yogondak koma werek nogo? O kota mene singa helep elema nogoikherek oba hak hilingi'mo a'nogo re koma werek? Mene singa eagwi nunggu mene wogisikherek oba, nen singa holou mene inom ai mene inom inebe misik a'luk werek oba, nen singa eagwi nen ogo inailo legengge werek oba omanogo re koma werek?

¹² Attak he, o andoma mene singa nen senggelhu mene senggelikhi laga, a'nogo senggel fuluk he, tulukhogo mene singa he mene inom eagwi inom faget fisikhi laga. Aren he inawi wuri'mo omanogo re eino senggelek senggelherek mene omanogo nen hopot fikhi laga.

¹³ At Tuhan Omame Mondok Hokho mene a'nogo nen ikhi logolik, ”An he, hit hinaselei mene welagi o. An nen hit hinangge kereta andoma mondogat endu nolhik, hit hinagoromi sikhe fisogo mene weim oba nen inoatik, nen hiren yi mene ti mene afuni amu mene inangge helikhi lagep mene andoma mondogat he An nen heligik, igin o. Nen, hiren ap yonggo lakfisikhi logolik yi'nogo kinosi lani iluk ikhi lagep mene andoma re ekhe holhi logogun mondok lego,” iluk yagaisasikhe.