MIKHA 6 - Allah Wene Fano Wene Hupla Inane

Tuhan nen he hit weak hilingiti lagep iluk Israel mene inoba hikhibet isasikhe wene

¹ Hit afuni Israel mene yoma, hineisena Tuhan nen wene hinoba hikhibet hisili'lago hilingi'mo re hinesanggo fanorogo holini o. Tuhan neisena, afuni Israel mene nen kwanirek mene mondok hilingiri'lagwi andi nen he Haren inoba hikhiberisagain iluk hilingiti lagen mene andi hilingisin o. A'nogo hilinginafunem he tom hokho mene inom endep mene inomen he Hat hane igin mene inesanggo holuago.

² Hit tom inom kweang huli werek mene inom, Tuhan nen wene hinoba hikhibet hisageluk ili'lago mene andi holini o. Allah nen he againafuri Israel mene unggum inoba fagain iluk hilingiri'lago andi.

³ Tuhan nen a'nogo hinoba hikhibet hisikhi logolik yi'nogo ili'lago, ”Nagainafuri e, An nen he, hit hinoba ninggi'nogo hilinghinafimo nen nogo? An nen wene ero kiba weagethinafigi nogo? Wene onggo yagane'ni o!

⁴ An nen he, hit hinombawi afuni Mesir mene nen inamingmingengge higit ferinarek were'ma, telinafigisik, Musa inom, Harun inom, Miriam inomen woginarek wesuageluk inayonggo fisasigi.

⁵ Nagainafuri e. Hun raja Balak awi Moab mene a'nogo nen hinombawi weagetfisagain iluk hilingitikhemo nen ap Beor amlogo Biliam a'nogo nen onggo yagatikhe mene aremnogo eberek logoino. Nen, o Sitim o tenda meneba wuri'mo welagaukwasigen hobuk o Gilgal o tenda wusuogeluk tulem andoma waga logolik, hilingitukwa mene andi hinendawimo eberek logoino aro. A'nogo eberek logogun halok he, An nen telhinabigin iluk hilingiti lagi mene andi fut fogoin o,” iluk isikhe.

Tuhan endawimo amolo anggikherek mene re ki mene wogeti logogun iluk isikhe wene

⁶ Niren nineindep awi yagaisogo nineisena Tuhan Allah pogoroba mene a'nogo obaget hilingisuogeluk he, nena mene wogosi waga logogun nogo? Niren At obaget endawimo agaiyek hoageluk wam warogo noleti logolik he, wam sapi ket kotorek mene warogo nolesu hak anggegep?

⁷ Niren wam domba mondok hokho-pokhorogo inom, zaitun amusu hokho-pokhorogo inom, At obaget waluk fei wesumo nen he, At endawimo agaiyek asu haknogo a? Nit weak hilingiti lago mene andoma lek hilingisogo fouwageluk, nit ninagainafuri manggusa mene warogo Allah obaget fuluk wogosumo re higira?

⁸ Lego! We nineisena Tuhan nen nit fano mene hilingiti logouwageluk weinamhogo yaganisikhe mene ebere yi: Afuni amu mene inoba higithogo nek hilingfisigik, nen, inendawi hundik hilingitarek mene andi ero omamet figik, ninendawinggen sebelek logolik Allah ninom hundik welagik, hilingiti logogun andi nek he mondok esin o.

⁹ Tuhan omame werek iluk anggikhi logolik hilingitarek mene andi re, ap mondok hebelek mene nen hilingitarek he andi aro. Nen, Aren afuni o kota ba werek mene inoba yagaisikhi logolik, ”Yago, hit afuni o kota ba welagep mene andoma hinesanggo holini o!

¹⁰ Ap inanini mondok weak mene inaiba andoma re inangge yi mene ti mene inane nen lalhigik helagarek mene werek. Iren yi mene ti mene enggin walhikhi logolik, ilirengge ebe mene werek kwelek taganhogo walhagarek mene andoma re, An nen nabit anggigirek mene hilingiri'lagwi andi nen he nonggorasigin lego, Ap a'nogo hilingiri'lagwi mene andoma re An nen unggum inoba fagain.

¹¹ Ap lisu anomor henarogo palogo waluk wagik, kilo henarogo walhogo waluk wagik ugu kwelek, An nen wene oba figi'lek nafe motfisagain nogo a? Wene oba fou hagaro.

¹² It ap kaindek inenggi werek inap hit hinawi kota andoma werek mene nen he inaniniba nek ap inenggi lek mene omanogo sebelogo fisagarek. A'nogo hilingitunem hit hinebe mondogat he hineranhogo wene lalinabugun mene nek hilingiti lagep.

¹³ A'nogo hilingiti lagep andi nen he, yogondak hit hinaweak hilingiti lagep andi onggo An nen ogo yei hinoasimbik wolelenggen tagalogo hinoasigiluk welagi o.

¹⁴ Hit he, hinamburu ninggi logogun oba nen, hinoba homot hinobagagi'lek nelerogo nek logogun. Nen, hiren hinangge yi mene ti mene helaluk waga logogun oba nen he, obalik foukse'ma fikhi logogun lek. Hiren hinangge yi mene ti mene foukse'ma fikhi logogun oba nen he, An nen weim oba nen mondok wolelenggen tagalogo fikhi logogin.

¹⁵ Hiren hinangge gandum awi feik lakfikhi logogun oba nen he enggen palikhi logogun lek. Nen, hinagayo zaitun amusu keralikhi logogun oba nen he, i amusu ebe hit he ninggi logogun lek, nen hiren hinagayo anggur enggen perelikhi logogun oba nen he i anggur amusu andi ebe hit ninggi logogun legat.

¹⁶ Andoma mondogat a'nogo nek hikhi logogun andi re, hiren hun raja Omri inom, at amlogo raja Ahab inomen inobabut mondok weak hilingiti lagaukwa mene omanogo ilirenggerogo nek hilingiti lagep. Nen, ekhe re iren hilingiri'lagwi mene omanogo hiren ogo hilingiti lagebat. Andiba re, An nen hit hinebe mondogat weagerogo hinobagaumo re, yi afuni ti afuni inunggulenu lombogen piliphogo pelakhinafi logolik hinebe weaget hinobagakhi logogun o,” iluk yagaisasikhe.