MIKHA 1 - Allah Wene Fano Wene Hupla Inane

¹ Afuni o Yehuda ba welagaukwa mene inogogwi raja Yotam inom, Ahas inom, Hizkia inom hobugalep mendek logolik melalinafu were'ma, Tuhan nen afuni Samaria mene inom Yerusalem mene inom wene inoba asigin mene faget yagaisoageluk, hun Mikha awi kota endepma enu Moresyet mene andiba wene fesikhe.

Afuni Samaria mene inom Yerusalem mene inom wene inoba fagain mene faget husumbi tak yagaisasikhe wene

² Hit afuni hinunggulenu lombogen he an wene igin mene andi fanorogo holini o! Hit afuni o yi awi ti awi welagep mene nen he an nen wene igin mene andi furogo futfikhi logoino. Tuhan Lego Mondok welagarek mene a'nogo nen hit hilingiti lagep mene At eil oba nen fakhogo hinenggali wasigiluk, At onggwarek aiba mondok hore'ma omanogo nen ane ili'lago a'li andi hinesanggo holini o.

³ At ebe werek oba obalik mondok hore'ma omanogo nen pi wagik, o kweangma yi awi ti awi tomkwe inom, punukwe inom mondogat eisok filik weri'lago andi.

⁴ A'nogo pi waga logolik tom unggul andoma At eisogen sebelik wagunem he, hendali endu amulogen nunggunem lebelek agarek andi hak hilinglagik. Nen i tom oba nen wilipluk lagarek hak kweang he mesagen waluk o tonggokwe pi lagik, ikherek.

⁵ Afuni Israel mene nen he, Allah inabithogo logolik, ane sagalogo weagenek hilingiri'lagwi andiba re, wene igi mene andem mondogat hilinglasigin o. Ero sa weak elekwe afuni Israel mene weak hilingiri'lagwi nogo? Ero re o kota Samaria eroma werek mene omanogo inonggwaregen aro. Nen, ero sa weagen it afuni Yehuda mene tugwi kembu fogerari'lagwi nogo? Ero re it afuni o Yerusalem mene inonggwarek weagenaro.

⁶ Andi nenat nineisena Tuhan nen mel ikhe, ”An nen Samaria mene inaiba andoma o meisalek helep enek kabok lagagunem o leimo andoma afuni nen anggur awi yati logouwageluk hilingisogo figik, o meisalek helep andoma o tonggoma kaboget figik, o tik warek mene mondok weinamet figik, igin o.

⁷ A'nogo hilingfembik, inandugwi kembu onggo hokho mene weaget fisigik, nen hemi tugwi kembu awi wuri'mo obaget hilingitunem, yi mene ti mene ebe lombok wogisagarek mene andoma mondogat endu nolfisigik, tugwi kembu afuni inalik hilingik mene andi mondogat legetfisigik, igin o. Nen inangge yi mene ti mene tugwi kembu obaget hilingitunem inenggimo mene fano agarek iluk werek mene omanogo, yogondak he mondogat it inaselei mene nen felelenghogo helaluk laluk he it mene inandugwi kembu omanogo obaget hai warogo iluk hilingiti logogun o,” iluk ikhe.

^8-9 A'nogo hilinglasigin ikhe andi nen he, an Mikha nendawimo mondok weak agarik le aga lagi o. Afuni Samaria mene inom, Yehuda mene inom inoumo mondok weak mene inoba agasik, afuni kota kuogeluk pa'leget ambe palekwe nen kwagarek andi hak, weak mene andi afuni an werekwe mene o Yerusalem welagaikharek mene inoba asigiluk wagasik werek andi, An hobuk nendawimo weak aga andi enegat asuageluk su laberek legat nen neisok sepatu kwelabek legat, kwe nikhi logolik, mene ane kouwaterek andi hak inom, sue hugubi ane ikherek andi hak inom ilik nikhi logogin o, iluk igi.

Afuni Israel inap inaselei mene re o Yerusalem horogat asi wagaikha o iluk isikhe wene

¹⁰ Nit ninoba weak mene asi waga andi faget, nit ninaselei mene o Gat mene andoma yagaisa fugo. Hit le aga lagep mene andi it ineilenggen hisoageluk weinama le asu fugo. Yago hit afuni o Bet-Le-Arfa hinap yi. Nit mondogat weak asugun iluk ikhi lagep mene andi enek asuageluk he wul ebene andoma limbik-lambak ikhi logoni o!

¹¹ Hit afuni o Safir welagep mene yoma, hele warogo wokhinarek logoin oba andoma hinasu nonggologo lakfisaluk hinenggali nen niknangenggerik logoin o. Nen o Zanaan mene re inailo legengge inawi kota nen wulibi wesugun lego. Nen, afuni o Bet-Haezel mene re wene andoma faget le ari'lagwi mene andi hiren holhambik he, o andoma ogore elele woginabi'lagwiat higi, iluk anggano aro.

¹² Tuhan nen enggin-fenggin lakfei wagama o Yerusalem leget pa'leget waganek mene a'nogo arat pakhot oba asi waga andi nen he afuni o kota Moret mene re, nit lebetnisogoin iluk hinendawimo eberek logou fugo.

¹³ Yago hit afuni o Lakhis welagep mene re, hinebe kereta ba lagaluk heise lobagaigen he, hinanggo kuda ba kelfembik lano. Hiren tak afuni Israel mene nen weak hilingiri'lagwi mene andoma inobabut wokfuluk, hiren a'nogo hilingiti lagep andiba re, afuni Yerusalem mene ogore hit hinobabut waganogo weak hilingiri'lagwiat andi.

¹⁴ Yogondak he hit afuni Yehuda mene yi, hit he o Moresyet-Gat a'nogo longgot umo nongasuogeluk welagep. Nen, it raja Israel mene re o kota Akhzib en ekhe leberisogoin lek.

¹⁵ Yago hit afuni Maresya mene yi, Tuhan nen hit hinebe it hinaselei mene nen hinawi kota sebeli kwi wesimbik logogun mene andoma inenggiba hinobagagin o. A'nogo hinobagaumo re afuni Israel inap melalinafarek mene inomame hokho andoma re o Adulam oumo andoma hina'lasimbik logogun.

¹⁶ Hit afuni Yehuda mene yi, hinagainafuri hinendawinggen hundik mene hele warinarek logoin enggere, hit fong warogo enegenggerogo logobagaigeluk he, sue yi mene ti mene warek fili ninggerek mene unggul asili waganek andi hak, hinesi hinunggul oba mondogat hogolfilik lano o.