MAZMUR 92 - Allah Wene Fano Wene Hupla Inane

Fogerati logolik agarek awuni

¹ Linggene Sabat sambul kabogeti logolik wuni wulakfuluk agarek awuni.

² Nineisena Tuhan, Hat hoba niren hai wathafu aple andi re eberogo nenat hai wathafi lago mene andi re eberogo nenat hai wathafi lago o. Nen Hat Lego Mondok welagen mene fogethafi lago mene andi re mondok fano o.

³ Hat hendawi hundik hilingninafi lagen mene a'nogo faget he o huberat ineluet figik, nen Haren tiphogo nek hilingiti lagen mene a'nogo faget he o hubanggo ineluet figik,

⁴ gitar agale nomolo nen hilingik mene a'nogoba kong etik, pinggong gambus inom kecapi inom watik, ugu kwelek agarek mene andi re hilingisu higit obaat hilingiti lago o.

⁵ Haren hilingiti lagen mene andiba re an nendawimo nagaiyek mene hilingnobagali'lago, Haren yi mene ti mene elalhigin mene andiba re an nendawimo nagaiyek mondok agunem, nawuni warikhi lagi.

⁶ Tuhan neisena, Haren ekhe mene ekhe mene hilingiti lagen mene andoma re mondok hokhorogo hilingik, Haren wenggelhi lagen mene andoma re mondok uanhogo wenggelhi lagen!

⁷ Afuni morue mene nen he futfou lek hak, afuni kembu mene nen he wenggel hare elo'lek.

⁸ It afuni Allah ane holda-holda hilingitarek mene andoma re engga heiselogo wuliferek andi hak hilingik welagik, nen afuni ina'mage weak mene omanogo re inenggi werek a'luk inangge mondok hokho pokhorogo hilinglagik, agarek. Oba nen he ariginik kwelek Hat Tuhan he hetok mondok logoginmo re,

⁹ it andi inebe mondok mondogat leget fisagain o.

¹⁰ Tuhan neisena, it Hat haselei mene andi re inebe felelenghogo leget fisigik, it afuni inanini weak mene mondogat telfol isigik igin mene andi re, nit mondogaren he ninelu welago.

¹¹ Haren he an nebe no banteng eil polok mene omame welagarek hakhogo hilingnobagasigin, nen an nebeba nagaiyek mene nek fanotnobagagik isigin.

¹² An he it naselei mene mabenet lagaikharek mene andi re neilenggen isikhi lagi, it afuni an noasuogeluk nawene melalogo fuluk nanggomo pali'lagwi mene andoma mondogat he nesanggo holhi lagi.

¹³ Afuni inobabut higithogo nek hilingitarek mene and re e kurma asimit lagaikherek higit welagik, nen e sin o Libanon nen mondok muli-muli wiliferek andi higit welagik, ikhi logogun.

¹⁴ It andi re, e o Tuhan Awi wuri'mo yakfugu mene hangge welagik, nen nit nineisena Allah awi wuri'mo andoma nen hokho agu mene hakhogo hilingik logogin.

¹⁵ E endam agayoba nen enggen itu mondok logolik, engga mondok mulirogo ket fano welagarek a'nogo higit, hilingik logogun.

¹⁶ Andiba re, At Tuhan nen ibi-eberogo hilingiterek mene a'nogo inom, nen Aren an nili waganogo nebikhit agarek mene a'nogo inom, Aren henarogo ekhe hilingiterek lek mene a'nogo inom enek aga logogin o, iluk fogeratikhe.