MAZMUR 87 - Allah Wene Fano Wene Hupla Inane

¹ Nineisena Allah awi kota re onggwarek andom horek mene a'nogoba wutikhe.

² O kota Israel oba andoma mondogaren we kota Yerusalem enek he endawinggen hundik mene werek.

³ Hit afuni Allah aiba kota welagep mene andi hinesanggo holini o. Hit hinawene mondok fano mene ikhi logolik he, mel ili'lago:

⁴ ”Afuni Mesir mene inom, Babel mene inom, it afuni inebe inunggulenu lombok, an nane hologo hilingitarek mene, inenu lisu palek werek oba andoma misi'mo palfagain o. It afuni Filisitea mene inom, Tirus mene inom, Etiopia mene inom, it afuni Yerusalem en tagongge mene inom, inenu misi'mo wenagaisogo palfagain o,” iluk ikhemo werek andi.

⁵ Nen tom Sion oba re afuni ekhe nen ikhi logolik mel ikhi logogun: ”Yi afuni ti afuni inebe mondogat, inunggulenu lombok, it Yerusalem mene inom sebetfisamo re, inebe misigat lambulasugun o. A'nogo hilingisogo fisamo re, Tuhan Lego Mondok werek mene a'nogo nen inomame werek mene hilingisogo fisagain,” iluk ikhi logogun.

⁶ Nineisena Tuhan nen he, afuni ekhe inunggulenu lombok, Yerusalem en tagongge mene inom misi'mo inenu lisu palek werek meneba kwelakfagain.

⁷ Misi'mo a'nogo fisamo re, wuni wati logolik mel ikhi logogun, ”Nit ninaiba ninagai elesi mondok fano mene ero re o Yerusalem o,” iluk inagaiyegeti logolik wuni wati logogun.