MAZMUR 85 - Allah Wene Fano Wene Hupla Inane

Afuni inunggulenu mene faget fanot fisikhi logouwageluk samban isikhe wene

¹ Afuni nen wuni wulak fuluk inebe seberogo ugunem yanggulinafu mene faget. It inunggulenu Korah mene inawuni.

² Tuhan nineisena, Hat he honggwarek hanggweang faget hendawirek logolik it afuni Israel mene inoba hilingik welagaukwa mene a'nogo Haren ambotkwe fanot fisegen.

³ It hagainafuri inaweak hilingita mene andoma re Haren mondogat honggoraphogo fisegen, iren kwanirogo hilingirik laga lagaukwa mene omanogo re Haren mondogat leget fisegen.

⁴ Haren hanini it inoba fuluk welagagin mene a'nogo re mondogat oak waganogo wanhiginmo re, Haren hanini ekhe it inoba fikhi lagen mondok lek andi o.

⁵ Neisena Allah, Hat he nit ninagap telninafi lagen mene welagenma re, Hat ha'mage nit ninoba ekhe inom fugun o, nit ninebeba hilingik welago mene andi re Haren ambotkwe fanotninobagain o.

⁶ Haren he mondok-mondok faget wena'nisugu logogin nogo a? Nen ha'mage ninoba fugu mondok logogin a?

⁷ Haren nit lebetninafi lagen andiba nit hagainafuri ninagaiyek hikhi logogun nen he, Haren ninambotkwe ninomamet ninobagain o.

⁸ Tuhan nineisena, Haren hendawi hundik hilingninafu welagen mene andi inuk isan o, Hat hoba nen ninagap telogo ninobagakhi lagen mene andiba telninabin o.

⁹ Niren ninambotkwe sugulogo weak hilingisi lago lek halok he, hit hinendawi serogo logobagaigen hinobagagin iluk Aren nit againafuri ninoba wene watnisikhe. Arigini'mo an he, At nineisena Tuhan Allah ane ili'lago mene andi nek nesanggo holek logoile namolo welagi o.

¹⁰ Aren he afuni wene melalek futfuluk hilingiri'lagwi mene re ibi-eberogo nenat inagap telinabigin werek, At Allah mondok andungdang werek mene andi re nit ninaiba yoma logogin.

¹¹ Inendawi hundik hilingitarek mene andi inom, tiphogo hilingitarek mene andi inom he misi'mo ambi aga logogun, nen katokhogo hilingitarek mene inom inailo legengge fano werek mene inom he, afuni nen hilingitarek higit inobakhe felik puk-puk aga logogun o.

¹² O kweangma afuni nen inaberali agi'lek tiphogo nek hilingiri'lagwi mene andi re yi mene ti mene wuliferek higit lagagunem he, At Allah nen katokhogo hilingiterek mene a'nogo re pogoroba nen pelak ha wagarek.

¹³ At Tuhan obabut fano nen hilingninobagagu halok he, andiba nit ninanggweang oba nen enggen ugu fano mene wo'nisikherek.

¹⁴ At Tuhan elokhoma re katokhogo hilingiri'lagwi mene andi tak lagunem he, ebekwe At faget yagaisogo filik laga logogin.