MAZMUR 83 - Allah Wene Fano Wene Hupla Inane

It inaselei mene inom weim yabuogeluk logolik lebetninabin iluk samban isukwa wene

¹ Wuni misik ekhe hun Asaf Awuni re yi.

² Neisena Allah, Hat he hafe morogo logolik, henggi sirogo aloksek logou fugo.

³ Heilenggen han, it Haselei mene omanogo nen inane sagal pagalhogo nek hilingitik, afuni Hat hoba inabit anggili'lagwi mene omanogo nen wene oak sagalugun mene nek hilingitik, hilingiri'lagwingge andi.

⁴ Iren he inonggwarek inawenggelek oba, Hat hagainafuri mene omanogo inoasugun mene faget enek wene palhu welagik, Nen afuni Hat hoba lomborogo werek mene omanogo inoasugun iluk inane misik seberogo matu welagik, ugu werego.

⁵ Iren ikhi logolik he, ”It afuni inunggulenu Israel mene ari ekhe were'ma inenu ikhi logoinogo re, niren inebe mondogat leget fisouwogen we'ni o,” iluk ili'lagwi.

⁶ Yi afuni ti afuni inunggulenu lombok omanogo inebe misik a'luk he, Hat hane sagalugun mene nek hilingiri'lagwi andi,

⁷ it inunggulenu Edom mene inom, Ismael mene inom, afuni Moab mene inom, Hagar mene inom,

⁸ it inunggulenu Kebal mene inom, Amon mene inom, Amalek mene inom, inunggulenu Filisitea mene inom, afuni Tirus mene inom,

⁹ it Asyur mene inom ogore it inom sebetasik he, at Lot en tagongge mene omanogo inenggi ineisok legetu mene agaikha o.

¹⁰ It andi re afuni Midian mene higit hilingfisano o, it hun Sisera inom Yabin inom, i Kison ima nen hilingfisegenma,

¹¹ o Endor omanogo nen inebe leget fisasukwa mene omanogo re, kweang heiselengge hakhogo hilinglagaukwa o.

¹² It inogogwi melalinafarek mene andi re, it Oreb inom Zeeb inom, aremnogo hakhogo hilingfisano, nen it inogogwi inomame werek inap omanogo re Zebah inom Salmuna inom hakhogo sebelfisano,

¹³ it andi nen ikhi logolik he, ”Nit he kweang At Allah ebe werek oba andi sebeli kuogeluk welago,” anggagarek.

¹⁴ Nineisena Allah, it andi re wul age hakhogo Haren telfol isano, nen afulfulengge sogoien funhogo lakfisikherek higit hilingfisano.

¹⁵ Endu nen o ogoi ninggerek higit, nen endu amulok tom-tom wialik lagarek higit hilingfisano.

¹⁶ Haren he hasieluba mugusogo lak fisigik, Hat hasogoi oba re it ina'manggen lakfisigik, ino.

¹⁷ Tuhan neisena, iren eberogoat Hat he esin welagen iluk herakhabuageluk he, it inebe mabenet fisan o.

¹⁸ It andi re mondok-mondok andoma inenggalirogo hilingfisamo re inailorogo logombik, youk la'lak inebe wa'lakhoago.

¹⁹ It andi nen he Tuhan Mondok Lego mene re we Hat enek logolik, o kweangma yoma mondogat he Hat a'ma nek werek iluk inelu asuak.