MAZMUR 80 - Allah Wene Fano Wene Hupla Inane

Allah againafuri mene inagap telek logouwageluk samban isikhe wene

¹ Afuni nen wuni wulak fuluk inebe seberogo ugunem yanggulinafu mene faget wuni unggulenu Bunga bakung ebene felalek mene higithogo, Ap Asaf en fagetikhe awuni.

² Nineisena Hat afuni Israel mene inobaget gembala welagen mene a'nogo hesanggo holin o, We Harenat it Yusuf en tagomangge mene omanogo wam domba ulukhogo waluk lagaikharek higit woginarek wagagin, Hat hebe re kerub amboloba hurek logolik wam yonggo palek konharek hak he, it Efrayim mene inom, Benyamin mene inom, Manasye mene inom, inelokhoma andoma,

³ haselek oba weinam asime o. Nen Hat hebe homame welagen mene a'nogo nit ninoba inuk nisan o, nen Hat hebe wesimbik he nit ninagap telninabime o.

⁴ Nineisena Allah, nit ninoba hilingik welago mene yi hal ninobagaime o, hendawinggen sakhorek oba helokhe wo'nisamo re, andiba nit ninagap telek logogun o.

⁵ Tuhan Allah neisena, Homame Mondok Hokho mene, it hagainafuri mene nen samban hayonggo fugu werek kwelek oba nen he, Haren ki huli wene ninoba fugu mondok logogin nogo?

⁶ Haren he nit ninamburu nahak he, le aga lago mene andi wo'nisigik, nen ninagai nahak he nineilamusu mondok hokho pokhorogo waga logouwageluk hilingninobagagik, ikhi lagen.

⁷ It afuni inunggulenu lombok, nit horok horokwe werek mene omanogo nen he, nit ninanggweang sebeluogeluk inane sagalhunem, it ninaselei mene omanogo nen endo ya'ninafi logolik inagaiyek asuageluk hera'ninobagegenma welago andi.

⁸ Nineisena Tuhan Allah, Homame Mondok Hokho mene, nit ninoba hilingik welago mene yi hal ninobagaime o, hobuk ninambotkwe fano hilingisogo ninobagaime o. hendawinggen sakhorek oba helokhe wo'nisamo re, andiba nit ninagap telek logogun o.

⁹ It Hagainafuri andi re e anggur awi hangge o Mesir en waganogo fisa wagagin andi. A'nogo wo'ninarek wagagindik he, afuni inunggulenu hunogo mene ekhe were'ma, Haren mugusogo wulakfisasigindik he, nit ninebe o andoma e awi yatarek andi higit, ya'ninobagasigin andi.

¹⁰ Yabu tagalharek hak, it inebe mugisogo wulakfisasigindik, inobali'mo nit ninobagasiginmo re, e omanggen kweangma ninghogo pelakfuluk enggi talogo lagarek andi higit, nit o yi awi ti awi mondok sagarek welagorek andi o.

¹¹ Anggur andi ebe e hangge lagaluk he, afumagengge nen tom mondogat salogo figik, agolerogo handogalhigik lagaresik he, e aras hokhondek mene mondogat sebelogo figik, ikherek.

¹² Enggi talogo lagaresik he, i laut tengah huli andomaba hilingi'mo, erembul he i Efrat huli sebelogo werek.

¹³ A'nogo meneat he nineisena Allah, nenahalok Haren ninaleget pa'leget waganek mene a'nogo meisalogo lakfisegenma, afuni ekhe waga logolik, anggur enggen inenggi abisak palu hak, weaget ninabuageluk herak ninobagegen nogo?

¹⁴ Anggur ero fano were'ma, wam maro nen feisalhik paik en enggen mondok ninggik u hak he, iren weaget ninabuageluk, nenahalok hera'ninobagegen?

¹⁵ Allah nineisena, Homame Mondok Hokho mene, Hat hebe pogoroba nen, nit Hat hagainafuri mene, heilenggen wo'ninabimbik, hambotkwe ninoba eme o.

¹⁶ Hagainafuri nit ninebe re, anggur awi yatarek andi hangge honggwaregen ya'ninobagasigin mene, asimit era'lu suphogo lagaikharek hak, Heranenat homamerogo kulninafendek mene, yogondak telninabime o.

¹⁷ Anggur ero lebekhogo endumo nolharek andi hak, nit ninaselei mene nen ninebe weaget ninabi'lagwi mene andi, Hat ha'mage it inoba fembik, it inebe leget fisano o.

¹⁸ Ap Haren wenatigin mene andi inom, nen afuni inamlogo manggusa tago Hat honggwarek faget omamet fesigin mene andi inom, agap telogo fisogo logoino o.

¹⁹ A'nogo fisogo logogin halok, nit Hat hebe herakhobagaluk ale'ma kwanirogo logoin mondok lego. Nit nineluk logolik, Hat fogethafu logouwagaluk, fanorogo fetninarek logoino o.

²⁰ Tuhan Allah nineisena, Hat Homame Mondok Hokho mene, nit ninebeba hilingik welago mene andi tak halogo ninobagain o. Nit ninagap telek logouwageluk Hat helokhe hebekhogo nit ninebikhit lakfei wesimbik hendawi sakhorek oba heilenggen kwela'ninarek logoin o, neisena.