MAZMUR 8 - Allah Wene Fano Wene Hupla Inane

Allah abok sagarek werek mene inom afuni esin hangge welagaikharek mene inom faget isikhe wene

¹ Afuni nen wuni wulak fuluk inebe seberogo ugunem melalinafu mene faget, at Getit awuni mene ane lisogo Daud en isikhe awuni a'nogo re yi:

² Allah nit nineisena, Henupogot mene, Hat Homame welagen mene andi re o kweangma yoma mondogat sagarek werek! Nen Hat habok lagarek menere O pogot soganogo ambolkwe po'limaat mondok lego welagen iluk,

³ it omalik fou mene nen inom, yenggerugwi magendek mene nen inom, wuniba fogethabi'lagwi. Hat hebe esin lego mondok logolik melalinafi lagen mene andi re mondok abolok lek ning maniberogo werek andiba re, It haselei mene inoba inom, hinom weim palek mene inoba inom inambe to'mot fisikhi lagen.

⁴ O pogot Haren walhogo fesigin mene ari inom, tugi hesagal Haren elalogo fesigin mene oma inom, an nen neilenggen kumuti logolik he,

⁵ afuni andi nek he ningginigen, Haren it inoba eberek mondok welagen nogo? It andi sani iluk, Haren inebe ferinarek mondok welagen nogo?

⁶ A'nogo meneat he, it inebe Allah Hebe welagen higithogo legeisogo fisegendik, Haren it afuni andi inenu werek logolik mondok esin lego logouwageluk hilingfisegen,

⁷ Nen Haren yi mene ti mene o kweangma logogin mene elalhigin engge omanogo it inenggiba logouwageluk homame wogisasigin. Nen Harenat it inane hologo logouwagaluk, eisewerek fisasigin.

^8-9 Wam domba, sapi mondogat inom, mene olomene enggama mene mondogat inom, yi rue ti rue, yi ikan ti ikan mondogat inom, i laut a'ma eluk welagarek mene mondogat inom, it inane hologo logouwagaluk, inenggiba fesigin andi.

¹⁰ Tuhan neisena, Hat he nit nineisena Tuhan welagen, Hat habok he o yi awi ti awi mondogat sagarek werek, iluk wuni watikhe.