MAZMUR 75 - Allah Wene Fano Wene Hupla Inane

At Allah re lego mene logolik afuni inawene higithogo pilingiterek mene werek iluk isikhe wene

¹ Afuni nen wuni wulak fuluk inebe seberogo ugunem yanggulinafu mene faget, wuni unggulenu, Mondogat unggul wasu fuk, iluk agarek mene andi bene felalek mene. At Asaf Awuni.

² Neisena Allah, niren he Harenek fogethafi lago, Haren yi mene ti mene mondok elalinhogo elalogo fesigin mene andoma faget fageti logolik he, Hat hai wathafi lago.

³ At Allah nen ikhi logolik he, ”An nen nenggi wenagaisogo fagain oba higit asi wesigin oba re, An nen inawene fanorogo pilingisogo nen katokhogo ayo paligin.

⁴ Kweang inom afuni kweang amboloba werek mene mondogat inom leigesigin, oba nen he, timuk warogo liabek mene andi re An nenat omamet fikhi logogin, ikhe.

⁵ Afuni inane nen lalogo agaugerik lagaikharek mene inoba re, ekhe inom agaugerik lanogoluk he An nane ikhi lagi andi o.

⁶ Nen, it ap weak hilingitu mene halok he, inobabut oba wonoget fakhigik, inonggwaregen leget fakhigik, inaneba sewirakhigik, hilingiti logoinogo.

⁷ Afuni inawene pilingisogo ayo wurinafu mene andi re abel timur fikhiren ogo barat fikhiren ogo, selatan fikhiren ogo wesigin lek enggere.

⁸ Oba nen he, At Allah amu nenat inawene pilingisogo ayo wurinabigin. Arenat it ekhe sebelfisigik, nen ekhe legeisogo fisigik, igin.

⁹ Tuhan anini re piala hangge At enggimo werek, nen piala andiba re anggur amusu arik weak mene hinago werek. At Allah nen he amusu a'nogo kweisal hugunem he, afuni inobaharo weak mene o kweangma yoma werek mene omanogo mondogaren ekhe herak figi'lek i a'nogo mondogat nogoin.

¹⁰ Oba nen an enek he At Yakub eisena Allah a'nogo faget enek fageti logogin. Nen At obaget wuni fogoratarek awuni iginafu mondok logogin.

¹¹ It ap inanini werek mene nen inomame werek mene andi re Arenat leget fisagain, oba nen he afuni fano hilingiri'lagwi mene nek he ekhe inom inomame aga logogun.