MAZMUR 64 - Allah Wene Fano Wene Hupla Inane

Telnabuageluk kinoti logolik samban isikhe wene

¹ Afuni nen wuni wulak fuluk inebe seberogo ugunem melalinafarek mene faget, at Daud awuni.

² Neisena Allah, an nebeba engginhogo logolik samban ikhi lagi mene yi hesanggo holin o, it naselei mene mondok nailo mene andoma inenggimo nen nagap telogo nobagain o.

³ Afuni weak hilingiri'lagwi mene nen inane misik makfuluk hilingisi weri'lagwi mene andomaba nen inom, ap inoba hinggi mene andoma nen inawene ina'malolo kwelabek mene nek makfuluk hilingitare'ma andoma nen inom, nagap telogo nobagakhi logoin o.

⁴ It inamelinggen he karok enggat merenghogo makfugunem hangge, nen inane haferogo agarek mene andi re tok enggat werelek andi hangge wulabi wagaikharek.

⁵ It inebe hinagoma logolik he wene ineranen wene wulabi wagaikharek, nen inailo higi'lek, afuni weak hilingitarek lek mene inenu weak peakhogo hilingfisagarek.

⁶ It inendawimo inaniniba hilingitu mene iluk wenggelharek mene omanogo foukhogo fisogo logolik a'nogo nek hilingitarek, nen iren anggikhi logolik he afuni nen ekhe nisili'lagwi lek iluk he, ka nen hele yephogo fogoin iluk inane misik matarek.

⁷ Iren he wene weak hilingisugun mene omanogo faget enek abok palhi logolik he, yi'nogo agarek, ”Niren wene palhi lago mene andi re mondok ninawenggelekhogo nek palhi lago,” iluk agarek. Afuni inendawinggen inom wenggelharek ero inom andi re mondok elonggoma hilingi'mo re afuni nen kwelakha re elo'lek.

⁸ Oba nen he At Allah nen andok it inoba pisinget isugunem he, it afuni omanogo ferekhogo nek inagap palherek.

⁹ It inonggwarek inane agarek oba inebe legarik lagaikharek, a'nogo hilingitunem it ekhe ineilenggen kwelaginarek logolik he inunggul kwanit hagarek.

¹⁰ A'nogo hilingitunem he afuni inailo nek agarek, iren he At Allah nen hilingiterek mene a'nogo faget ebetik, nen Aren hilingiterek mene omanogo fagetik, agarek.

¹¹ Andiba re afuni fano nek hilingitarek mene re At Tuhan nen hilingiterek mene andiba inagaiyek hikhi logogun. Nen it afuni higithogo hilingitarek mene mondogaren he, At enek legeisogo fikhi logogun, it inebe re At oba nek inagap telek logogun.