MAZMUR 59 - Allah Wene Fano Wene Hupla Inane

Telnabuageluk samban agarek wene

¹ Afuni nen wuni wulak fuluk inebe seberogo ugunem yagaisugu mene faget, wuni unggulenu: Leget fisogoin lek, iluk agarek mene faget felalek wuni At Daud Awuni, Saul en Daud ebe wasigiluk awi wuri'mo kagalek logoino iluk ap miminginafikhemo isikhe awuni.

² Neisena Allah, it afuni naselei mene andomaba nen fikhalogo wulak nobagain o, it afuni an noasuogeluk weri'lagwi mene andomaba nen an nebe telnabin o.

³ It afuni weak hilingitarek mene andomaba nen an fikhalogo wulak nobagain o, it ap ware andoma inenggimo nen telogo wulak nobagaime o.

⁴ It ap andi nen an noasuogeluk kabogetasik ye'narek werek andi yethani, ap mondok inobaharo hokho inap omanogo inebe mondogat sebe agasik an noasuogeluk hilingiri'lagwi andi. Tuhan neisena, an nen weak hilingitimo hakhogo hilingnafik, athe wene melalek ekhe taganhogo hilingitimo hakhogo hilingitik, ili'lagwi andi.

⁵ It mondogat fik-foukhogo hilingfagasik weak-weak o lasi kwi wesuogeluk hilingiri'lagwi andoma re, an nen naweak hilingitiba iluk ogore mondok lek oba nen.

⁶ Neisena Allah Lego Mondok welagen mene, Hebe menla'luk he lebetnabin o, it afuni Israel mene ineisena Allah re Hat welagenma re, Harenat heilenggen isan o. Afuni henarogo hilingitarek mene andoma re hendawirinafi'lek, Hebe heluk asimbik he it afuni inunggulenu lombok andoma wene inoba fuluk unggum wogisan o.

⁷ O hu'mo asi lagunem he it omanogo nekhengge lagokhogo we'luk, o kota kwe omanogo maserik nikhi logolik he mene nen hakhogo kouwarik nikho.

⁸ Iren he palfigi'lek hundik-handik puliarinafik, ina'ma seramet fisigik, hilingiri'lagwi o. Iren inane agarek mene andoma re karok enggat merenghogo mago mene hak hilingik, iren anggikhi logolik he afuni nen fut ninobagali'lagwi lek iluk anggili'lagwi.

⁹ Andiba re Tuhan neisena, Haren he it faget endo yaginafi lagen, it inunggulenu lombok andoma re Haren puliat fisikhi lagen.

¹⁰ An nebe nomame re we Hat hamu welagenma re, an he Hat hoba nek eberek mondok welagi, Neisena Allah Hat he an naleget waganek welagen.

¹¹ An neisena Allah obabut fano nen endawit napluk he, an nambit weri'lago, nen Aren he it naselei mene omanogo mabenet fisugunem an neilenggen hoageluk hilingnobagali'lago.

¹² It afuni an nunggulenu mene nen inonggot asinogo re, Tuhan neisena, Haren mondogat inoasu fugo. Tuhan Hat hawe a'ma fetninarek welagen mene neisena, it andi re Hat homameba mebenet fisaluk inebe telfol isan o.

¹³ It inambeba nen he weak mene nek agarek, athe ineranen wene nek ikhi logolik hururung inafunem he, iren foget fakhagarek mene andiba ke'nok ikhi logouwak.

¹⁴ Neisena Allah Hat ha'mage hokho mene a'nogoba it inebe leget fisan o, it inebe mondogat leget fisano o. Andiba re, At Allah nen afuni Israel mene melalinafi logolik werek iluk afuni inebe lombogen inelu asugun o, nen Aren melalinafi logogin mene andi re afuni o kweangma yoma mondogat sagarek werek, iluk inelu asugun o.

¹⁵ O hu'mo asi lagunem he, it omanogo nekhengge lagokhogo we'luk, o kota kwe omanogo maserik nikhi logolik he mene nen hakhogo kouwarik nikho.

¹⁶ It inebe re nunggungge herarik yi kwe ti kwe omanogo leil warik nikhi la'luk he, inoba homot lagu legen he inane kouwati logolik werek.

¹⁷ Oba nen an enek he, Hat homame welagen mene a'nogo hobaget hawuni watu welagirek. O wei ugunem hubet he Haren hendawi hundik hilingnafi lagen mene a'nogo faget inom, nen tiphogo nek hilingnafi lagen mene a'nogo faget inom, an nen nane fanoba hundik-hundik hawuni watu mondok welagi o. Hat he an noba enggin-fenggin agu sambul hawea'ma nobagaluk fetnarek welagen mene hilingi'mo re, An nebe o kuluk la hak he Hat hoba nek waga lagi o.

¹⁸ Neisena Allah nendawi hundik hilinghafi lagi mene, Hat he an telogo nobagagu mene welagen, Neisena Allah, an nomame kwelaknobagakhi lagen mene welagenma re an nen Hat hobaget wuni fogethafu awuni nek watu logogin o.