MAZMUR 54 - Allah Wene Fano Wene Hupla Inane

Awe a'ma fetninarek logouwageluk samban agarek awuni

¹ Afuni nen wuni wulak fuluk pinggong kecapi watu kwelek inebe ambine ugunem yagaisugu mene faget.

² At Daud ebe ”Nit ninaiba yoma hinago logolik werek,” iluk it afuni Zif mene nen Saul ambit lagaukwasik yagasi lagaukwama, at Daud en felalhikhe awuni.

³ Neisena Allah, Hat homameba an nagap telnabin o, nen Hat hareagun lebetnikhi lagen mene andiba re an nawene katokhogo palnabin o.

⁴ Neisena Allah an nen kino yagaheti lagi mene andi re nane hesanggo holnobagakhi logoin o, Hendawimo fanoba an nane ikhi lagi mene andi fut nobagakhi logoin.

⁵ It ap pok mene andoma nen an noasuogeluk hilingiri'lagwi, nen afuni foget fakhagarek mene andoma nen an neiloak leget nobagauwogeluk hilingiri'lagwiat, nen iren he Allah hoba ebetarek werek mondok lek,

⁶ oba nen he At Allah re an lebetnaferek mene werek, Tuhan andi re an nili wo'naferek mene werek.

⁷ At he an noba tiphogo nek hilingnaferek andi nen he, Arenat it an naselei mene andoma inonggwarek inaweak oba wene inoba fuluk inebe mondok leget fisagain o.

⁸ Tuhan neisena, Hat he fano mondok welagenma re, an nendawi fano nen Hat hobaget wam warogo wokhetik, nen Hat hebe hai wathafik, hilingiti logogin o.

⁹ An nebe elo'lekhogo were'ma Haren hele fikhalogo nobagegen, Harenat an naselei mene andoma inomame leget fisugunem neilenggen isikhi lagi.