MAZMUR 51 - Allah Wene Fano Wene Hupla Inane

Weak hilingitu mene sebelogo legetfisoagaluk samban agarek wene

^1-2 It ekhe nen wuni wati logouwagaluk, at Daud en he Batsyeba pailak hilingitikhemo, at Natan Allah ane yagaisikhi lagaikhe mene a'nogo nen he, ”Hat weak hilingiten,” iluk yagatikhesik oba nen Daud en wuni felalogo watikhe mene.

^3-5 Neisena Allah hendawitnabin o. Hendawitnafu mondok welagendek andi nen, hokhorogo hendawitnabino o. An weak hilingiti mene, nendawimo eberek mondok logolik, fakhogo figi andi nen he, mondogat weak hilingiti mene andi, sebelogo legetfisambik horogo nobagain o.

⁶ Hat hane sagalogo weak hilingiti o, Hane sagalogo figirik Hat helokhoma weak hilingiti o. Hat hendawimo weak anggikhi lagen meneat, heilhanem weak hilingitimo aro. Haren wene noba fegen andi re, fou higit obaat noba fegen o.

⁷ Eberogo nenat he an nagaisa alabutmo nenat weak ero noba agaikhemo re, nobabut weagat ta'nafikhe o.

⁸ Hat hendawimo re afuni inendawinggenma nen higithogo nek hilingiti logoilebe, iluk anggikhi lagenma re, Hat hendawinggen wenggelogo hilingiti lagen mene a'nogoba an nendawimo peterogo nobagakhi logoin o.

⁹ An hobuk nebe horek mene logouwagaluk, sobalnabin o. An o anggup mola andi hangge logouwagaluk, fanorogo horogo nobagain o.

¹⁰ Haren nendawimo weak hilingisogo fegen mene andi, hobuk fanotnafunem nendawimo nagaiyek asimbik, fano wene andi nesanggo holigen he Harenat yagane'no o.

¹¹ An weak hilingiti mene andi faget Hat helokhe kwanirogo logogun o. Yi weak ti weak hilingiti lagi mene andi re, sebelogo legetfisaluk horogo nobagain o.

¹² Neisena Allah, Haren an nendawinggenma fano horek mene hilingisogo nobagain o. Hoba lomborogo mondok logouwageluk, hareagun nendawimo peterogo fembik, nobabut ket mene hilingisogo nobagain o.

¹³ Hat hareagun fano horek mene an nendawimo werek mene andi wulakfisigik, Nen Hat hebe an heraknobagaluk lagik ugun o.

¹⁴ Attak telnafiginmo nendawimo nagaiyek hikhi lagagi mene, yogondak nendawimo weak welagi yi nambotkwe fano hilingisogo nobagain o. An nendawimo nagaiyek oba, hane hologo hilingiti logoigen he, nobabut ket mene hilingisogo nobagain o.

¹⁵ A'nogo hilingnabumo an nen he, it weak hilingiri'lagwi mene andi inafe hebelasimbik inambotkwe hoba wesuagaluk, wene haren yaganisasigin mene andi fakhogo yagaisagain o.

¹⁶ Neisena Allah telnafendek mene, an nendawimo nagaiyek hikhi logolik, haren higithogo hilingiti lagen wene andi, an nen yagaisilik laga logoigen he, noati'lek heraknobagain o.

¹⁷ Neisena Allah, an naneba fogethafi logoigen he, Haren an nambe hutfein o.

¹⁸ Hat he, wam warogo wokhesu re habit andi nen he, an nen Hat faget wam warogo nolhesigin mene ogore, Haren habirat andi.

¹⁹ Allah hobaget wam warogo nolhesu hak he, nit weak hilingito halok, nit weak hilingito iluk, ninendawinggen warugu logolik, ninafe hebela'luk Hat hoba wagunem, Haren he,” It hilingita andi weak hilingita iluk obokhogo herakfisigi'lek, hilingiti lagen mene andi aro.

²⁰ Hat hendawimo fano anggegen higithogo, kota Sion fanot fein o. O kota Yerusalem leget pa'leget a'nogo ambotkwe wusin o.

²¹ Hat hendawimo hamolo anggikhi lagen mene re, wam yi mene ti mene fano mene wokhetu halok inom, wam ebe abirengge warogo nolhetu halok inom, andi nen, afuni nen wam Hat faget warogo nolhetarek oba andoma wam sapi ai mene warogo nolhetu halok inom hamolo anggegendego, iluk wuni watikhe.