MAZMUR 34 - Allah Wene Fano Wene Hupla Inane

At Allah nen fano hilingninaferek mene faget wuniba fogeratikhe wene

¹ At Daud eranen ap Abimelekh eilhanem ebe kembu mene hangge hilingiti lagaikhemo, mugusogo ale'ma laga logolik wuni watikhe mene.

² An nen he, hundik-handik Tuhan enek fogeratu welagirek, nenggi ekhe kamo igi'legat hai watik, fogeratik ugu mondok welagirek.

³ Tuhan nen, fano hilinginaferek andi nen, nendawimo nagaiyeti lagi. Hit yi enggin ti enggin hikhi lagep mene andi, Allah abok hinesanggo hol fuluk he, hinendawimo hai hikhi logoino.

⁴ Hit an ninom seberogo Tuhan enu legeisogo fouwok, ninebe mondogaren at enu hokhorasuogen we'ni.

⁵ An nailo hokho logolik, telnabuagaluk Tuhan ayonggo fugunem, Aren fano telnaferek.

⁶ Afuni weak hilingisogo fisagarek mene andi re, it At oba eberek logolik inagaiyekhogo logogun, It yi enggin ti enggin hili'lagwi mene andi re, inenggali agi'lek inoba heanerogo logogun.

⁷ Afuni inonggwaregen hilingisu elo'lek mene nen Tuhan ayonggo fugunem, enggin-fenggin inoba werek mene mondogat he Aren leget fikherek.

⁸ It afuni Tuhan ebe inailorogo logolik ane hologo hilingitarek mene re, At agoromi malaikat en kwelaginarek werek, nen it andi weagerinabigiluk ugunem telinaferek.

⁹ Hiren At Tuhan nen fano hilingiterek mene andoma kwelakhaluk he, obabut palhi logoni. Afuni Tuhan awe a'ma welagaikharek mene re inendawimo inagaiyek hikhi logogun.

¹⁰ It afuni Tuhan inailorogo welagaikharek mene re, inelagaikhogo welagaikharek lek andi nen he, hit At againafuri mene nen he, At agaugwerati logoino o.

¹¹ Mene singa ebe oan mene amburu legen nele welagarek, meneat he, afuni Tuhan murok nikharek mene re, yi mene ti mene fano mene inelagaikhogo ekhe logogun mondok lego.

¹² Hit alage nagoromi, wene Tuhan oba hinailorogo logogun awene yagahisagain mene yi, hinesanggo fanorogo holini o!

¹³ Hit hinebe hineluk uanhogo logolik, yi mene ti mene fano mene nunggu welagaikharek mene andi hinamolo halok he,

¹⁴ hiren wene weak mene ekhe igik, Hit hinambeba nen it ekhe lalinafik, ikhi logogubo.

¹⁵ Inobabut weak hilingitarek mene andi agaiserogo herakfisaluk, fano mene nek hilingiti logoino o. It ekhe hinom lambul fuluk, hinebe fano seberogo welagaikharek mene andi, hinomamerogo hilingiti logoino o.

¹⁶ Tuhan nen he, afuni At ane holfuluk higithogo hilingiterek mene re eilenggen inoba werek, nen iren lebetninabuageluk ayonggo fugunem Aren inane esanggo holherek.

¹⁷ Oba nen he, it ekhe inobabut weak hilingitarek mene re elokhe age warisikherek. It inebe wa'lagu halok he, inoba eberek logoinogo iluk, inoba inonggoret fisaluk logouwagaluk hilingfikherek.

¹⁸ Tuhan he, afuni ekhe at ane hologo higithogo hilingiterek mene re, yi weak ti weak inoba wagunem, telinabuagaluk ayonggo fugunem inane esanggo holfuluk, telinaferek.

¹⁹ Tuhan he, it ekhe inendawenggen eak a'luk, inendawimo mondok weakhogo welagaikharek mene andi, inera'lu we'luk inebe telinaferek.

²⁰ It inobabut at ane hologo higithogo hilingitarek mene re, yi enggin ti enggin hokhorogo hagarek, oba nen he At Tuhan nen enek yi enggin ti enggin hagarek mene leget fisaluk telinaferek.

²¹ Tuhan nen ferinarek were'ma re, inoak misik iluk ekhe somboligin mondok lek.

²² It afuni weak hilingitarek mene andi re, inaweak hilingitarek mene andiba inebe wa'lasugun. It afuni ekhe nen it ekhe eberogo anggagarek mene inoba inabiret fisugu halok he, wene inoba fisagain.

²³ Tuhan nen he, At amingmingengge menere telinabigin. It At awe a'ma welagaikharek mene re wene inoba fagain mondok lek, iluk wuni watikhe.