MAZMUR 31 - Allah Wene Fano Wene Hupla Inane

Inendawinggen Allahba eberek logogun awuni

¹ Wuni wulak fuluk ambine ugunem melalinafu mene faget, Daud awuni.

² Tuhan neisena, an he Hat hoba lomborogo welagimo re, afuni nen an nendawimo ale mene hilingnobagauwageluk herak nobagagun o. Haren he mondok katokhogo nek hilingiti lagen a'nogoba an nagap telogo nobagain o,

³ an nane hesanggo hol haluk he, weak-weakhogo nek fikhalogo nobagain o. Hat hebe re an nagap telogo hina'laguba, tom helep eil silipnorek mene hak hilingnarek welagen.

⁴ Eberogo nenat Hat he an nobaget tom helep eil silipnorek mene hak hilingik welagen, nen ero mondok ningsek mene higit welagen! Haren wene watnetigin mene higithogo re, nawene palnobagaluk wo'narek laga logoin.

⁵ An he Hat hoba lomborogo welagimo re, Afuni nen an nobaget hele wephogo fili'lagwiba andoma nen lologo wulaknobagakhi logoin o.

⁶ An nebe mondok-mondogat Hat henggiba fikhi lagi o, Neisena Tuhan Allah, higithogo nek hilingiti lagen mene, Harenat an hele fikhalogo wulak nobagakhi lagen o.

⁷ Afuni tugwi kembu fogeratarek mene re Haren habiret fisikhi lagen, oba nen he, an enek he neisena Tuhan hoba nendawinggen tibetfuluk welagi.

⁸ Haren hendawi hundik hilingnafu mondok welagenma re, an nen fogerakhigik, nagaiyegetik, hilingiti lagi o. An noba enggin-fenggin hikhi lagi mene inom, nendawimo weak peakhogo hikhi lagi mene inom andoma re we Harenat futnobagakhi lagen.

⁹ It afuni naselei mene nen hele warogo wo'narek loageluk oboget niikhi lagen lek, athe an wene yi wene ti wene noba lek engge selekhogo laga logouwageluk hilingnobagakhi lagen.

¹⁰ Tuhan neisena, an nebe mondok weakhogo welagimo re hendawi nean o. Nale nek yakhugu-yakhugu re neilenggen mondok ou agunem welagi o, nebe re we nagupsak higit welagi.

¹¹ Noba ou hugu mondok were'ma nen enek he nebe neluk welagi mene a'nogo mondogat lek aga, yi tahun ti tahun nambelema set hoporogo werek kwelek enek he arat asi lili'lago. An nebeba wiik-weak hugu werek-werek he nomame mondogat legagik, noak mondogat abolok igik ikhe o.

¹² It afuni naselei mene ineilhanem he an nebe ap hele warek mene hangge aga lagi o, nen it nagaila'lak ninawi misikwe erarogo welago mene ninom ogore a'nogo nek hilingik welagi aro. Afuni an ninom enggawe fano mene omanogo nen ogore ineilenggen nealuk he youk lagik, nen ebekhalem salkwal uluk ogore linggi longgo igik, ili'lagwi aro.

¹³ An he afuni inebe mondogat wa'lagu mene hangge hilinglagarik welagi o, nen yi mene ti mene hugisaluk oba ebetarek lek andi hak hilingik welagi o.

¹⁴ Ekhe kwe-ekhe kwe mondogat namel-melhogo nek hilingi'mo re, it naselei mene nen inane nguluk habuk ugu mene andoma nesanggo holhi lagi. Nen, iren inane misik seberogo makfuluk he an noasugun iluk nanggomo pali'lagwi.

¹⁵ Oba nen he Tuhan neisena, Hat hebere an neisena Allah welagenma re, an he Hat hoba nek eberek mondok welagi.

¹⁶ An neluk he Hat enggiba welagimo re, it afuni an naselei mene andoma inoba nen inom, nen it an si'narek mu'narek nikho mene andoma inoba nen inom nagap telnabin o.

¹⁷ Hat hendawi hundigen an nagap telogo nobagain. Haren an hamingmingengge yi nobaget hendawimo hagaiyek habuak.

¹⁸ Tuhan neisena, an nen Hat hoba henu hombuk palhu mondok welagimo re, an nenggali asuageluk hera'nobagagun o. We it ap weak hilingiri'lagwi mene andoma nek he inenggali hoago, nen it inebere linglongengge afuni wa'la'luk lagaikharek oba andoma pi lambik, inane tonggok uago.

¹⁹ Afuni higithogo hilingiri'lagwi mene faget, iren foget fakhikhi logolik inobabut haferogo wene pali'lagwi mene andoma inambe to'mot fisan o.

²⁰ Afuni Hat hane hologo hilingitarek mene inobaget Haren inebe fano logogun mene faget iluk fouget fisikhi lagen mene andi re, mondok oba heilarogo hilingfisanogen iluk, yagaheti lagi o. Afuni Hat hoba lomborogo werek mene faget Haren fano mene nek hilingfisikhi lagen mene andi re, afuni hokhorogo nen ineilenggen hili'lagwi o.

²¹ Afuni weak hilingiri'lagwi mene nen inanggelem a'luk hilingitunem he, Hat helokhoma kwe palogo hinakfisaluk welagen. It inaselei mene nen inoba fu'mo hikhibet isugunem he, Haren it inebe inagap telogo hawea'ma fisaluk ferinarek welagen.

²² Tuhan andiat fogerasuok! An haningisogo kwelaknobagaluk noasuogeluk kwi wagunem At Tuhan nen endawi hundik hilingnabi'lago mene andi faget he, an nen fogerati lagi o.

²³ An nendawi nonghong ugunem logolik he, An he Tuhan elokhoma nen hukniikhe hea, iluk anggikhi lagi. Oba nen he, an nen At enu hombuk palogo yagatu sambul he, Aren an nane ugu mene a'nogo esanggo holi'lago.

²⁴ Yago, hit afuni At againafuri mene hinebe mondogaren he At Tuhan nen endawi hundik hilingninabi'lago mene andi faget hinendawi hundik hilingi'ni o. At Tuhan nen he it afuni At oba tiphogo hilingiri'lagwi mene re At awea'ma fisaluk ferinarek werek. Oba nen he afuni inobabut leget fakhaluk hilingiri'lagwi mene re, hambuget higi'lek unggum inoba fikherek.

²⁵ Yago, hit afuni Tuhan hinom hundik welagep mene yi re, hinendawinggen hambuget haluk hinomamerogo logoni!