MAZMUR 29 - Allah Wene Fano Wene Hupla Inane

Tuhan Ane re sogoi abologet ugunem anggele'ma werek isikhe wene

¹ Hit pogoroba hineluk welagep mene yi sani, Tuhan fogera'ni o, At andungdang werek andi faget inom, omame werek andi faget inom, fogera'ni o.

² At Tuhan enu ibi ebe mene andi fogera'ni o, At obaget hilingiti logolik su labetu mene andoma laberogo apne wanhi logoni o.

³ Tuhan ane re i laut agum oba nen ili'logo, Allah andungdang werek mene a'nogo ane re i laut hokho talek mene agum oba andoma nen supuk eri'logo.

⁴ Tuhan ane re omame mondok hokho were'ma, ane pak ugunem inesanggo holharek.

⁵ AT Tuhan ane nen he e wilibik mene erembul nagulogo selkwel isigik, e sin o Libanon omanogo lumbukhogo lakfisigik, ikherek.

⁶ Aren he tom Libanon a'nogo re sapi eagen holombokhogo lagagik-pigik hiligiterek hak hilingisogo figik, tom Siryon he no banteng eagen helalue wanherek hak hilingisogo figik, ikherek.

⁷ At Tuhan ane nen he eilabut kulunghogo sebeli wagarek.

⁸ Tuhan ane nen he o lei omanogo yelandi-kwelandit isikherek, Tuhan nen he o Kades lei a'nogo erak kwerak isikherek.

⁹ Tuhan ane nen he no rusa eak a'marek mene tatik, nen yi engga ti engga enggakwe wilibik mene omanogo lologo pelafik ikherek. A'nogo hilingitu kwelek At Tuhan againafuri mene re, At awi wuri'mo omanogo nen inane ikhi logolik, ”Tuhan andiat fogerasuogo!” iluk agarek.

¹⁰ I fu lagarek mene ogore At Tuhan a'ma nek werek, At ebere Raja mondok-mondok faget lego mene logolik mendek werek.

¹¹ We At Tuhan nen enek againafuri inomame wogisigik, it inoba mondok fanorogo hilingfisigik, ikhi logouwak.