MAZMUR 26 - Allah Wene Fano Wene Hupla Inane

Ap weak hilingitarek lek mene nen samban agarek wene

¹ Tuhan neisena, an he nendawinggenma nen mondok higithogo welagimo re, Haren katokhogo nek hilingnobagain o. An he Tuhan hoba nek nendawimo eberek mondok logolik he, we endebengge iluk ogo nendawinggen ekhe pire pare ili'lago mondok lek.

² Tuhan neisena, an nebe hilingik welagi mene nobabut palnabin o, An nendawimo namolo anggikhi lagi mene inom, wenggelhi lagi mene inom, pilingisogo kumutnean o.

³ An noba Haren hendawi hundik hilingnafi lagen mene andi faget hundik-handik wenggel hikhi logolik he, Hat hoba tiphogo nek hilingitu welagi.

⁴ An he ap ineranen wene lalinafarek mene andoma ninom kabogetu aplere nabitsek welagi, nen it ap inane nen henathigik agarek mene ninom sebetu aple ogore nabirat.

⁵ It afuni weak hilingitarek mene nen kaboge'luk hilingitunem andoma mondok nabit isikhi lagi, nen it weak hiligitarek mene inebe re, an nen agaiserinafi lagi.

⁶ An weak hilingiti lagi lek iluk enegenggerogo re nebe horaluk, wuni Hat fogethafu awuni watik,

⁷ nen legeisogo hobagauwageluk Haren elalin hilingiti lagen mene andoma fagetik, Hat hobaget yi mene ti mene warogo nolhuba mezbah era'lukwe masetik, ikhi lagi.

⁸ Tuhan neisena, an he Hat hebe handungdang logolik welagen oba, Hat awi wuri'mo andoma nendawi hundik hilingiti lagi o, neisena.

⁹ An he it afuni weak hilingiri'lagwi mene ninom ambine noasu fuk, nen it afuni inenggi nen inamep wulagaisogo inoatarek mene andoma ninom nareagun wo'nabu fuk.

¹⁰ It afuni andoma re hundik-handik weak mondok hilingiri'lagwi, nen yi mene ti mene inenggi a'makwe helouwogeluk enek hilingitu werek.

¹¹ Oba nen an enek he nendawimo mondok fanorogo welagimo re, hendawi hundik nabimbik he fikhalogo nobagain o.

¹² A'nogo nobagagin oba re yi mene ti mene andomaba nen an nailo legengge nambong serogo welagik, nen it afuni Hat hagainafuri mene inebe hokhorogo kabok se'ma andoma nen an nen Tuhan fogethafik, ikhi logogin o.