MAZMUR 23 - Allah Wene Fano Wene Hupla Inane

An nang gembala fano mene re Tuhan aro, iluk wuni watikhe wene

¹ At Tuhan he, an nanggembala se'narek mondok were'ma, an nelagaikhogo ekhe welagirek lek.

² Aren an nebe wo'narek, o leimo engga mulire'ma fanoma andoma weing nobagaikherek. Arenat i abolo'lek were'ma andoma wo'narek lagarek.

³ At awene melalek ikhe mene higithogo re, Aren an ekhe inomat nomamet figik, kwe eberogo meneba wo'narek lagik, ikherek.

⁴ An nebe tonggwe mum hikhaksekwe lagain halok ogore, Haren fetnarek mondok logolik, ap wam domba halherek mene nen, anggo ebe wasinogoluk, arigeba ebe telherek andi hak, telnafi lagen andi nen he, nailo lekhogo logogin.

⁵ It an naselei mene ineilhanem en he, Haren nahenengge wo'nafi lagen. Haren ap kain mene afuni inambok wagunem hakhogo hilingnafi lagen. Harenat nagai nunggu mene ele sophogo hinagaisogo wo'neti lagen.

⁶ Hat hobabut he an nebe hendawi hundik logolik, fetnarek mondok welagen mene andi re an nelu o. A'nogo hilingnafi lagen andi nen he, an nebe neluk logolik oba re Hat haiba andoma nabolok lek mondok-mondok logogin o, iluk wuni watikhe.