MAZMUR 147 - Allah Wene Fano Wene Hupla Inane

Allah omame mondok hokho mene a'nogo faget fogeratarek awuni

¹ Tuhan fogerasuok! At fogerati logogun andi re mondok fano, nen At obaget wuni warogo fogerati logogun mene andi re ninagaiyek oba fogerati logouwok!

² At Tuhan nenat o Yerusalem andi ambotkwe wusigin, afuni hele warogo huginabi lagaikha mene omanogo Arenat woginarek inambotkwe fisa wesigin.

³ Afuni inendawinggen mondok weaga'luk werek mene re Aren fano hilingfisikherek, nen it inendawimo inoumo hak werek mene re, Aren inagambut waganogo leget fisikherek.

⁴ Arenat hesagal pogoroba andoma mondogat wenagaisogo fisigik, nen inenu amu-amu salogo fisigik, isikhe.

⁵ Nit nineisena Tuhan andi re Mondok Hokho agun logolik elalin hilingiterek mene werek, At endawi wenggelek mene andi re huli warogo fou re elo'lek.

⁶ Afuni sebelogo fisagarek mene re Aren legeisogo fisikherek, oba nen he afuni inobabut weak mene re sebelogo kweangma pelaginaferek.

⁷ Nit nineisena Tuhan obaget wuni fogeratarek awuni wulagaisogo wa'ni o, nit nineisena Allah obaget pinggong kecapi kong e'ni.

⁸ Arenat ohena oba pogot salogo figik, kweang faget meiso fougetik, tom-tom mondogat engga wulibuageluk hilingisogo figik, ikherek.

⁹ Arenat he yi wam ti wam amburu nunggu mene wogisikherek, nen sue ket-ket sue eagwi nen inane sin etarek mene ogore inamburu wogisikheregat.

¹⁰ At Tuhan amolo re kuda omame welagarek andiba re lek, nen it ap sikhe fisogo mene inambong siserek inap andoma inoba re legat.

¹¹ We At Tuhan he it afuni At oba inailorogo logolik hilingitarek mene andi inom, nen afuni Aren endawi hundik hilingninabuageluk oba eberek werek mene andi inom, inoba nek he agaiyek mondok werek.

¹² Hat Yerusalem yi! Tuhan fogerasin o. Hat Sion yi re! Heisena Allah fogerasin.

¹³ Aren he hanggwe sou hokho mene omanogo omamet figik, nen it afuni o andiba werek mene andoma fanot fisigik, ikherek.

¹⁴ Nen hit hinailoba andoma hinailo legengge logouwageluk Aren kagalhinarek welagik, nen gandum enggen mondok fano meneba hinoba homot hinobagagik, ikherek.

¹⁵ Arenat kweang oba wene melalfugunem he, At ane ikherek mene a'nogo weak weakhogo nek hilingiterek.

¹⁶ Aren he meiso sogenggen es mene domba esi kut andi hangge pelabi wagik, nen lilengge logoum-logoum waregengge wul hangge pelabi wagik, ikherek.

¹⁷ Aren meiso sogenggen es mene re helebenggen hak mene pelabi wagik ikherek. A'nogo hilingitunem he aigengge andoma nen hambuk haluk logou re mondok elo'lek.

¹⁸ A'nogo hilingfulugen At ane miming oba re, meiso sogenggen es mene a'nogo ambotkwe i mene hilinglasuageluk yaga'luk, Aren sogoi funhogo lakfei wagunem he i a'nogo wulibisogo lagarek.

¹⁹ Aren awene melalek menfikhe mene omanogore at Yakub yagatikhe, nen wene yi'nogo hilingiti logoino ti'nogo hilingiti logoino iluk werek mene omanogo re, againafuri Israel mene onggwaregen wenago mene omanogo inoba yagaisasikhe.

²⁰ It afuni inunggulenu amu mene andoma inoba re At awene melalek inonggotse'ma re Aren a'nogo hilingiterek lek, Tuhan fogerasuok!