MAZMUR 146 - Allah Wene Fano Wene Hupla Inane

Allah amu nen telninaferek iluk fogeratarek awuni

¹ Tuhan enek fogerasuok! An nendawimo nen Tuhan enek fogerasigin!

² An nebe neluk logolik oba re Tuhan enek fogerati logogin, nen an nebe logolik oba re neisena Allah faget wuni wati logogin.

³ It afuni ap inenu werek inap andoma inom, athe it afuni ekhe telhinabu elo'lek mene andoma inoba inom, hinendawinggen himbirik logou fuk.

⁴ It ariginik mene andoma inebe wa'lasugun halok he inambotkwe kweang asugun, Nen iren yi'nogo ti'nogo hilingisugun iluk wene ebetarek mene omanogo re a'nogo sambulat legasigin.

⁵ It afuni ineisena Tuhan Allah oba inendawinggen himbitfuluk hilingiri'lagwi mene andoma re inagaiyek hikhi logouwak, it leberinafu mene re at Yakub eisena Allah andi hilingfuluk werek mene andoma re inagaiyek anggikhi logouwagat.

⁶ Arenat pogot inom kweang inom elalhikhe, i laut inom, nen elonggoma welagarek mene andoma inom he Arenat elalhikhe. At he mondok-mondok andoma tiphogo nek hilingitu welagarek.

⁷ Afuni sebelogo fisagarek mene re At Tuhan nenat inebikhit a'luk inili woginaferek, afuni inamburu nele were'ma Aren nunggu mene wogisikherek. It afuni hele warek were'ma Aren lologo wulak fisikherek,

⁸ afuni ineilenggen mum mene ineilenggen yethoageluk fenggen fisigik, afuni pule pugu mene Aren omamerogo menfisigik, afuni higithogo hilingitarek mene Aren endawi hundik hilinginafik, ikherek.

⁹ Afuni pok mene re At awea'ma fisaluk ferinarek welagik, it hemi sogwe mene inom yenggerugwi suarek mene inom Aren leberisigik ikherek oba nen he, afuni kwanirogo hilingitarek mene nen hilingisugun iluk wene oak palogo fagarek mene omanogo re Aren legetfisikherek.

¹⁰ Tuhan andi re mondok-mondok faget Raja logogin. Hat Sion, heisena Allah andi re yogondak inom hobuk inom mondok-mondok andoma etok mondok logogin. Tuhan enek fogerati logogun!