MAZMUR 144 - Allah Wene Fano Wene Hupla Inane

At raja omame agaikhesik Tuhan hai watikhe wene

¹ Daud en isikhe mene. At Tuhan andi re an nebe awea'ma nobagaluk fetnarek werek mene hilingi'mo re Arenek fogerati logouwok! Aren he weim yafarek mene andoma an yanggulnafik, o pin talogo inoatarek mene andoma an yaganetik, ikherek,

² At andi re an lebetniigik, nebikhit agik ikherek mene, an nagap telogore At awe a'ma kuluk welagirek, At andi re an nebe telnabuageluk he an nen At were'ma laluk welagirek. Aren he afuni inunggulenu ekhe mene-ekhe mene omanogo an na'ma sebelogo fisikherek.

³ Tuhan neisena, afuni andi re ningginigen Haren at ebe futfikhi lagen nogo? At andi re ebe sa weregen Haren at andi henggi wenago welagen?

⁴ Afuni andi re sogoi misigam furogo lagarek andi hangge, nen inafumagengge palogo lagarek andi hakhogo inebe a'nogo werek.

⁵ Tuhan neisena, pogot heal haluk he Hebe pi me o, tom-tom andoma endu so'le wilibuageluk henggi senhan.

⁶ It haselei mene pugulik-pagalik uageluk Hat hangge eilabut yegelogo lakfei me o, it inebe hesangge pesangge asuageluk handok pisingerisan.

⁷ Hat hebe pogoroba nen henggi sen nobagai we'luk, i fu weri'lagoba nen lugurogo nobagain o. Ap pok mene andoma inomameba nen telogo nobagain o,

⁸ iren inane ineranen wene igik, nen inane hombuk tulemat palhik, hilingitarek mene andoma inoba nen wene noba korogo fein o.

⁹ Allah neisena, an nen Hat hobaget wuni ket mene ikhi logogin. Wuni ikhi logolik pinggong kecapi ba wati logogin.

¹⁰ Harenat it raja-raja omanogo inoba inalonget fisegendek, nen Hat hamingmingengge Daud ogo fikhalogo wulak fikhi lagenat.

¹¹ Afuni inanini mondok weak mene andoma inenggarok enggat oba nen telnabin o. Ap pok mene andoma inomameba nen telogo nobagain o, iren ineranen wene igik, lalek wene lalninafik, nen hombuk tulemat palhik, hilingitarek mene andomaba nen telnabin o.

¹² Nit ninagainafuri ap mene andoma re, it inebe souge oba nenat awi yak fugunem hokho agarek higit hilinglasuak. Nen nit nina'logomi andoma re e hun raja ailoba, unggut kwe hesesengge wokhigik liabek mene andoma hakhogo hilinglasuak.

¹³ Nit ninailoba yi mene ti mene fuguba andoma re, ekhe mene ekhe mene kweang oba yatarek mene andoma enggen palegen hoporek mondok logouwak. Nit ninanggo domba o leimo werek mene andoma, ineagwi tagaisogo mondok sik-pik uak.

¹⁴ Nit ninanggo sapi andoma mondok hokho pokhorogo saga ikhi logolik, ekhe longgo igi'lek, eagwi ekhe alabutmo nen, eagwi ekhe alabutmo nen perelogo lek agi'lek logouwak. Nit ninawi kota amdoma nen ebekhe kwe andoma enggin-fenggin hikhi logolik heinet ekhe wati logogun hanogo.

¹⁵ It afuni inunggulenu ariginik mene andoma re mondogat inagaiyek hikhi logouwak, it afuni ineisena re Tuhan Allah hilingik mene andoma, inagaiyegeti logouwak.