MAZMUR 140 - Allah Wene Fano Wene Hupla Inane

Awea'ma ferinarek logouwageluk kino ikhi logolik samban agarek wene

¹ Afuni nen wuni wulak fuluk inebe seberogo ugunem yanggulinafarek mene faget, At Daud Awuni.

² Tuhan neisena, ap inanini mene andomaba nen an seleget nobagain o, an nebe it afuni inobabut haferogo hilingitarek mene andoma inoba nen halogo fetnarek logoin o.

³ It inendawimo nen he, wene weak mene kagali'lagwi, linggene hundik-handik andomaba re, iren yei wene nek liafu werek.

⁴ It inamelinggen he kisu agaikhal racun werek mene nen afuni inoaterek andi hangge hilingik, nen it inane ugunem he esonggat werelek mene hakhogo ting taung ikherek.

⁵ Tuhan neisena, it afuni inobaharo weak logolik, inomameba nek hilingitarek mene andoma inoba nen hawea'ma nobagaluk fetnarek logoin o, it ap inaniniba an weaget nobagaluk sebelogo nobagagun iluk hilingiri'lagwi mene andoma inoba nen kagalnarek logoin o.

⁶ It ap foget fakhagarek mene andoma nen he linglong an nobaget hele webet nobagali'lagwi, nen su unggut wurilogo an sennabugun iluk hilingiri'lagwi. Nen ebekhe kwe an lagainkwe mondogat he an nebe sebelnabuageluk sapna webhogo nobagali'lagwi.

⁷ Tuhan neisena, an nen ikhi logolik he an neisena Allah re Hat welagen, andi nen he an nen yagaheti lagi mene andoma fut nobagakhi logoin.

⁸ An neisena Tuhan Allah andi re, an nagap telnafi lagen mene mondok homame mene welagen, an weim yafunem Harenat nagap telogo fetnarek welagen.

⁹ Tuhan neisena, it ap inanini weak mene nen anggagarek mene andoma faget Haren inane holu fugo, iren wene hilingisugun iluk inane mari'lagwi mene andoma re ebe asuageluk u fuk.

¹⁰ It an naselei mene inomame asuageluk herakfisa fuk, iren inane weak meneba ikhi logolik an nenu weagerogo fili'lagwi mene andoma it inonggwarek inoba aga logouwak.

¹¹ Aren it inebene endu enggen puleli laga logouwak, nen it inebe kiling ele wa'lagaikharek meneba pelakfisamo hobuk ineluk asinogo.

¹² Afuni inobabut aferogo nek hilingitarek mene andoma enggin-fenggin mene nek inoba asi waga logouwak, it ap inabok weak palharek mene andoma kweangma yoma logouwageluk herakfisogoin hanogo.

¹³ Haren afuni mondok sebelek mene inobaget wene katokhogo nek hilingfisigik, it inenggi lek mene inawene faget inebikhit agik hilingiti lagen mene andi re an mondok nelu o.

¹⁴ Eberogo nen he, afuni higithogo hilingitarek mene re, Hat helokhoma inendawinggen hambukhogo logolik Hat henu legeisogo fogethafi logogun.