MAZMUR 135 - Allah Wene Fano Wene Hupla Inane

Fogeratarek awuni

^1-2 Hit ap Tuhan amingmingengge At ebe werek oba omanogo obaget kabogeti lagep mene nen he, nit nineisena Tuhan enu nek fogerati logoni.

³ At Tuhan ebe fano andi nen he, Arenek fogerati logoni, At endawinggen lebeksek andi nen he, At enu nek seralhu logoni!

⁴ At onggwarek faget he Yakub wenagaisogo fakhasikhe, At againafuri Israel mene re At onggwarek mene hilingisogo fakhasikhe.

⁵ Eberogo nen At Tuhan andi re mondok hokho agun werek a'nogo an nelu o, At ebe lego agun were'ma dewa afuni nen fogeratarek mene andoma re sebelek hak werek.

⁶ O pogoroba inom, kweangma inom, i laut oba inom, i laut unggut uanhogo yenggele'ma andoma inom, At onggwarek endawimo wenggelherek mene higithogo nek hilingiterek.

⁷ O kweangma unggut-unggut andoma nen he ohena mimingitunem eilabut yegelogo o meiso lakfei wagarek, nen Aren o sogoi andogorogo fisogo werek oba omanogo nen wulibi wesuageluk mimingiterek.

⁸ O Mesir oba omanogo nen he Aren afuni inagainafuri manggusa tago omanogo inom, yi mene ti mene attak tago welagaikhe mene omanogo inom mondogat inoatikhe.

⁹ O andoma nen at raja inom agoromi pegawai omanogo inom wene inoba feigeluk Aren he elalin meneba inom, hilingisu mondok elo'lek meneba inom inoba hilingfisikhi lagaikhe.

¹⁰ Aren he yi afuni ti afuni inunggulenu hokhorogo inoatik, nen it ap raja-raja inomame hokho mene omanogo inoatik, isikhe.

¹¹ Ap Sihon Amori mene inoe raja a'nogo inom, hun Og o Basan mene inoe raja a'nogo inom, nen it raja-raja ekhe o Kanaan oba welagaukwa mene omanogo inom inoatikheat.

¹² A'nogo inoatikhesik, it mene inanggweang inebe welagaukwaba a'nogo re, At againafuri Israel mene eise asimbik logouwageluk wogisasikhe.

^13-14 Tuhan neisena, Hat hagainafuri inobaget wene katokhogo palinafik, nen hamingmingengge mene hendawirinafik, ikhi lagen andiba re, ”Hat hobaget yagaisugu mondok logolik, Hat henu re it hobuk ta'larik laga logogun mene nen eberek mondok logogun.”

¹⁵ It inandugwi kembu re afuni inenggi nen emas mene inom perak mene inom hilingitarek.

¹⁶ It inambe werek oba nen he inane agarek lek, ineilenggen werek oba nen he hagarek lek.

¹⁷ It inesanggo werek oba nen he holharek lek, nen inambelema nen set endephogo ekhe wiliferek legat.

¹⁸ It afuni a'nogo hilingfuluk oba ebetarek mene andi re a'nogo nek hilinglakhoak.

¹⁹ Hit afuni Israel mene yi sani, hineisena Tuhan enek fogerati logoni! Hit ap imam-imam mene nen he, Arenek fogera'ni!

²⁰ Hit afuni Lewi mene nen he Tuhan enek fogerati logoni! Hit At oba hinailorogo welagep mene nen he, Arenek fogena'ni!

²¹ At Tuhan Awi Yerusalem oba logolik andom Sion oba werek mene a'nogo nek fogerati logoni o! Tuhan enek fogerati logoni!